ODONGO: Tusifuate vyama 2022 ila falsafa za wawaniaji

ODONGO: Tusifuate vyama 2022 ila falsafa za wawaniaji

Na CECIL ODONGO

CHAGUZI ndogo ambazo zimefanyika nchini tangu 2017 zimeonyesha kuwa Wakenya hufanya maamuzi bora na kutofuata mawimbi ya vyama vikubwa jinsi inavyokuwa wakati wa uchaguzi mkuu.

Upigaji kura katika chaguzi ndogo ambazo zimefanyika mara nyingi umedhihirisha kuwa wananchi wanapigia kura kiongozi kutokana na falsafa yake wala si kutokana na chama chake.

Tatizo pekee ni kuwa wengi huwa hawajitokezi kutekeleza wajibu wao wa kidemokrasia ikilinganishwa na uchaguzi mkuu.

Wiki jana, wakazi wa wadi ya Nguu/Masumba walipuuza umaarufu wa chama cha Wiper katika eneo la Ukambani na kumpigia kura mwaniaji huru Timothi Maneno huku mgombeaji wa chama cha Wiper, Eshio Mwaiwa akimaliza katika nafasi ya tatu nyuma ya mwaniaji wa UDA pia.

Uamuzi huo wa raia uliafikiwa licha ya vigogo wa Muungano wa OKA, Bw Kalonzo Musyoka, Musalia Mudavadi na Moses Wetang’ula, wiki jana kukita kambi katika wadi hiyo wakiwarai raia wampigie kura Bw Mwaiwa.

Bw Maneno alikuwa akiungwa mkono na Gavana wa Makueni Prof Kivutha Kibwana na wanasiasa ambao ni mahasimu wa Bw Musyoka katika kupigania ‘ufalme’ wa kisiasa za Ukambani.

Wengi wa wapigakura wa Nguu/ Masumba walisema kuwa walimchagua Bw Maneno ambaye amewahi kuhudumu kama diwani wao, kulingana na rekodi yake ya maendeleo wala hawakuwa wakizingatia umaarufu wa chama cha Wiper.

Vivyo hivyo, ODM imewahi kupitia masaibu kama ya Wiper mnamo 2019, mwaniaji wake Chris Karan alipobwagwa na mbunge wa sasa David Ochieng’ katika uchaguzi mdogo wa eneobunge la Ugenya.

Hii ni licha ya kinara wa chama hicho, Bw Odinga na wanasiasa wengine wakati huo, kumvumisha Bw Karan kama mwaniaji bora baada ya ushindi wake kufutwa 2017 kortini.

Katika ngome ya Bw Odinga ya Pwani, mwaniaji huru Feisal Bader alimbwaga Omar Boga wa ODM mnamo Disemba 2020.

Mnamo Mei 2021, Bw George Koimburu, kwa chama cha People Empowerment Party (PEP) alishinda kiti cha eneobunge la Juja licha ya serikali na baadhi ya viongozi wa Jubilee kumpigia kampeni kali mwaniaji wao Susan Waititu.

Ingawa hivyo, kuna baadhi ya chaguzi ndogo ambazo raia waliwachagua viongozi kwa msingi wa vyama kama ushindi wa Majimbo Kalasinga (Kabuchai), Agnes Kavindu (Machakos) na Pavel Oimeke (Bonchari).

Mara nyingi Wakenya wameonyesha ukomavu zaidi wanapowachagua viongozi katika chaguzi ndogo kuliko uchaguzi mkuu.

Mtindo huu unafaa kuendelea hata 2022 kwa kuwa utasaidia katika kuwachagua wanasiasa ambao wanazingatia maslahi ya raia.

Baadhi ya wanasiasa ambao walichaguliwa 2017 kutokana na mawimbi ya vyama hawajatimiza ahadi walizotoa kwa wapigakura na sasa wanatumai kuwa watatumia umaarufu wa wa vyama vyao 2022 kurejea tena mamlakani.

Hii ndiyo maana sasa wanajigawanya katika mirengo jinsi ilivyoripotiwa kuwa baadhi ya wanasiasa washajitengea vyeo wanavyolenga kuvitwaa kupitia ODM katika Kaunti ya Siaya 2022.

Imani ya wanasiasa hawa ni kuwa hawatapoteza uchaguzini baada ya kupokezwa tiketi ya ODM.

Ni vyema iwapo wapigakura watamakinika zaidi jinsi wanavyofanya katika chaguzi ndogo kisha kuwapa nafasi za uongozi wanasiasa bora 2022.

Wapigakura wasikubali kushawishiwa kuwapigia kura wanasiasa wa vyama vikubwa kama ODM na UDA 2022 iwapo kwa mtazamo wao wanawaona kama wanasiasa ambao hawatawawajibikia kwa kuwapa miradi.

Vyama hivi vikubwa huwa pia vinaendeleza ubaguzi wakati wa uteuzi, kwa hivyo ni aula raia wamfuate kiongozi bora hata kama watahamia vyama vingine au kugombea kama wawaniaji huru

  • Tags

You can share this post!

Maswali Ruto akiidhinisha wawaniaji ugavana Pwani

Bawabu taabani kwa kumpiga mwanamke picha akiwa msalani

F M