Kanu yaimarisha kampeni mashinani

Kanu yaimarisha kampeni mashinani

ERIC MATARA na BARNABAS BII

WIKI mbili baada ya wajumbe wa Kanu kumwidhinisha kwa pamoja Seneta wa Baringo Gideon Moi kuwania urais katika chaguzi za mwaka 2022, chama hicho kimeimarisha kampeni mashinani kikilenga urithi wa Rais Uhuru Kenyatta 2022.

Huku ikiwa imejasirishwa na hatua hiyo ya hivi majuzi, Kanu imeanzisha usajili na uhamasishaji wa wanachama mashinani kote nchini kwa lengo la kuvutia umaarufu kwa mwenyekiti wake.

Wandani wa Bw Moi wanasema hatua ya kuidhinishwa kwake na Kanu ilijiri wakati mwafaka kwa sababu ilimweka katikati ya kinyang’anyiro cha kumrithi Rais Kenyatta.

Katika hafla ya kufana iliyoandaliwa Bomas of Kenya, Nairobi, wiki iliyopita, wajumbe hao zaidi ya 3,000 vilevile walimpa Seneta Moi kibali cha kwenda na kuunda miungano na vyama vingine kwa lengo la kushinda chaguzi za 2022.

Bw Moi tayari ni mwanachama wa One Kenya Alliance (OKA) ambao ni muungano unaowaleta pamoja viongozi wa Wiper, Kalonzo Musyoka, Amani National Congress, Musalia Mudavadi, na Ford Kenya, Moses Wetang’ula.

Taifa Leo imebaini kuwa Kanu imeanzisha misururu ya kampeni mitandaoni kote nchini katika juhudi za kupigia debe ugombeaji wa kiongozi wa chama chao kabla ya Uchaguzi Mkuu 2022.

Katibu wa Kanu Nick Salat amesema chama hicho kimeandaa kampeni zitakazofanyika kote nchini katika majuma yajayo ili kumpigia debe Seneta Moi.

“Sasa tuna mpeperushaji bendera na tunataka kuhakikisha atamrithi Rais Uhuru Kenyatta 2022. Tutaendesha shughuli za kumpigia debe kuanzia eneo la Bonde la Ufa wiki ijayo,” alisema Bw Salat.

Yamkini mikakati hiyo inanuia kukusanya Bonde la Ufa, eneo linalochukuliwa kuwa ngome ya Naibu Rais, William Ruto, kuunga mkono azma ya Bw Moi.

Taifa Leo imefahamu kuwa Kanu imebadilisha mikakati yake eneo la Bonde la Ufa na sasa inawafikia moja kwa moja wapigakura na kujadili masuala tata ikiwemo kilimo ambacho kimetawala siasa za eneo hilo ili kuwavutia wakazi kabla ya Uchaguzi Mkuu.

Katika mpango kabambe unaolenga kubadilisha mizani dhidi ya Naibu Rais ambaye amekuwa kigogo wa eneo hilo kwa muda mrefu, Kanu imebuni timu ya maafisa 18 katika viwango vya maeneobunge kuhamasisha uungwaji mkono mashinani.

You can share this post!

DPP ataka kesi za Kimwarer, Arror ziunganishwe

Kibicho aonya wahuni wanaopanga kusambaratisha sherehe za...

F M