Angwenyi sasa ataja mizozo ya ardhi kama chanzo cha mauaji ya washukiwa wa uchawi Kisii

Angwenyi sasa ataja mizozo ya ardhi kama chanzo cha mauaji ya washukiwa wa uchawi Kisii

Na CHARLES WASONGA

MBUNGE wa Kitutu Chache Kaskazini Jimmy Angwenyi amedai mzozo wa ardhi ndio ulichangia mauaji wa akina nyanya wanne katika eneo hilo Jumapili.

Akiongea na wanahabari Jumanne katika Majengo ya Bunge, Nairobi Bw Angwenyi alisema japo ilidaiwa kuwa wanne hao walikuwa washukiwa wa uchawi, wauaji hao walitaka kuwapokonya akina nyanya hao vipande vya ardhi.

“Nakubali kuwa uchawi upo katika eneobunge langu. Lakini mauaji yaliyotokea Jumapili yalichangiwa na suala la mzozo wa ardhi wala sio uchawi kama ilivyoripotiwa,” akasema huku akilaani mauaji ya akina nyanya hao.

Hata hivyo, kiongozi huyo hakutoa maelezo zaidi kuhusu kauli yake.

Bw Angwenyi aliwaonya wakazi wa eneo hilo na Wakenya kwa ujumla kukoma kuchukua sheria mikononi mwao kwa kuwaua watu kwa tuhuma za uchawi.

“Ukweli ni kwamba vitendo vya uchawi haviruhusiwi katika jamii yoyote ile lakini washukiwa wa uovu huu wanapokamatwa wanafaa kuwasilishwa kwa maafisa wa polisi ili waadhibiwe kwa mujibu wa sheria. Mungu ndiye ana ruhusu ya kutoa uhai wa mtu wala sio mtu mwingine,” akasema.

Bw Angwenyi pia alitoa wito kwa maafisa wa polisi kuchukua hatua za haraka na kuwakamata washukiwa wengine ambao bado hawajakamatwa.

“Nafurahi kuwa washukiwa wanne wamekamatwa na watafikishwa mahakamani. Naomba polisi waendelee kuwasaka wengine wengi ambao walitoroka,” akaeleza.

Jumanne washukiwa wanne; Amos Nyakundi Ondieki, Chrispine Ogeto Mokua, Peter Angwenyi Kwang’a na Ronald Ombati Onyonka walifikishwa katika mahakama moja mjini Kisii kwa ajili ya kufunguliwa mashtaka kuhusiana na mauaji hayo.

Hata hivyo, Hakimu Mkuu Mwandamizi wa Mahakama hiyo Paul Mutai hakuwaruhusu kujibu mashtaka bali aliamuru wazuiliwe katika korokoro ya polisi kutoa nafasi kwa uchunguzi zaidi kuhusu kisa hicho.

Kesi hiyo sasa itatajwa mnamo Oktoba 29, 2021 ambapo ombi la dhamana kutoka kwa washukiwa hao wanne litashughulikiwa.

You can share this post!

Uingereza waadhibiwa vikali kwa utovu wa nidhamu wa...

KWA KIFUPI: Utakufa mapema ukihifadhi mlo kwenye vifaa vya...

F M