• Nairobi
  • Last Updated March 28th, 2024 5:22 PM
Chepng’etich arejea Japan kwa kishindo Nagoya Marathon

Chepng’etich arejea Japan kwa kishindo Nagoya Marathon

NA GEOFFREY ANENE

MKENYA Ruth Chepng’etich alirejea Japan kwa kishindo baada ya kutwaa taji la Nagoya Marathon kwa rekodi mpya ya Nagoya Marathon, Japan, na bara Asia ya saa 2:17:18, hapo jana Jumapili.

Bingwa huyo wa dunia, ambaye anajivunia muda wake bora wa 2:17:08 kutoka Dubai Marathon 2019, alikosa rekodi ya dunia ya wanawake pekee ya 2:17:01 inayoshikiliwa na Mkenya mstaafu Mary Keitany.

Chepng’etich alikuwa katika orodha ya waliopigiwa upatu kutwaa taji kwenye mbio hizo zilizo na tuzo kubwa kabisa duniani ya mshindi ya Sh28.5 milioni.

Japo hakuimarisha muda wake bora wa 2:17:08 alivyotaka, alitimiza ndoto ya kuibuka mshindi baada ya kuonyesha kivumbi wapinzani wake wa karibu Lonah Chemtai Salpeter (Israel) na Yuka Ando (Japan) walioridhika na nafasi ya pili na tatu mtawalia.

Bingwa huyo wa Chicago Marathon 2021 alikuwa na ziara duni Japan mwaka jana alipoizuru kwa mara ya kwanza wakati mbio za kilomita 42 za Olimpiki 2020 mjini Sapporo.

Mnamo Jumapili, Chepngetich, ambaye hakukamilisha Olimpiki baada ya kusalimu amri katika kilomita ya 30 akihisi kuwa mgonjwa, alikata utepe katika eneo la Vantelin Dome Nagoya zaidi ya dakika moja mbele ya mzawa wa Kenya, Salpeter (2:18:45).

Ando alikamilisha kwa 2:22:22.Vita vya kunyakua taji vilisalia kuwa kati ya Chepng’etich na Salpeter baada ya kilomita ya 30.

Hata hivyo, Chepng’etich alitifulia vumbi Salpeter zikisalia kilomita nane. Chepng’etich alifuta rekodi ya mshindi wa 2020 Mao Ichiyama (2:20:29). Matokeo (10-bora): Ruth Chepngetich (Kenya) saa 2:17:18, Lonah Chemptai Salpeter (Israel) 2:18:45, Yuka Ando (Japan) 2:22:22, Ai Hosoda (Japan) 2:24:26, Yuka Suzuki (Japan) 2:25:02, Eloise Wellings (Astralia) 2:25:10, Ikumi Fukura (Japan) 2:25:15, Kotona Ota (Japan) 2:25:56, Kanako Takemoto (Japan) 2:26:23, Chiharu Ikeda (Japan) 2:26:50.

  • Tags

You can share this post!

Urusi yavamia eneo la kufunzia jeshi Ukraine

Aibu tupu mke wa mwanasiasa kukataa kuandalia wafuasi chai

T L