Matumaini ya mwafaka kati ya Israeli na Palestina yafifia

Na MASHIRIKA

JERUSALEM, Israeli

JUHUDI za kutafuta mwafaka wa amani kati ya Israeli na Wapalestina zimegonga mwamba, licha ya viongozi katika sehemu mbalimbali duniani kuzirai pande hizo mbili kusitisha vita hivyo.

Kulikuwa na matumaini Jumanne kuwa pande hizo zingesitisha mashambulio, hasa baada ya Amerika kusema inaunga mkono mwafaka wa amani.

Hata hivyo, duru katika jeshi la Israeli zilisema hakuna “ajenda yoyote ya kusitisha mapigano hayo waliyowasilishiwa.”

Baadhi ya nchi kama Ufaransa, Misri na Jordan zimeliomba Baraza la Usalama la Umoja wa Mataifa (UNSC) kuchukua hatua za haraka kuhakikisha mapigano hayo yamesitishwa.

“Kuna juhudi za kichinichini zinazoendelea kuona ikiwa kuna mwafaka utakaofikiwa na kutangazwa hadharani wakati ufaao utakapowadia,” akasema Katibu wa Ikulu ya White House, Jen Psaki.

Wakati huo huo, viongozi wakuu wa kundi la Hamas nchini Qatar walisema kuwa “juhudi za kutafuta mwafaka wa kusitisha mapigano zinaendelea.”

Hata hivyo, waliilaumu Israeli kwa kuwa “sumbufu” kwa kutoa sharti kuwa lazima kundi hilo lisitishe mashambulio hayo kwanza ili itathmini ikiwa itachukua hatua kama hiyo.

Mark Regev, aliye mshauri wa Waziri Mkuu wa Israeli, Benjamin Netanyahu, alisema taifa hilo “linataka pawepo na mwafaka utakaoleta suluhisho la kudumu.”

Hilo linajiri huku ndege za kivita za Israeli zikiendelea kufanya mashambulio katika ukanda wa Gaza, Jumatano.

Kwenye mashambulio ya Jumatano, Wapalestina wanne waliuawa, miongoni mwao akiwemo mwanahabari.

Hakukuwa na ripoti zozote kuhusu majeruhi.

Kwenye shambulio jingine la awali, wanajeshi wa Israeli waliwaua Wapalestina wanne kwa kuwapiga risasi. Walikuwa wakishiriki kwenye maandamano katika maeneo ya West Bank na Mashariki mwa Jerusalem.

Hilo lilifikisha idadi ya Wapalestina waliouawa tangu mashambulio hayo kuanza kufikia 219. Miongoni mwa waliouawa ni watoto 63. Wapalestina zaidi ya 1,500 wamejeruhiwa.

Waisraeli 12 wameuawa, miongoni mwao wakiwemo watoto wawili. Waisraeli 300 wamepata majeraha.

Jumatano, mamia ya familia za Wapalestina zilianza harakati za kuwaokoa jamaa na bidhaa zao kutoka Jumba la Al-Andalus, jijini Gaza, baada kupata ripoti za kijasusi kwamba jumba hilo lingeshambuliwa na ndege za kivita za Israeli.

Hofu ilizuka baada ya moshi kuonekana ukitoka kwenye jengo hilo.

Kufikia sasa, zaidi ya shule 50 katika eneo la Gaza zimeharibiwa kutokana na msururu wa mashambulio yanayoendelezwa na ndege za Israeli, kulingana na shirika la kuwatetea watoto la Save the Children. Hali hiyo imewaathiri zaidi ya watoto 41,000.

Nchini Israeli, ni shule tatu pekee zilizoharibiwa kufuatia roketi zinazorushwa na makundi ya kigaidi kama Hamas.

Rais Biden sasa ataka Israeli isitishe mashambulio Gaza

Na MASHIRIKA

GAZA, Palestina

RAIS wa Amerika Joe Biden, Jumanne alieleza hisia zake kuhusu kusitishwa kwa mapigano baada ya siku nane za ghasia za kikatili kati ya jeshi la Israeli na wanamgambo wa Palestina mjini Gaza.

Biden aliambia Waziri Mkuu wa Israeli Benjamin Netanyahu kwamba Amerika inashirikiana na Misri na mataifa mengine kusitisha machafuko hiyo.

Hata hivyo, Amerika kwa mara nyingine ilizuia taarifa ya Baraza la Usalama la Umoja wa Mataifa, iliyoitisha kusitishwa kwa mapigano hayo.

Rais wa Amerika Joe Biden. Picha/ AFP

Ghasia hizo sasa zimeingia katika wiki yake ya pili bila dalili zozote za kusitishwa.

Israeli mapema Jumanne iliendeleza mashambulio yake ya angani dhidi ya Gaza.

Jeshi lake lilisema mamia ya roketi zilifyatuliwa katika eneo lake usiku kucha. Watu wasiopungua 212 wakiwemo wanawake na watoto 100 wameuawa Gaza, kulingana na wizara ya afya nchini humo.

Katika taifa la Israeli, watu 10 ikiwemo watoto wawili wameuawa kulingana na idara ya matibabu humo.

Israeli ilisema Jumanne kuwa wanamgambo wapatao 150 ni miongoni mwa waliouawa Gaza.

Kundi la Hamas, ambalo ni wanamgambo wa Palestina wanaotawala eneo hilo, huwa halitoi idadi ya wapiganaji waliojeruhiwa.

Kulingana na taarifa kutoka Ikulu ya White House mnamo Jumatatu, Biden “alihimiza Israeli kujitahidi kwa vyovyote vile kuhakikisha ulinzi wa raia wasio na hatia.”

“Viongozi hao wawili walijadili kuhusu maendeleo katika oparesheni za jeshi la Israeli dhidi ya Hamas na makundi mengine ya magaidi mjini Gaza. Biden alieleza kuunga mkono kusitishwa kwa mapigano na akajadili ushirikiano wa Amerika, Misri na mataifa mengine kuhusu suala hilo,” ilisema taarifa.

Viongozi wa dunia na mashirika ya kutoa msaada wa kibinadamu wameitisha mikakati ya kuzuia vifo vya wakazi na ghasia zinazosababishwa na uharibifu wa majengo na miundomsingi.

Amerika, ambayo ni mojawapo wa marafiki wakuu zaidi wa Israeli, kwa mara nyingine ilizuia juhudi za Baraza la Usalama la Umoja wa Mataiga kutoa taarifa ya kuitaka Israeli kusitisha mashambulizi yake, na badala yake ikasisitiza juhudi zake za kidiplomasia.

“Makisio yetu kwa wakati huu ni kwamba, kuwa na mazungumzo hayo faraghani…ndio mwelekeo mwafaka zaidi tunaoweza kuchukua,” Msemaji wa White House Jen Psaki alieleza wanahabari.

Baraza la Usalama la UN linatazamiwa kushiriki mkutano wake wa dharura kuhusu ghasia hizo Jumanne.

UN pia ilielezea wasiwasi wake kuhusu uharibifu wa miundomsingi katika eneo linaloandamwa tayari na ufukara la Ukanda wa Gaza.

400 wafa vita kati ya Israeli na Wapalestina vikichacha

Na AFP

VITA vikali kati ya Israel na Palestina viliendelea kuchacha jana kwa siku ya nne mfululizo huku Palestina wakirusha makombora kadhaa upande wa mahasimu kama njia ya kujibu mashambulizi yaliyoanza wiki hii.

Nchi hizo ziliingia vitani mnamo Jumatatu baada Israeli kuvamia msikiti eneo la mzozo la Gaza, Mashariki mwa Jerusalem. Msikiti huo una umuhimu kwa Waislamu huku pia ikitumiwa na Wayahudi kwa ibada takatifu.

Tangu Jumatatu, vifo 83 vimetokea eneo la Gaza ambalo hujumuisha raia wengi Wapalestina na unaongozwa na wapiganiaji wa Hamas. Watu wengine saba nao walifariki upande wa Israel.

Wizara ya Afya ya Gaza nayo ilithibitisha vifo hivyo na kufichua kuwa zaidi ya watu 400 wamejeruhiwa tangu mapigano hayo yazuke mnamo Jumatatu.

Uhasama kati ya Wapalestina na maafisa wa polisi tangu mwanzo wa mwezi mtukufu wa Ramadhan uliokamilika jana pia unadaiwa kuchochea mapigano hayo.

Hapo jana, vita hivyo vilikolezwa kutokana na kisa cha Jumatano ambao mwanaume wa Kiyahudi alivamiwa na mwengine Mwaarabu.

Baadaye umati wa Wayahudi ulimtoa mwanaume mwaarabu/kipalestina ndani ya gari lake kisha kumpa kichapo kikali.Waziri Mkuu wa Israel Benjamin Netanyahu akizungumza mnamo Jumatano jioni, aliapa kwamba atafanya juhudi zote kulinda Israel akishutumu Palestina kwa uchokozi usiofaa.

Mnamo Alhamisi, majeshi ya Israel (IDF) yalithibitisha kwamba makombora 1,500 yalikuwa yamerushwa kutoka Gaza yakilenga miji mikuu inayopatikana Israel.

Huku vita vikiendelea kuchacha kati ya nchi hizo jirani na hasimu, viongozi mbalimbali ulimwenguni wametoa wito kwa nchi hizo zikumbatie utulivu.

Rais wa Marekani Joe Biden ni kati ya viongozi ambao walishutumu ghasia hizo na kusema kwamba anaunga mkono upande wa Israel. “Nina matumaini kwamba ghasia hizo zitaisha. Hata hivyo, Israel ina kila haki ya kujilinda kutoka kwa maelfu ya kombora yanayorushwa kutoka upande wa Gaza,” akasema Rais Biden katika ikulu ya White House.

Katibu Mkuu wa Umoja wa Kimataifa Antonio Guterres alisema wamekutana kujadiliana kuhusu ghasia hizo lakini bado UN haijatoa taarifa rasmi kuhusu msimamo wake.

Wasiwasi wazuka baada ya makundi ya Mungiki, Gaza kuungana

Na TAIFA RIPOTA

TAHARUKI imezuka upya katika eneo la Kati kufuatia habari za kuungana kwa makundi ya uhalifu ya Gaza na Mungiki.

Kulingana na duru za usalama, vijana wanaoaminika kuwa wa kundi la Gaza sasa wako chini ya mmoja wa waliokuwa viongozi wakuu wa Mungiki.

Vijana wa kundi la Gaza, ambalo chimbuko lake ni mtaa wa Kayole jijini Nairobi, wanaripotiwa kupanua shughuli zao hadi mitaa mingine ya Nairobi, Kiambu, Nyeri na Murang’a ambapo wanaendesha shughuli za kukusanya ada haramu kutoka kwa wahudumu wa matatu na kutuma sehemu ya pesa hizo kwa mmoja wa waliokuwa waanzilishi wa Mungiki.

Naibu Kamishna wa Juja, Charles Mureithi aliambia mkutano wa usalama eneo hilo kuwa vijana hao kutoka Kayole, Murang’a, Githurai na Kahawa West pia wanaendesha shughuli ya kusajili wafuasi zaidi wakiwemo wasichana katika miji ya Juja na Githurai Kimbo.

“Tunafuatilia kwa makini shughuli za vijana hawa. Tunajua mienendo yao na hatutawavumilia. Tuna habari kuwa wanakusanya pesa na kuzituma kwa mmoja wa viongozi wa Mungiki,” akasema Bw Mureithi.

Kwa muda sasa kumekuwa na ripoti za kuchipuka upya kwa kundi la Mungiki lakini kuungana kwake na Gaza kumeonekana kuchukua mkondo hatari ikizingatiwa ukatili wa makundi hayo mawili dhidi ya wananchi wa kawaida.

Katika kaunti za Murang’a na Kiambu, wafuasi wa Mungiki wameanzisha upya tabia zilizokuwa zikitekelezwa na kundi hilo kabla ya kukabiliwa vikali na aliyekuwa Waziri wa Usalama wakati huo marehemu John Michuki.

Wasimamia huduma za matatu

Wafuasi hao wameanza kusimamia huduma za matatu ambapo wanakusanya ada za kila siku na pia kuamua wanaofaa kuhudumu maeneo fulani.

Kamishna wa Kaunti ya Murang’a, Mohammed Barre wiki iliyopita alikiri kuwa wafuasi wa Mungiki wamechukua udhibiti wa shughuli za matatu zinazohudumu maeneo ya Kaharati, Muthithi, Kigumo na Kangari.

Kundi hilo limeripotiwa kudai Sh4,000 kutoka kwa makanga, dereva Sh6,000 na mwenye matatu Sh40,000 kabla ya kuruhusiwa kubeba abiria eneo hilo.

Wakazi waliambia Taifa Leo kuwa watu kadha ambao wamekaidi masharti ya kundi hilo wameuawa ama kulazimika kuhama eneo hilo.