JUKWAA WAZI: Wandayi na Kamande watofautiana vikali kuhusu hotuba ya Ruto

NA WANDERI KAMAU

JE, hotuba ya Rais William Ruto kwa Bunge la Kitaifa ilitimiza malengo iliyokusudiwa?

Iliangazia masuala yanayowazonga Wakenya kwa sasa?

Hayo ndiyo masuala yaliyoonekana kuibua tofauti kubwa baina ya wabunge wa mrengo wa Kenya Kwanza na ule wa Azimio.

Mbunge Augustine Kamande (Roysambu) aliisifu sana hotuba hiyo, akisema iliangazia changamoto zinazowakumba Wakenya. Anaitaja kama “mwanzo mpya” kwa utawala huo.

Hata hivyo, mbunge Opiyo Wandayi (Unguja) aliikosoa vikali hotuba ya Dkt Ruto, akisema inaonyesha kama kwamba bado yuko kwenye kampeni.

Alisema Rais Ruto amesahau kuwa kama rais, anapaswa kuiunganisha nchi, badala ya kuendelea kuuingilia na kuukosoa Upinzani.

Augustine Kamande-mbunge, Roysambu

“Hotuba ya Rais William Ruto ilikuwa ya kipekee. Ilipita matarajio niliyokuwa nayo. Aligusia masuala kadhaa ambayo yamekuwa kero kubwa kwa Wakenya, hasa wale wa kiwango cha chini. Nilifurahishwa sana na hatua yake kurejelea mikakati atakayoweka kutekeleza Hazina ya Hustler, ili kuhakikisha kuwa inamfaa kila Mkenya. Haya ni mapambazuko mapya ya kiutawala nchini ambayo tumekuwa tukiyapigania. Ni mwanzo mpya.”

Opiyo Wandayi-mbunge, Unguja

“Rais Ruto anaonekana kuwa bado yuko kwenye kampeni. Kwake, Kenya inajumuisha watu walioshinda na wale walioshindwa; wale waliomuunga mkono na waliompinga. Hii si kauli anayopaswa kutoa kiongozi anayetarajiwa kuiunganisha nchi. Hotuba hiyo haikuwa tofauti na kauli ambazo alikuwa akitoa wakati wa kampeni. Kando na kurejelea ahadi ambazo amekuwa akitoa, haikueleza mikakati atakayochukua kuhakikisha kuwa zimetimizwa.”