Anafuata ndoto zake licha ya kutengwa na mama yake tangu akiwa mtoto

Na SAMMY WAWERU

Baada ya kuwa chuoni kwa kipindi cha muda wa miaka minne mfululizo Faith Jeruto ana kila sababu ya kutabasamu.

Mwisho mwa juma lililopita, Jeruto ambaye amekuwa akisomea Shahada ya Masuala ya Uchoraji wa ramani ya barabara na nyumba katika Chuo Kikuu cha Kilimo na Teknolojia (JKUAT), alifanya mtihani wake wa mwisho kuhitimu kozi.

Kwa sasa anasubiri matokeo ya mtihani na hafla ya mahafali kufuzu ili kupokezwa cheti. Imekuwa safari ya milima na mabonde, kwa mwanadada huyu mwenye umri wa miaka 26.

Akiwa mwanambee, yaani kifungua mimba katika familia ya watoto sita, anasema kusoma masomo ya msingi na ya upili, ilikuwa kwa neema za Mwenyezi Mungu.

Ari ya kuafikia ndoto zake maishani hata hivyo iliendelea kumtia motisha kubukua vitabu, licha ya mahangaiko.

Mamake ni mwalimu wa shule ya msingi na ambaye ameajiriwa na tume ya kuwaajiri walimu nchini (TSC), ila anasema licha ya kuwa mwanawe mzawa, hajapata mapenzi ya mama kutoka kwake, kwa kile anataja kama “sielewi kwa nini anichukie bila sababu”.

Anafichua kwamba, watoto wanne wa kwanza, Faith akiwemo ni wa baba tofauti. Hata hivyo, hilo kwake si hoja “kwani ni mama mzazi na ninamheshimu na nitaendelea kumheshimu”.

Wawili wa mwisho ni wa baba mmoja, na ambaye anasema ni Mzee mwenye busara ambaye amejinyima mengi ili kuona kuwa anaafikia ndoto zake za kuwa saveya.

Kulingana na Faith, baada ya kufanya mtihani wa kitaifa kidato cha nne, KCSE, alipata ujauzito kufuatia uhusiano wake na barobaro anayemtaja alishinda na kumiliki moyo wake.

“Urafiki wetu ni wa tangu zamani tukiwa wadogo kiumri. Awali sikumpenda, lakini muda ulivyozidi kusonga mapenzi yake moyoni mwangu yalikua na ndivyo nilijipata kumuamini hatimaye nikaishia kuwa mama ya mvulana wake,” anaelezea.

Ni hatua ambayo nusra itishie kuzima ndoto zake, akikumbuka masaibu aliyopitia mikononi mwa ninake. “Nyakati zingine nilikuwa nafikiria kutoa ujauzito huo, japo kwa sababu mimi ni mcha Mungu, nikatupilia mbali wazo hilo,” anasimulia, akionekana kulijutia, laiti angalijua aliyebeba ni malaika.

Mvulana wake ambaye kwa sasa yuko chekechea, ni staa mcheshi, mwerevu, na anayemtia tabasamu anapokumbuka masaibu aliyopitia, jaribio la kubakwa na mmoja wa ‘baba zake’ likitonesha makovu ya kidonda cha mahangaiko akiwa kikembe.

Ni maovu anayosema aliyafichua akiwa na umri wa miaka 19, ila hakuambia mamake. Licha ya dhuluma na unyama huo, Faith anasema alimsamehe ‘babake’ huyo.

Alipojiung na JKUAT, haikuwa rahisi. “Mama aliweka wazi kuwa hatanisomesha tena, nichague kuoleka,” anadokeza.

Mwanadada huyu ambaye ni mkwasi wa ujasiri na mkakamavu, anasema alipata ufadhili kupitia wasamaria wema, michango na baadhi ya wanafamilia, na kila anapopiga Dua kwa Mola anamuomba kumbariki na kumpa maisha marefu nyanyake, mzawa wa mama, ambaye amesimama kidete naye.

“Mtihani wa mwisho chuoni, nyanya aliuza ng’ombe wake ili niruhusiwe kuufanya. Mungu akinijaalia nipate ajira, atakuwa miongoni mwa nitakaorejeshea mkono na kumpiga jeki,” anasema.

Faith anaiambia Taifa Leo kwamba amekuwa akitegemea vibarua vya hapa na pale kujiendeleza kimaisha, kukithi mwanawe riziki na mahitaji mengine muhimu ya kimsingi.

Aidha, anadokeza kwamba hufulia watu nguo (dobi), kushiriki vibarua vya ujenzi na nyakati zingine kupata vibarua vya kuchora ramani ya barabara na majengo.

Huku akisubiri kufuzu taaluma aliyosomea, Faith anasema muhimu kwa sasa ni kutafuta jukwaa kujiimarisha kimaisha aweze kujisimamia.

Anasema hachagui kazi muradi iwe ni halali na inayoridhisha Mwenyezi Mungu. “Sichagui ajira, iwe ya dobi, mijengo, kwenye hoteli…bora nipate riziki na kujiendeleza kimaisha pamoja na mtoto wangu,” aelezea.

Huku akionekana mwenye maono chungu nzima, matamanio yake yakiwa kuanzisha taasisi itakayonusuru watoto waliotengwa na jamaa zao, Elizabeth Mwangi, muuguzi mstaafu, mshauri wa masuala ya ndoa na pia Mwanasaikolojia, anahimiza msichana huyu kupata ushauri nasaha.

Bi Elizabeth anasisitiza haja ya kufarijiwa na kuhimizwa kufungua chapta nyingine ya maisha. “Ukweli ni kwamba kusahau matukio ya hujuma na dhuluma kama vile kubakwa na kupitia vita vya kijinsia katika ndoa si rahisi kusahau. Waathiriwa wanapaswa kukumbatiwa na kupata ushauri nasaha kuwasaidia kusahau waliyopitia,” mtaalamu huyo anasema.

Faith Jeruto anasema kilichomuwezesha kufikia aliko kwa sasa, ni imani kuu aliyo nayo kwa Mungu. “Kila ninapoamka alfajiri na mapema na kabla ya kulala, lazima nisali. Hakika ni kwa neema zake nimeweza kufika niliko,” anasema.

Anasema ni kwa muda tu awe miongoni mwa wanawake nguzo kuu nchini.

Aliyeshtakiwa kuuma mamake afunguka alikuwa anamchukia

Na JOSEPH WANGUI

Mwanamke aliyeshtakiwa kwa kumuua mama aliyemzaa na kumlea miaka mitano iliyopita alikiri kwamba alikuwa akimchukia mama huyo.

Mahakama ya Nyeri iliamua kwamba Njoki Gachinga, 33, anafaa kujitetea katika kesi aliyoshtakiwa kwa kumuua Esther Wangari Kanuri mama aliyemuasili na kumlea alipotupwa na mama yake mzazi.

Mwili wa Bi Kanuri ulipatikana nyumbani kwake Kahuyo, Nyeri, Februari 23 2014 ukiwa umefungiwa chumba cha kulala cha Njoki.

Inadaiwa kwamba Njoki alimshambulia mama yake mlezi kwa kisu na kumdunga zaidi ya mara kumi na tano shingoni, kifuani na tumboni kisha akauvuta mwili kutoka sebuleni na kuufungia chumba chake cha kulala na kutorokea mjini Nyeri.? Ingawa alikanusha kwamba alimuua mama yake mlezi, mahakama iliamua kwamba ana kesi ya kujibu.

Akijitetea, mwanamke huyo ambaye ni mama ya mtoto mmoja, alikiri kwamba alikuwa akimchukia mama yake mlezi. Aliambia mahakama kwamba alikuwa akimtesa alipogundua kwamba hakuwa mama yake mzazi.? Akijitetea mbele ya Jaji Abigail Mshila, Njoki alikiri kwamba alikuwa mtundu tangu akiwa shule ya upili alipokuwa akivuta bangi. Alisema alianza kumkaidi mama yake mlezi baada ya kumaliza shule ya msingi 2001.

Alikiri kwamba alikuwa akimchukia sana marehemu kwa sababu ambazo hakufichua lakini akasema hakuwa na ubaya naye.? Kulingana na upande wa mashtaka, Njoki alimuua mama yake mlezi walipogombana akimtaka abadilishe tabia. Inasemekana alikasirika marehemu alipomuuliza kwa nini hakuwa ameenda kazini mjini Nyeri.

Njoki aliungama kuwa japo marehemu alikuwa akimwambia arekebishe tabia hakufuata ushauri wake.

Alisema alikuwa mtundu na alikuwa akimsumbua marehemu kwa tabia yake ya kutumia dawa za kulevya.

Upande wa mashtaka ulisema kwamba hata akiwa shule ya upili, mshtakiwa alimwandikia barua baba yake mlezi Michael Kanuri kuomba msamaha kwa kumchukia marehemu.

“Kumbuka nilikuandikia arafa kukueleza nilikuwa nikimchukia mama. Ninatamani kumjua mama yangu mzazi,” inaeleza barua hiyo.? Mahakama iliambiwa kwamba siku mbili kabla ya siku anayodaiwa kumuua mama huyo, mshtakiwa alimweleza pasta wake, George Gichure Mwangi, kwamba angeua mtu.

“Sasa ninataka kuwa na pepo ninayojua kuliko malaika feki…wazazi wasio na shukrani…. Nitafanya maisha ya wazazi wangu kuwa jehanamu hapa duniani. Mapepo yaliyo ndani yangu yamekasirika na hayawezi kutulizwa.. nitaua yeyote atakayenikasirisha,” ulisema ujumbe aliomtumia pasta. Kesi itaendelea kusikilizwa Machi 27 2019.

MWANAMUME KAMILI: Heri upweke kuliko hadaa kama ilivyo katika ndoa za kidijitali

“Jamani mbona kuchukizana na kuhujumiana kama kwamba mmekwisha talikiana? Hivi ndivyo visa vinavyochukiza katika maisha ya wachumba na wapendanao. Mke anamwadhibu mumewe kwa kila njia. Mume vilevile. Heri upweke kuliko maisha hadaa kama ilivyo katika familia za leo”

Na DKT CHARLES OBENE

Kizazi cha leo hakithamini utu wala heshima. Si wanawake si wanaume. Hata wachumba wa leo wanatandikana makofi; wanapapurana, wanatibuana na kufokeana hadharani ilhali hawajawa wamoja!

Maharusi ndio kwanza mahasidi wanaolishana sumu! Vilivyotumainiwa kama vyumba vya mahaba vimegeuka nyanja za masumbwi kila uchao. Wanadamu si watu tena wanaoweza kushawishi wema.

Watajifunza nini kina yakhe ikiwa wangwana waliofunga ndoa za ajabu na waliofungua maisha katika fungate ndio kwanza wanaokwenda mahakamani kutamatisha mapenzi na kukoleza uadui?

Tufanyeje akina sisi tuliosubiri mwanga; tuliotumainia kunufaikia zenu akili ili nasi tujijenge na kukuza familia? Kama maharusi wa kanisani wanafumana mishale na kufedheheshana mahakamani seuze akina sisi tuliokutana kwenye mabaa tukapendana katika kumbi za densi?

Kila mara tunaposikia asili ya mizozo nyumbani tunasikitika na kufedheheka mno. La ajabu ni kwamba wanandoa au wachumba wa leo wanazozania vitu vya aibu mno. Si mavazi ya mke si chakula si simu si runinga si mashemeji si pesa si marafiki si wanaharamu.

Mbona wawili wasiweke mbele upendo kabla kuzozania mahitaji yao binafsi? Hili jambo la wanaharamu hunikeketa mno maini. Lau si ufidhuli na ujinga wa kitoto uliokita akilini mwa wanawake kwa wanaume wa leo, wachumba na wanandoa wasingalipigania malezi wa wanaharamu.

 

Kuchukia wanaharamu

Hakuna mtoto wa kitandani wala wa sakafuni.   Mwanamke au mwanamume kumbagua au kumchukia wanaharamu ndio msumari wa mwisho katika kaburi la mahaba. Hakuna mapenzi katika nyumba mlimojaa chuki na ubaguzi.

Waja kupatana hutegemea pakubwa uthabiti na ukomavu wa akili. Ndio maana wanawake kwa wanaume wa leo wanahimizwa kukomaa akili kabla kujitosa katika ukumbi wa mahaba.

Kufuata upepo wa mapenzi au kusukumwa na jazba za ujanani pasipo mtu kukomaa akili kumechangia pakubwa kuwepo wanandoa au wapendanao wanaochukiza kwa zao tabia za kitoto.

Nyumbani mlimojaa fujo na vita vya kila mara hakukaliki. Isitoshe, hakuwezi kukuza watoto katika maadili ya heshima, bidii na ukakamavu maishani. La ajabu ni kwamba baadhi ya familia za leo zipo katika njia hii panda.

Mke na mume hawasemezani kwa kuwa hakuna muamana baina yao.

Tuliweke wazi kwamba usununu na usumbufu wa baadhi ya wanandoa ndio mwanzo wa talaka. Uvumilivu unaweza vilevile kufika mfundani. Mwisho wa stahamala ni mambo kwenda segemnege!

 

Hakuna jazba

Haja gani kugeuka mahasidi wakati mmekwisha kuyavulia nguo na kukoga kwenye vidimbwi vyenu? Hakuna siri baina yenu. Hakuna jazba – watu kuwehuka – ambazo kuta hazijashuhudia. Isitoshe, kununiana siyo mwisho wa mahaba baina ya watu waliokwisha donana.

Jamani mbona kuchukizana na kuhujumiana kama kwamba mmekwisha talikiana? Hivi ndivyo visa vinavyochukiza katika maisha ya wachumba na wapendanao. Mke ana lazima kumwadhibu mume kwa kila njia.

Mume vilevile. Heri upweke kuliko maisha hadaa kama ilivyo katika familia za leo.

Kutofautiana baina ya mke na mumewe au baina ya wapendanao si tukizi maishani. Haya ni mambo yanayotokea kila mara na ambayo sharti tuyajulie kwa mapana. Hata hivyo, kuna vijimambo vya aibu vinavyochusha maisha ya wangwana binadamu wa leo.

Ubishani baina ya mke na mume ni sumu nyumbani. Si ajabu siku hizi kumwona mke akimwota mumewe dole puani na mume vilevile. Mwisho wa ugomvi huu ni mwanzo wa vita baridi vinavyoacha ukimya wa kaburi nyumbani.

 

Wakarimu nyumba ndogo!

Jamani wake kwa waume wa leo! Mtawezaje kununa nyumbani lakini mkawa wepesi wa ndimi tena wakarimu vilabuni au nyumba ndogo? Kama hasira,- basi na ziwe vivyo hivyo hata nje!

Angalau mjiepushe na kadhia zote kama kweli ni hasira! Mengineyo ni ujinga na utoto usiofaa muda kuujadili! Watu hawana budi kuwa watu wenye utu.

Vituko hivi tunavyoviona maishani ni ithibati ya jinsi binadamu walivyopungukiwa hekima na akili. Jukumu la watu wazima ni kutambua thamani ya uhusiano, hadhi ya familia na kujua vipi kusuluhisha vijimambo vya nyumba.

Wawili wanaopendana au wanaopendezana wanaweza kutofautiana wakazozana na mwishowe wakapatana na kuendeleza muamana pasipo haja kuvuana nguo hadharani au hata kufedheheshana mahakamani.

Maji ukiyavulia nguo huna budi kuyaoga! Hivyo ndivyo afanyavyo mwanamume na mwanamke kamili.

 

obene.amuku@gmail.com