PATA USHAURI WA DKT FLO: Nitashikaje mimba ya mtoto mvulana?

PATA USHAURI WA DKT FLO: Nitashikaje mimba ya mtoto mvulana?

Mpendwa Daktari,

Nataka kushika mimba ya mtoto mvulana. Hedhi zangu za mwisho zilikamilika Oktoba 9, 2021. Nitahesabu vipi siku ambazo kuna uwezekano mkubwa?

Naomi, Nairobi

Mpendwa Naomi,

Wakati ambapo yai linatolewa hutegemea na mzunguko wa hedhi, lakini kwa kawaida huwa siku 14 kabla ya kipindi kifuatacho cha hedhi.

Kwa mfano, ikiwa mzunguko wako ni wa siku 21, utatoa mayai siku ya 7; ikiwa mzunguko wako ni wa siku 32, utatoa mayai katika siku ya 18; ikiwa mzunguko wako ni wa siku 28, utatoa mayai siku ya 14.

Hata hivyo, kwa wale ambao mizunguko yao ya hedhi si ya kawaida, ni vigumu kutabiri siku ya kutoa mayai.

Kwa wale ambao hedhi zao si za kawaida, mabadiliko ya kimazingira na kimwili pia yaweza badilisha wakati wa kutoa mayai.

Kutokana na utofauti huu, inawezekana kushika mimba wakati wowote wa mzunguko, ikiwa ni pamoja na siku ya mwisho ya hedhi.

Pia, unaweza tabiri wakati wa kutoa mayai kwa kuangalia ute kwenye lango la uzazi.

Kwa kawaida huwa mzito kisha mwepesi sawasawa na ute wa yai katika kipindi cha mayai kutoka. Njia nyingine, japo ni adimu, ni kutumia vifaa maalum vya kutambua halijoto ya sehemu ya chini ya mwili au kipimajoto cha sehemu hii (ni tofauti na vipimajoto vya kawaida).

Japo kuna nadharia nyingi kuhusu jinsi ya kubainisha jinsia ya mtoto, hazijathibitishwa kisayansi na hivyo siwezi pendekeza kwa ujasiri.

Mbinu ya Shettles inahoji kwamba, kwa sababu shahawa za mvulana (Y sperm) kwa kawaida huwa ndogo, zenye kasi na hazidumu, basi ikiwa unataka kushika mimba ya mtoto mvulana, ushiriki tendo la ndoa unapokaribia wakati wa kutoa mayai.

Hii inabidi basi uwe na kipimajoto cha mwili, vilevile vifaa vya kutabiri wakati wa mayai kutolewa ili ufuatilie mzunguko wako kwa karibu. Mtindo huu umepingwa na wanasayansi wengi.

Njia ya kipekee ya kutambua ni kwa kuchambua jinsia wakati wa kupachikwa mimba kupitia upandikizaji mimba (in vitro fertilization-IVF), ambao ni ghali mno, na uchambuzi wa shahawa haukuhakikishii kwa asilimia mia kwamba utapata matokeo unayotaka.

Aidha, mbinu hii imeibua masuala mengi ya kimaadili. Kushika mimba kwa njia ya kawaida kunakupa uwezekano wa 50-50 kupata mtoto wa jinsia unayotaka, na hiyo yatosha.

Mpendwa Daktari,

Nimekuwa nikikumbwa na upele katika sehemu kadhaa mwilini ikiwa ni pamoja na puani. Najikuna katika sehemu zilizoathirika. Je, huu waweza kuwa mzio?

Jane, Mombasa

Mpendwa Jane,

Huenda upele huu wenye mwasho unasababishwa na mzio, au pengine unatokana na matumizi ya dawa fulani; maambukizi ya ngozi; maambukizi ya helminth infection (mnyoo); kisukari; maradhi ya tezi; ugonjwa wa ini; maradhi ya figo; ugonjwa wa neva; anemia inayosababishwa na utapiamlo wa madini ya chuma; virusi vya HIV au hata wakati mwingine maradhi ya kansa.

Litakuwa jambo la busara kwenda hospitalini ili ufanyiwe chunguzi zinazohitajika.

Haya yakijiri, epuka kujikuna kila mara. Unaweza tuliza sehemu zilizoathirika kwa kuweka kitambaa kilicholoweshwa majini au hata barafu katika sehemu zilizoathirika.

Tumia sunscreen unapoenda nje kwenye jua. Tumia sabuni isiyo na harufu kali kuoga. Pia, badala ya kuoga kwa maji ya moto, tumia yale yaliyo na uvuguvugu. Tumia losheni baada ya kuoga. Usivae nguo wala kulalia malazi yaliyoundwa kwa vitambaa vinavyochochea kujikuna, kama vile sufu (wool).

Badala yake, tumia bidhaa zilizoundwa kwa kitambaa cha pamba, valia mavazi yasiyobana, kunywa maji kwa wingi na dumisha uzani ufaao.

Kuna aina ya krimu ambazo zaweza tumika kupunguza mwasho kama vile antihistamine au hydrocortisone.

You can share this post!

Ujanja wa kahaba wazimwa na mganga

Uingereza waadhibiwa vikali kwa utovu wa nidhamu wa...

F M