Corona yasambaratisha mipango ya Hajj

Corona yasambaratisha mipango ya Hajj

Na FARHIYA HUSSEIN

Fahat Hassan, ni miongoni mwa Wakenya wachache ambao wamekosa sherehe za mwaka huu za Hajj.

Waumini wa dini ya Kiislamu kote ulimwenguni wanatarajia kuanza sherehe yao ya Hija ya kila mwaka baada ya siku mbili, inayojulikana kama ‘Hajj’, lakini mwaka huu nchi zingine zitakosa nafasi hiyo kutokana na kuzuka kwa janga la corona.

Hija inafanyika wakati wa mwezi wa Dhul Hijja, ambao ni mwezi wa kumi na mbili na wa mwisho katika kalenda ya Kiisilamu na huonekana kwa wengi kama nafasi ya kuimarisha imani yao.

Bw Hassan, raia wa Kenya alilazimika kufuta safari yake kwenda katika jiji takatifu la Makka kwa sababu ya marufuku ambayo ilitangazwa mwaka huu, mwezi wa Aprili na Ufalme wa Saudia kufuatia janga la corona.

“Ilipaswa kuwa mara yangu ya kwanza kwani sijawahi kwenda Ufalme wa Saudia. Nilikuwa nimetenga Sh450, 000 katika miaka mitano ili tu kuhakikisha siku moja nitatembelea mahali hapo. Kwa bahati mbaya, huu sio mwaka huo, “anasema Bw Hassan.

Kutembelea mji mtakatifu ni ndoto kwa Waislamu wengi Waaminifu.

Huku Kenya, mwezi huo utaanza Jumatano ambayo kwa mujibu wa Kalenda ya Kiislamu itakuwa tarehe moja ya Dhul Hijja.

Kawaida, katika mwezi huu, waja wanaoabudu kutoka nchi tofauti hutembelea eneo takatifu linaloitwa Kaaba, katika mji wa Mecca, Nchini Saudi Arabia.

Mwaka huu, ni mataifa 160, wanaoishi katika Nchi ya Saudi Arabia watapata nafasi ya kufanya Hija.

“Wizara ya Hajj imefanya uteuzi wa Hujjaj kutoka mataifa 160 wanaoishi katika Saudi Arabia. Wagombea wote waliofaulu wamefahamishwa kupitia ujumbe was simu, SMS, “ilisoma barua kutoka kwa mitandao zao za kijamii.

Mkurugenzi wa Mkoa wa Pwani wa Kundi la Adhalusi, Sheikh Rishard Rajab anasema, kama mawakala wa hajj wamepata pigo kubwa.

“Mwaka jana, tuliweza kutuma Wakenya 4,500 kufanya sherehe hiyo. Walakini, mwaka huu hakuna mtu anayeenda. Kwa kuwa marufuku yalitangazwa Aprili mwaka huu, wale ambao wangesafiri walibakia,” alisema Sheikh Rajab.

Kulingana na Baraza la Maimamu na Wahubiri wa Kenya (CIPK), Katibu Mratibu, Sheikh Mohammed Khalifa, waaminifu wanaweza kufanya safari hiyo kupitia mazoea mengine ya kidini.

“Wakati mtu anashindwa kusafiri kwenda Makka kwa ibada ya Hija, wanaweza kufunga siku kumi za kwanza za mwezi, watembelee wagonjwa, wakifanya shughuli za hisani miongoni mwa wengine,” alisema Sheikh Khalifa.

FAHAT HASSAN, mwenye umri 27 ni baadhi ya wakenya waliokosa fursa ya kuelekea Nchini Saudi Arabia kutekeleza ibada au sherehe za Hajj ambayo hufanyika kila mwaka. Mwaka huu wakenya wengi hawakuweza kusafiri sababu kuu ikiwa kuzuka kwa janga la korona. Picha/ Farhiya Hussein

Baada ya sherehe za Hija, waumini hutakiwa kufanya ibada za Idd ila hawatafanya ibada kama kawaida kama vile miaka zilizopita.

“Wizara ya Hajj imepeleka vifurushi kwa mahujaji wote waliochaguliwa kwenye nyumba zao, na mahitaji, zawadi na vitu vinavyohitajika kwa starehe na afya yao,” ilisoma barua.

Kwa kuongezea, Wizara ilitangaza kwamba mahujajj walipewa chanjo dhidi ya homa ya msimu pamoja na zawadi zinginezo.

Wakati huo huo, Msimamizi amepewa jukumu la kila kusimamia wanahija 20 na pia kupewa basi watakayotumia kwa kipindi chote cha hajj.

“Mtu yeyote akijaribu kupita sehemu takatifu wakati wa siku za Hajj, watafungwa gerezani kwa siku 15 na kulipa Sh10,000 faini ya Saudi Arabia. Wakiukaji watarudishwa nchini kwao ikiwa ni raia wa kigeni, “ilisema.

Siku za mwisho za Hajj zitafuatwa na sherehe za Eid al-Adha, ambayo inasemekana kuwa sikukuu ya kuchinja. Maombi mengi yanafanywa katika misikiti, lakini mambo hayatakuwa sawa.

Hii ni kwa sababu ya Wizara ya Afya kutoa hatua mpya za kufungua tena sehemu za ibada huku watu mia pekee wakiruhusiwa kuingia ndani.

“Kwa sasa tutafuata maagizo ya serikali ya watu 100 tu walioruhusiwa kuingia misikiti. Tunaomba na tunatumai wakati wa maadhimisho ya Idd, hatua zingine zitakuwa zimeainishwa, “alisema Sheikh Khalifa.

Mkurugenzi wa Maswala ya Kidini kaunti ya Garissa, Sheikh Mohammed Yakub anasema katika kaunti hiyo kila mtu atafanya sala hizo nyumbani.

“Hatuwezi kusema au kuchagua watu kadhaa ambao watasali sala za Idd. Maombi hayo ni tofauti na ya kawaida, badala yake, tutaomba nyumbani kama kawaida wakati wa idd ya kwanza mapema mwaka huu, “alisema Sheikh Yakub.

Wale watakaohudhuria ibada ya hija wataelekea karantini kwa muda wa siku saba.?

You can share this post!

Dirisha la uhamisho EPL kufunguliwa Julai 25

Serikali yawataka wazee kula chakula bora

adminleo