Starlets wapokelewa kibaridi JKIA licha ya ushindi

Na GEOFFREY ANENE

TIMU ya taifa ya soka ya wanawake ya Kenya imepata mapokezi baridi licha ya kupata ushindi muhimu wa mabao 3-0 dhidi ya wenyeji Zambia mjini Kitwe, Jumapili.

Hakuna kiongozi yeyote kutoka Shirikisho la Soka la Kenya (FKF) ama Wizara wa Michezo alikuwa katika uwanja wa ndege wa kimataifa wa Jomo Kenyatta jijini Nairobi kupokea timu hiyo.

Hata hivyo, kikosi kizima cha Starlets wakiwemo makocha David Ouma na Richard Kanyi wamesema walijifunza mengi kutoka ziara ya Zambia na pia kupata motisha kubwa kabla ya kuanza kampeni ya kufuzu kushiriki Kombe la Afrika (AWCON) la mwaka 2018 nchini Ghana.

Katika mahojiano, Kanyi amesema, “Ushindi dhidi ya Zambia umetupa motisha kubwa. Pia umetusaidia kuona idara ambazo tuna nguvu ama ulegevu. Kurejea kwa Ouma kwenye benchi la kiufundi pia ni motisha kubwa tunapolenga kuwania tiketi ya kushiriki Kombe la Afrika kwa mara ya pili mfululizo. Mchuano huu pia umetuonyesha kwamba mshikamano unaendelea kuwa mzuri kikosini. Nimefurahishwa sana jinsi wachezaji watano wapya tuliowajumuisha walishirikiana vyema na wale wazoefu.”

Aidha, amesema kwamba anatumai mvamizi matata Esse Akida, ambaye alikosa mchuano wa Zambia kwa sababu ya anauguza jeraha, atakuwa amepona kabla ya Kenya kualika Uganda hapo Aprili 4.

“Licha ya kuwa tumekuwa tukipiga Uganda, tutachukulia mechi hiyo kwa uzito mkubwa kwa sababu hakuna timu ndogo siku hizi barani Afrika,” ameongeza na kumsifu Corazone Aquino, ambaye alipachika mabao mawili dhidi ya Zambia. “Kuwepo kwa Aquino kutoka kikosi cha wachezaji wasiozidi umri wa miaka 20 ni motisha kubwa. Ana nguvu na pia kasi nzuri,” amesema.

Ouma, ambaye aliongoza Starlets katika Kombe la Afrika mwaka 2016 nchini Cameroon, amefurahia kurejea kikosini baada ya kuwa nje muda mrefu.

Ameongeza, “Nimefurahishwa na mshikamano kati ya wachezaji wazoefu na wale wapya. Matokeo haya yameniridhisha.”

“Pia nafurahia kazi ambayo FKF imekuwa ikifanya kuhakikisha timu zote za taifa zinapiga mechi wakati wa kipindi cha mechi za kimataifa.

“Soka ya wanawake imeimarika. Naamini Uganda haijakuwa ikilala kwa hivyo tutatafuta kuzoa ushindi Uganda itakapozuru Kenya,” amesema.

Aquino amesema Starlets imejiandaa vyema tayari kukabiliana na Uganda. Mshambuliaji matata Mwanahalima Adam alitangulia kutikisa nyavu za Zambia katika kipindi cha kwanza kabla ya Aquino kuongeza mabao mawili katika kipindi cha pili.

Mshindi kati ya Kenya na Uganda baada ya mechi ya marudiano mnamo Aprili 8 atamenyana na mabingwa wa zamani Equatorial Guinea katika raundi ya pili. Mshindi wa raundi ya pili atafuzu kushiriki Kombe la Afrika nchini Ghana.

Kizaazaa Miguna kuzuiwa JKIA akitoka Canada

Na WANDERI KAMAU

KIZAAZAA kilizuka Jumatatu katika Uwanja wa Kitaifa wa Ndege wa Jomo Kenyatta (JKIA) baada ya maafisa wa Idara ya Uhamiaji kumzuilia wakili Miguna Miguna aliyewasili nchini.

Bw Miguna aliwasili katika uwanja huo mwendo wa saa nane mchana kama alivyopangiwa, ila hakuruhusiwa kuondoka mara moja, “hadi pale angetimiza kanuni fulani.”

Muda mfupi baada ya kufika, maafisa hao walimtaka Bw Miguna kutia saini stakabadhi fulani na kusalimisha paspoti yake ya nchi ya Canada, ila mawakili wake walisema walimwonya dhidi ya kufanya hivyo.

Kulingana na wakili wake, Nelson Havi, huo ni mpango wa serikali kumpa visa ya muda ili kumfanya kuupoteza uraia wake baada ya miezi sita.

“Tumemwagiza mteja wetu dhidi ya kutia saini stakabadhi zozote, kwani njama iliyopo ni ya kumpa stakabadhi ya muda, ili kumnyang’anya uraia wa Kenya, ili serikali imrejeshe Canada tena baada ya kipindi cha miezi sita kuisha,” akasema Bw Havi.

Na hadi tukienda mitamboni, Bw Miguna alikiuwa angali anazuiliwa katika uwanja huo.

Bw Miguna alirudishwa ghafla nchini Canada mwezi uliopita, baada ya kuzuiliwa kwa siku tano na polisi kwa kumlisha kiapo kinara wa Nasa Raila Odinga kama ‘Rais wa Wananchi’ mnamo Januari 30.

Tangu kurejeshwa nchini humo, amekuwa akihutubia vikao katika miji mbalimbali katika nchi za Amerika na Canada, ambako amekuwa akiilaumu serikali ya Jubilee kwa ‘kumhangaisha’ bila sababu.

Bw Miguna pia amekosoa vikali muafaka wa kisiasa kati ya Bw Odinga na Rais Uhuru Kenyatta, akiutaja kutokuwa suluhisho kwa changamoto zinazoikabili nchi.

Aidha, alimlaumu Bw Odinga kwa “kuwasaliti” wafuasi wake kwa hatua yake kukubali kuingia katika muafaka huo.

 

Timu ya Riadha ya Kenya yapokelewa kishujaa JKIA

Na GEOFFREY ANENE

TIMU ya riadha ya Kenya Jumatatu imepokelewa kishujaa kutoka nchini Algeria ambako ilishinda ubingwa wa Afrika baada ya kuzoa medali tatu za dhahabu, nne za fedha na moja ya shaba kwenye Mbio za Nyika za Afrika za mwaka 2018.

Mabingwa wa mbio za nyika za Afrika, Kenya, wakaribishwa kwa nyimbo na densi uwanjani JKIA Machi 19, 2018. Picha/ Geoffrey Anene

Vijana hao kocha John Kimetto walitumbuizwa kwa nyimbo za kitamaduni walipowasili katika uwanja wa ndege wa kimataifa wa Jomo Kenyatta jijini Nairobi kabla ya kuelekea katika hoteli ya kifahari ya Weston kwa chakula cha mchana baada ya mahojiano na wanahabari.

Timu nzima ikiongozwa na Kimetto ilimshukuru Mungu kwa kuiwezesha kutwaa ubingwa. Kimetto alisema ameridhishwa na matokeo ya wanariadha wake.

Kutoka kushoto: Kocha John Kimetto, Naibu wa meneja wa timu Duncan Ogare, bingwa wa zamani wa marathon duniani Catherine Ndereba na Celliphine Chespol wakipiga picha katika uwanja wa ndege wa JKIA. Picha/ Geoffrey Anene

“Nafurahi tulipigania kila medali katika vitengo vyote. Ingawa tulilenga kuzoa medali zote, nimeridhika na kazi yetu hasa kwa sababu sehemu ya mashindano ilikuwa telezi sana,” alisema.

“Wakimbiaji wangu walifuata maagizo yangu. Hata (Celliphine) Chespol, ambaye alianza kusherekea mapema kabla ya kugundua hajakamilisha mzunguko mmoja, alisikia maagizo na akajikaza na kuibuka mshindi,” alifichua.

Mabingwa wa mbio za nyika za Afrika, Kenya, wakaribishwa kwa nyimbo na densi uwanjani JKIA Machi 19, 2018. Picha/ Geoffrey Anene

Shirikisho la Riadha nchini (AK) pia limefurahishwa na matokeo haya.

Rais wa AK Jackson Tuwei ameambia wanahabari kwamba, “Timu ilipata matokeo ya kupendeza sana. Licha ya kupoteza taji la binafsi katika mbio za kilomita sita za wanawake, nafurahi tulishinda taji la timu katika kitengo hiki baada ya muda mrefu sana.”

Kenya ilizoa medali tatu za dhahabu kupitia Celliphine Chespol (kilomita 10 wanawake), Alfred Barkach (kilomita 10 wanaume) na Ronex Kipruto (kilomita nane wanaume).

Ilishinda nishani za fedha kupitia Margaret Chelimo (kilomita 10 wanawake), Julius Kogo (kilomita 10 wanaume) na Stanley Waithaka (kilomita nane wanawaume) na pia timu ya mbio za mseto za kupokezana vijiti. Hellen Ekalale alishindia Kenya medali ya shaba katika mbio za kilomita sita wanawake.

Mabingwa wa mbio za nyika za Afrika, Kenya, wakaribishwa kwa nyimbo na densi uwanjani JKIA Machi 19, 2018. Picha/ Geoffrey Anene

Mbali na mataji hayo ya binafsi, Kenya pia ilishinda mataji ya timu katika vitengo vinne.

Tuwei alionya kwamba Kenya inastahili kuweka mikakati bora kuhakikisha inasalia miamba wa mbio za nyika baada ya kushuhudia ushindani mkali ukitoka kwa Waganda Jumamosi iliyopita.

Aidha, Tuwei amefichua kwamba wanamedali Chespol, Barkach, Kipruto, Waithaka, Chelimo, Kogo na Ekalale watajumuishwa katika timu itakayopeperusha bendera ya Kenya katika mashindano ya Jumuiya ya Madola nchini Australia mwezi Aprili.

“Tutanataka pia kuwaona mkihudhuria mbio za uwanjani tutakapochagua kikosi kitakachowakilisha Kenya katika Riadha za Dunia za Under-20 zitakazofanyika nchini Finland mnamo Julai 10-15 2018.

Uwanja wa JKIA watambuliwa kwa ubora Afrika

Na BERNARDINE MUTANU

UWANJA wa Ndege wa Kimataifa wa Jomo Kenyatta (JKIA) uliorodheshwa kama uliofanya vyema zaidi katika bara la Afrika.

Kulingana na utafiti uliofanywa na Baraza la Viwanja vya Ndege (ACI), shirikisho la viwanja vya ndege ulimwenguni, JKIA ndio uwanja ulioimarika zaidi katika eneo hili.

JKIA iliorodheshwa katika kwa kiwango hicho kutokana na huduma kwa wateja kutokana na maoni yao.

Kulingana na Mamlaka ya Kusimamia Viwanja vya Ndege (KAA) hiyo ilikuwa ishara njema wakati ambapo uwanja huo unazidi kufanyiwa marekebisho.

“Kutambuliwa kwetu kunaonyesha kuwa mikakati ambayo imewekwa kuimarisha huduma inazaa matunda. Ninaamini kuwa tuko kwa njia sambamba,” alisema mwenyekiti wa KAA, Jonny Anderson katika taarifa.

Mtanzania anaswa JKIA akiwa na dhahabu ya Sh100 milioni

Na BERNARDINE MUTANU

SHIRIKA la Kukusanya Ushuru nchini (KRA) Jumatano limenasa dhahabu ya thamani ya Sh100 milioni katika Uwanja wa Ndege wa Jomo Kenyatta (JKIA), jijini Nairobi.

Dhahabu hiyo ilisemekana kubebwa na raia mmoja wa Tanzania na ilipatikana na maafisa wa forodhani kwa ushirikiano na maafisa wa usalama katika uwanja huo.

Dhahabu hiyo ya gramu 32,255.50 ilipatikana pamoja na hati ya malipo ya Sh100 milioni.

Mshukiwa huyo alikamatwa baada ya maafisa wa polisi kudokezewa na umma kulingana na taarifa ya KRA Jumatano.

Kulingana na shirika hilo, kusafirishwa kwa dhahabu hiyo kulikuwa kinyume cha sheria ya kusimamia forodha katika Jumuiya ya Afrika Mashariki.

Dhahabu hiyo imezuiliwa na KRA, huku uchunguzi zaidi kuhusiana na suala hilo ukianzishwa.

Miguna Miguna: Nilivyokula samaki ‘kwa macho’ katika kituo cha polisi

Wakili mbishi aliyefurushwa humu nchini Dkt Miguna Miguna. Ameapa kurudi Kenya ‘haraka iwezekanavyo’. Picha/ Maktaba

Na LEONARD ONYANGO

Kwa Muhtasari:

  • Dkt Miguna asema aliletewa ugali, samaki na mboga lakini akalazimishwa kuingia katika gari la polisi kabla ya kuanza kula
  • Alizuiliwa kwa zaidi ya siku tano katika vituo mbalimbali vya polisi
  • “Nilisikia polisi niliokuwa nao ndani ya gari wakijigamba namna walivyofanikiwa kuwachezea shere wanahabari”
  • Aliketi ndani ya gari kwa zaidi ya saa tano na baadaye polisi walitokea na tiketi ya ndege na stakabadhi zilizoonyesha alikuwa mhamiaji haramu

MWANAHARAKATI wa NASA Miguna Miguna amevunja ukimya kuhusu mateso aliyopitia mikononi mwa polisi huku akielezea alivyokula samaki ‘kwa macho’ katika Kituo cha Polisi cha Inland Container Depot, Barabara ya Mombasa, Nairobi.

Kupitia mtandao wa Facebook, Dkt Miguna alisema aliletewa ugali, samaki na mboga ya kienyeji kwa ajili ya chakula cha jioni lakini akalazimishwa kuingia katika gari la polisi na kuelekea katika uwanja wa ndege wa JKIA kabla ya kuanza kula.

“Nilipokuwa nakijiandaa kula mlo wa samaki, ugali na mboga za kienyeji nilioletewa na msimamizi wa kituo (OCS) muungwana, maafisa wa polisi wakatili walijitokeza na kuniambia “tunaondoka sasa”. Huo ndio ulikuwa mlo wangu wa siku lakini niliacha na kuondoka,”| akasema Dkt Miguna.

 

Siku tano ndani

Dkt Miguna aliyekamatwa mnamo Februari 2, kwa kumwapisha kinara wa NASA Raila Odinga kuwa ‘rais wa wananchi’, alizuiliwa kwa zaidi ya siku tano katika vituo mbalimbali vya polisi jijini Nairobi na Kaunti ya Kiambu kabla ya kusafirishwa nchini Canada kutokana na kigezo kwamba si Mkenya.

“Nilipoingia ndani ya gari, dereva aliendesha kwa kasi  kutoka katika Kituo cha Polisi cha Inland Container Depot na dakika 25 baadaye tulikuwa katika Uwanja wa Ndege wa Jomo Kenyatta (JKIA),” akasema.

Dkt Miguna alikuwa amezuiliwa katika kituo cha polisi Inland Container Depot kabla ya kupelekwa katika Mahakama ya Kajiado kufunguliwa mashtaka ya kushiriki katika uhaini.

Baada ya kusomewa mashtaka katika mahakama ya Kajiado alirejeshwa tena katika kituo hicho huku kinara wa NASA Raila Odinga na wafuasi wake wakimngojea katika Mahakama ya Milimani Nairobi hadi saa tatu usiku.

Mara baada ya kukamatwa, Dkt Miguna alipelekwa katika Kituo cha Polisi cha Githunguri  na baadaye akahamishiwa kwenye kituo cha Lari katika Kaunti ya Kiambu.

Huu ndio msururu wa matukio kwa mujibu wa Dkt Miguna:

  • Februari 2 saa 5a.m, maafisa 35 wa polisi wavamia nyumbani kwa Miguna na kulipua lango kuu na mlango wa choo kwa kilipuzi.
  • Polisi wanampokonya Miguna simu na kutishia kumfunga macho kwa kitambaa na kisha kumpeleka katika Kituo cha Polisi cha Githunguri
  • Saa 5pm mawakili wake Edwin Sifuna, Waikwa Wanyoike na Willis Otieno wanaenda katika Kituo cha Polisi cha Githunguri
  • Usiku wa manane  polisi wakamtoa Bw Miguna katika Kituo cha Githunguri na kumpeleka katika Kituo cha Polisi cha Lari. “Kituoni Lari nilisimama seli kwa muda wa saa 24 bila kulala wala kuketi”

 

  • Februari 5 mchana: Polisi wanawasili na kumuagiza kuingia ndani ya gari. Magari matatu yanawafuata. Polisi wanafanikiwa kuwachanganya wanahabari na wafuasi wa NASA ambao walifuatilia gari tofauti. “Nilisikia polisi niliokuwa nao ndani ya gari wakijigamba namna walivyofanikiwa kuwachezea shere wanahabari.
  • Gari alilokuwemo Miguna linafululiza hadi katika Kituo cha Depot Police katika eneo la Embakasi Mashariki. “Kituoni hapa kwa mara ya kwanza napewa chakula kizuri, maji safi ya kuoga, mswaki na blanketi mbili zilizochakaa”.

 

  • Februari 6 asubuhi: maafisa wa polisi 15 wenye miraba minne wanawasili na kumwagiza  kuingia kwenye gari waliendesha gari hadi katika kituo cha mafuta katika eneo la Athi River na baadaye wakaendesha kwa kasi katika Barabara ya Kajiado.
  • Hatimaye alijipata katika mahakama ya Kajiado.
  • Nilipelekwa mbele ya hakimu ambaye aliagiza nipelekwe katika Mahakama ya Milimani Nairobi kabla ya saa tisa unusu mchana.
  • Badala ya kumpeleka katika Mahakama ya Milimani, polisi walimrejesha katika kituo cha Container Depot.
  • Hata hivyo, walipofika kituoni walimfungia ndani ya gari kwa takribani saa tano na kumpokonya paspoti yake ya Kenya.
  • Baadaye walimtoa nje ya gari na kumtaka kwenda kando kuzungumza. Kabla ya kuzungumza aliomba ruhusa ya kwenda chooni. “Walikubali niende chooni ila wakanipa maafisa watano wa kunisindikiza”.
  • Alipotoka chooni alizungukwa na maafisa 10 ambao walianza kumpekua mifukoni ambapo walipata paspoti yake ya Canada.
  • Takribani saa moja baadaye, aliletewa mlo lakini kabla ya kuanza kula, aliingizwa ndani ya gari na kupelekwa kwa kasi katika uwanja wa ndege wa JKIA.
  • Aliketi ndani ya gari kwa zaidi ya saa tano na baadaye polisi walitokea na tiketi ya ndege na kumkabidhi simu yake iliyokuwa imeharibika pamoja na stakabadhi zilizoonyesha kwamba alikuwa mhamiaji haramu asiyetakiwa.
  • Miguna asafiri kuelekea Canada.