Habari

Aliyehifadhiwa mochari kwa saa moja aeleza muujiza kuhusu 'jinsi alivyofufuka'

November 27th, 2020 2 min read

Na VITALIS KIMUTAI

“NAFURAHI kuwa hai!”

Hayo ni maneno ya kwanza ya Peter Kiplangat Kigen, 32, kutoka Kaunti ya Kericho ambaye alipelekwa katika hifadhi ya maiti ya Hospitali ya Rufaa ya Kipkatet baada ya kudhaniwa kimakosa kuwa alifariki.

“Ni muujiza kwamba napumua, naongea, kula na kutingisha miguu na mikono baada ya kutangazwa kuwa mfu. Hii ni kazi ya Mungu,” akasema katika mahojiano na Taifa Leo jana Alhamisi.

Alikuwa akiongea hospitalini anakoendelea kupokea matibabu, ambapo alielezea aliyoyapitia baada ya kujipata amelazwa katikati ya maiti katika mochari.

Baba huyo wa watoto wanne alipiga mayowe wahudumu wa hifadhi hiyo walipoanza kukata sehemu ya mguu wake ili watie dawa ya kuhifadhi maiti.

“Nilihisi uchungu mkali mguuni mwangu na nikalia kwa sauti ya juu. Ilikuwa ni kana kwamba nilikuwa nikichomwa kwa chuma ya moto uchungu ukienea hadi kwenye mifupa yangu,” akasema Bw Kigeni.

Jamaa, wanakijiji na watu wa kawaida walisongamana katika wadi ya wanaume ya hospitali hiyo ili angalau wamwone mwanamume huyo “aliyefufuka kutoka wafu” baada ya kutupwa katika sakafu baridi kwenye hifadhi ya maiti.

“Sifahamu kilichotendeka kilichotendeka kabla ya kujipata nimetupwa ndani ya mochari. Lakini baadaye nilihisi nikipelekwa kwa machela katika wadi mwili wangu ukiwa umewekwa paipu za plastiki. Hii, niligundua, ni baada ya kupiga kilele,” akasema Bw Kigen ambaye zamani alikuwa akihudumu kama kondakta wa matatu.

Ilisemekana kuwa jamaa huyo alizirai na kupelekwa katika wadi ya kuwahudumia wagonjwa mahututi ambako madaktari walichukua muda wa saa moja kumsaidia kupata ufahamu.

Baadaye aliwalazwa katika wadi ya kawaida ya wanaume.

Alipozirai kwa mara ya kwanza katika kijiji cha Keroncho, wadi ya Cheplanget, Jumanne asubuhi, Kigen alikimbizwa hospitalini na jamaa zake ambao hawakuamini kuwa angepona kwa sababu amekuwa akiugua kwa muda mrefu.

Jamaa zake walilalamika kuwa hakuhudumiwa katika wadi ya majeruhi alikokaa kwa saa kadhaa baada ya kuzirai.

“Sikuelewa ni jinsi gani wahudumu wa afya walivyoshawishika kuwa nilifariki na hivyo nikisafirishwa hadi katika mochari. Jambo hilo bado linanikera,” akasema Bw Kigen.

Jeraha katika mguu wake wa kushoto bado ulikuwa unampa maumivu.

Licha kwamba alikuwa mchovu huku akijikaza kuongea, Bw Kigeni bado anaweza kuwakumbuka jamaa na marafiki zake ambao walimtembelea. Aliweza kuwatambua kwa majina yao halisi.

Watu wa familia yake walisema Kigen amekuwa akiugua kwa muda mrefu.