Kanisa la Glory OutReach Assembly lazingatia kuhubiri amani

Na LAWRENCE ONGARO

KANISA la Glory OutReach Assembly lililoko Kahawa Wendani limejitolea kuendeleza na kudumisha amani kote nchini kwa kuleta jamii zote pamoja.

Mchungaji wa kanisa hilo Bi Joyce Njeri alisema kanisa hilo kwa siku za hivi karibuni limezuru maeneo yaliyokosa amani ili kuhubiri amani na kuwapa wakazi chakula cha kiroho.

Baadhi ya maeneo ambayo wamezuru ili kuhubiri amani ni Turkana, Pokot na maeneo kavu yanayohitaji mahubiri thabiti.

Bi Njeri ambaye ni mtaalam wa kisaikolojia huku pia akihubiri alisema kipindi hiki cha corona walimekuwa na shughuli nyingi za kuhubiria watu na kuwapa matumaini.

“Tulipata ya kwamba kwa muda huo mrefu ambapo janga la corona lilivamia taifa, familia nyingi zilisambaratika na hata migogoro ilizidi nyumbani. Mimi kama mtaalam wa kiakili nimefaulu kuwapa matumaini makubwa watu wa familia nyingi,” alisema Bi Njeri.

Alisema licha ya waumini wengi kufika makanisani, kuna haja zaidi ya kuwapa ushauri wa jinsi ya kukabiliana na hali ya kimaisha.

Mwishoni mwa wiki kanisa hilo liliadhimisha miaka 30 kwa kuhubiri amani katika jamii huku wakitaka pia madhehebu mengine yawe na mwelekeo huo kote nchini.

Alisema wakati huu taifa linapokaribia uchaguzi mkuu 2022 wachungaji wana jukumu la kuhubiri amani katika maeneo ya ibada kote nchini.

“Iwapo Wakenya kwa jumla watazingatia amani bila kusukumwa na mawimbi ya siasa, bila shaka ifikapo mwaka wa 2022 watakuwa na uchaguzi wa amani usio na chuki na uhasama wa kikabila,” alisema Bi Njeri.

Muumini mmoja wa kanisa hilo Sebazungu Theophile aliye raia wa Rwanda alitoa mwito kwa Wakenya wawe makini na wazingatie amani zaidi.

“Mimi baada ya machafuko ya Rwanda mwaka wa 1994 nilipata shida kubwa wakati wazazi wangu wote waliuawa kinyama mbele yangu. Ilibidi nipate usaidizi kupitia shirika moja lisilo la kiserikali,” alifafanua Theophile.

Naye Bw Mwai Muchiri mkazi wa Githurai 45, ambaye ni mshiriki katika kanisa hilo alisema baada ya kupata ushauri kupitia mchungaji Njeri amerejea maisha yake ya kawaida baada ya kukumbwa na masaibu ya kimaisha chungu nzima.

Kioja waumini wakivunja makufuli sita kanisani

Na RUSHDIE OUDIA

KISANGA kilizuka Jumapili asubuhi katika kanisa moja mjini Yala, Kaunti ya Siaya, baada ya kundi la waumini waliojawa na ghadhabu kuvunja kufuli ili waweze kuingia katika nyumba ya Mungu.

Kanisa hilo lilidaiwa kufungwa na viongozi wa kidini wiki mbili zilizopita kufuatia mzozo kuhusu uongozi. Katika mkondo usiotarajiwa, kufikia saa kumi na mbili unusu asubuhi, waumini walikuwa wamekusanyika nje ya kanisa hilo wakiwa na silaha mbalimbali zikiwemo msumeno na vyuma ambavyo kwa kawaida hutumiwa kuchimba mawe, wakiwa tayari kuingia ndani ya kanisa hilo kwa nguvu.

Kufikia saa mbili asubuhi, walikuwa wamevunja kufuli lililokuwa kwenye lango, kisha wakang’oa makufuli matatu yaliyokuwa kwenye lango kuu la kanisa hilo na baadaye wakavunja makufuli mengine mawili ili waweze kuingia.

Huku wakiendelea na shughuli za kuvunja makufuli hayo, waimbaji wa kwaya walikuwa wakiimba nyimbo za kuvutia wakiwashangilia na walipoingia hatimaye, wakapangusa viti, wakafungua madirisha na kuendelea na ibada kama kawaida huku watu wengine wakizidi kufurika ndani ya kanisa hilo.

Kulingana Naibu Mwenyekiti wa kundi la waumini wa kawaida wasio viongozi, Bw Odongo Onyango, waumini wamepokonywa kanisa hilo kinyume na utaratibu unaofaa.

Bw Onyango alimshutumu Mzee wa Kanisa hilo, Edward Otieno Onyango na Mwinjilisti Judith Magudha dhidi ya kuwafungia nje ya kanisa mnamo Januari 5.

Kisha mnamo Januari 12, wakiwa na kibali kutoka kwa Askofu wa Dayosisi hiyo, viongozi wa kanisa hilo waliongeza kufuli jingine kwa waliyokuwa wameweka awali na kuwafungia kabisa Wakristo hao nje ya kanisa, jinsi walivyokiri mbele ya Kamanda wa Polisi katika Kituo cha Polisi cha Yala.

“Hatujui ni kwa nini kwa sababu hatukushirikishwa na kulingana na katiba kanisa ni la waumini,” alisema Bw Onyango.

Alisema kwamba kutokana na uamuzi huo, Askofu wa Dayosisi hiyo na kundi lake wamekiuka haki zao na uhuru wa kikatiba wa kukusanyika na kuabudu.

Na baada ya kukaa wiki mbili nyikani, Wakristo hao waliamua kuchukua sheria mikononi mwao na kuwanyorosha wale wanaowashutumu dhidi ya kukiuka haki zao kwa kuwanyima fursa ya kufanya ibada.

Makanisa sasa yazoea hali ya waumini kuombea nyumbani

NA SAMMY WAWERU

Wiki ya pili, makanisa kote nchini yamesalia kufungwa kufuatia agizo la serikali ili kusaidia kudhibiti maenezi ya Covid – 19.

Mwezi uliopita, Machi 22, Waziri wa Afya Mutahi Kagwe aliamuru maeneo yote ya kuabudu kufungwa, kwa kile alitaja kama “kuzuia watu kukongamana”.

Ili kuzuia usambaaji zaidi wa virusi hatari vya corona, serikali pia iliagiza mabaa, maeneo yote ya burudani kufungwa, ikiwa ni pamoja na kupiga marufuku hafla za harusi kwa muda, huku mazishi yakitakiwa kufanywa kwa muda mfupi iwezekanavyo na kuhudhuriwa na watu wachache mno.

Awali licha ya baadhi ya maeneo ya kuabudu kukaidi amri hiyo, kwenye uchunguzi wa Taifa Leo Dijitali makanisa sasa yameonekana kuitii.

Mnamo Jumapili, makanisa tuliyozuru mitaa kadhaa kaunti ya Nairobi na Kiambu, milango ilisalia kufungwa, kinyume na ilivyokuwa awali kabla visa vya maambukizi ya Covid – 19 kuripotiwa kuongezeka nchini.

Kufikia sasa, Kenya imethibitisha zaidi ya watu 170 walioambukizwa corona, huku sita wakifariki kutokana na virusi hivyo hatari.

Sawa na makanisa mengine, African Inland Church, AIC, tawi la Zimmerman, milango yake ilisalia kufungwa.

Milango ya Glory Realm International Ministries maarufu kama Kings Domain, kanisa lililoko pembezoni mwa Thika Super Highway, Clayworks Kasarani, pia lilifungwa.

Aidha, kwenye mlango wa kanisa hilo, ujumbe umechapishwa, ukiarifu: “Kufuatia amri ya serikali, kanisa limesalia kufungwa hadi serikali itakapotoa mwelekeo”.

Kibango hicho pia kimeeleza ibada inavyoendeshwa. “Ungana nasi kupitia mtandao wa Facebook na You Tube, kila Jumanne na Jumapili, tukipeperusha moja kwa moja ibada,” ujumbe huo unaarifu.

Makanisa kadhaa yamegeukia na kukumbatia mitandao ya kijamii, wahubiri na washirika wachache wakiendesha ibada; mahubiri yanayoandamana na nyimbo, yanayopeperushwa kupitia Facebook Live.

Isitoshe, nambari ya kutoa sadaka na fungu la kumi, pia inachapishwa, kwa wanaoyafuatilia. “Mhubiri wetu akimaliza kutulisha chakula cha kiroho, anatuhimiza tutoe sadaka na fungu la kumi,” akasema mshirika wa kanisa la PEFA, tawi la Kimbo Ruiru.

Mengine yanatumia vyombo vya habari, kama vile runinga na redio, kupeperusha mawimbi ya mahubiri yake moja kwa moja.

Hata hivyo, kuna baadhi wanakosoa amri ya serikali kufunga makanisa. Duncan Ndegwa Bull kwenye chapisho lake katika Facebook, “Makanisa yafunguliwe” , ameeleza kushangazwa kwake na amri hiyo, huku matatu, maduka hasa ya kijumla, na benki, yote yakiruhusiwa kuhudumu licha ya idadi kuu ya wateja wanaopokewa.

“Ni sahihi kwa watu 40 kukusanyika kwenye basi inayosafiri Mombasa hadi Kisumu, lakini ni hatia kwa watu 10 kukusanyika kanisani kuomba. Ni sawa watu 50 kuwa kwenye duka la kijumla wakinunua bidhaa ila si kanisani wakilishwa chakula cha kiroho.

“Ni sawa kwa watu 100 kuwa kwenye benki kuanzia asubuhi mpaka alasiri, lakini si mkusanyiko wa watu 10 kanisani. Kuna uhalisia upi hapo?” ameshangaa. Ndegwa ameendelea kueleza, akitoa mfano wa kanisa analohudhuria akitaja lina takriban washirika 300, kabla ya amri ya serikali liliendesha ibada ya watu wasiozidi 30, kwa makundi kila saa moja na kuzingatia umbali wa mita mbili baina ya mtu na mwingine.

“Wote walirejea makwao wakiwa wamefurahi kwa takaso la chakula cha kiroho. Kwa nini utaratibu huo usitekelezwe, kila kanisa lipewe idadi? Kufunga makanisa si suluhu ila ni kubuni shida kubwa kuliko janga la Covid – 19. Makanisa yafunguliwe,” Ndegwa anaeleza.

Kuna wanaopinga pendekezo hilo, James Mutindi, akihoji kanisa ni roho ya mtu binafsi ila si jengo. “Sikubaliani na pendekezo la aina hiyo, tuoneshe washirika kuwa Mungu yu hai ndani yao, ila si kwenye makanisa,” Mutindi akachangia.

“Ni kina nani watahudhuria na ni kina nani watakosa, ili kuzingatia umbali baina? Inaonekana Wakenya hawajaona athari za huu ugonjwa. Wasiofuata amri na maagizo ya serikali watakuja kujuta siku moja,” Salome Gitonga Wa Phq ameonya.

Serikali imeshikilia haiturusu watu kukongamana kwa vyovyote vile, ikisema virusi hatari vya corona sasa vinasambaa miongoni mwa watu, ndani kwa ndani hapa nchini. Mataifa ya Marekani, Italia, na Uhispania, yameonekana kulemewa na janga la Covid – 19, kutokana na takwimu za waliofariki kupitia ugonjwa huo na maambukizi zaidi.

Corona yapangua ibada, sadaka kutolewa kwa kutumia M-Pesa

Na FAITH NYAMAI

KWA mara ya kwanza katika historia ya Kenya, makanisa mengi yamesitisha ibada zao za Jumapili kote nchini na kuwaruhusu waumini kufuatilia ibada zao mitandaoni.

Haya yanajiri huku Kenya ikiweka mikakati kabambe ya kudhibiti kusambaa kwa virusi vya corona ambavyo vimetangazwa kama janga la kimataifa.

Makanisa, badala yake, yameagiza wafuasi wake kukaa nyumbani na kuwataka kulipa zaka na sadaka zao pamoja na matoleo mengine kupitia M-Pesa na huduma nyinginezo za malipo kielektroniki.

Wale ambao hawajasitisha ibada zao wamegeukia kunyunyizia majengo ya makanisa yao dawa ya kuua bakteria na virusi.

Wengine wameahidi kutumia sabuni za kusafisha mikono, jeli na dawa za kuua viini kwenye mikono ili kuzuia kuenea kwa virusi hivyo miongoni mwa wafuasi wake.

Wahubiri wa Kanisa la Redeemed Christian Church of God Solution Centre Prince na Esther Obasike waliwaagiza wanachama wao kufuatilia ibada zao mtandaoni na kutoa nambari ya Paybill kwa wafuasi wao kulipa sadaka na zaka kupitia M-Pesa na huduma za mitandaoni.

Kanisa la Anglikana Kenya(ACK) pia limesitisha ibada zake zote za Jumapili kwa siku 30 zijazo kuambatana na amri ya kuzuia kusambaa kwa virusi vya corona.

Kanisa hilo lilitangaza kwamba askofu Jackson Ole Sapit atakuwa akiongoza ibada maalum zitakazotangazwa Jumapili saa mbili asubuhi na Jumatano jioni.

Kanisa la Presbyterian Church of East Africa (PCEA) pia limesitisha ibada zake za Jumapili na shughuli nyinginezo za kanisa kwa siku 21 zijazo kulingana na Katibu Mkuu wa PCEA, Mhubiri Peter Kaniah.

Kongamano la Maaskofu Wakatoliki Kenya lilisema misa zitaendelea katika makanisa yake yote lakini likasema limeweka mikakati ya kuhakikisha viwango vya juu vya usafi na umbali wa kutangamana kijamii wa mita moja vimezingatiwa.

Makanisa mengine ambayo yamesitisha ibada zake za Jumapili ni pamoja na Christ is The Answer Ministries (CITAM), Nairobi Gospel, City Church, Kenya Assemblies of God na mengineyo.

Katibu wa Kanisa la Africa Inland Church Kenya (AIC) Pasta John Kitala kupitia notisi kwa makanisa yake yote nchini, alisitisha mikutano yote ya ushirika na shughuli katikati ya wiki na kuwataka wafuasi kuzingatia umbali unaoruhusiwa wa kutangamana.

Kanisa la Redeemed Gospel la Askofu Arthur Gitonga lilisema limesitisha ibada zote na mikutano katikati mwa wiki, kesha lakini ibada za Jumapili zitasalia.

Apostle Julius Suubi wa Exploits Worship Centre alisema watanyunyizia makanisa yao dawa za kuua viini na kuwahimiza Wakenya kusimama imara kwa maombi.

Msikiti wa Jamia Nairobi pia ulisitisha ibada zake kufuatia amri ya serikali.

Akata mti baada ya kukosa cheo kanisani

Na John Musyoki

NGETANI, Masinga

MUUMINI wa kanisa moja kutoka eneo hili alishangaza watu alipokata mti aliopanda kanisani baada ya kuzozana na pasta wake.

Duru zinasema kuwa jamaa alikuwa anatarajia pasta aliyeletwa katika kanisa hilo ampandishe cheo na kuwa mwenyekiti wa kanisa.

Inasemekana siku ya uchaguzi pasta hakumchagua mzee huyo kama ilivyotarajiwa. Jamaa alianza kumlaumu pasta na kutisha kuukata mti alioupanda kanisani zamani na kugura kanisa hilo.

“Pasta una mapendeleo ya wazi sana. Yaani uliamua kumchagua kijana mdogo kama huyu kuongoza kanisa nzima. Ni mimi mwanzilishi wa kanisa hili na nimefanya mambo mengi sana.

“Kwa nini haukunichagua. Kama ni mbaya wacha iwe mbaya, nitaukata mti huu wangu nilioupanda zamani niuchanje kuni za nyumbani kwangu,” mzee alimwambia pasta.

Pasta kwa upande wake alimpuuza mzee huyo huku akimwambia kila muumini kanisani alikuwa na nafasi ya kuwa kiongozi.

“Mimi sipendi unavyolalamika. Dunia imebadilika na vijana pia wana uhuru wa kuwa viongozi. Jipeleleze na ujue hakuna anayepaswa kudai ana haki ya kushikilia cheo kanisani.

“Ukitaka kukata mti hakuna mtu wa kukuzuia. Tutapanda miti mingine hasa miche ya matunda badala ya mti huu wako unaojigamba nao na hauzai matunda,” pasta alimwambia mzee.

Inasemekama licha ya pasta kumzomea mzee huyo, polo aliukata mti huo na kuuchanja kuni na kuzipeleka kwake nyumbani.

Waumini walishangazwa na tabia ya jamaa huyo ambaye alihama kanisa hilo wakimlaumu kwa kutawaliwa na kiburi.

Hata hivyo haikujulikana iwapo jamaa alichaguliwa kwenye kamati ya kanisa alilohamia.

Kanisa la ACK kupokea sadaka kwa M-Pesa kuzima ufisadi

Na KNA

ASKOFU Mkuu wa Kanisa Anglikana (ACK) Jackson ole Sapit, amefichua mipango ya kanisa hilo kuanza kupokea sadaka kwa njia ya simu ili kuzima ufisadi.

Bw Sapit, ambaye amekuwa katika mstari wa mbele kushinikiza wanasiasa wazimwe kupeleka pesa za ufisadi kanisani, jana alisema mbinu hiyo itasaidia kuleta uwazi.

Akizungumza katika Kanisa la ACK St Paul mjini Lodwar, Kaunti ya Turkana, Askofu Sapit alisema hatua kubwa zimepigwa kufikia sasa kupambana na ufisadi na akataka asasi zinazohusika zisilegeze kamba.

“Unapoona gavana anakamatwa na kuagizwa asiingie afisini mwake kwa sababu ya ufisadi, inamaanisha nchi inapiga hatua bora,” akasema.

Kwa kawaida huwa ni rahisi wapelelezi kufuatilia matumizi ya pesa kielektroniki wanaposhuku mtu alipata pesa hizo kwa njia zinazokiuka sheria kuliko anapotoa pesa taslimu.

Bw Sapit alisisitiza kwamba kanisa la ACK linapinga wanasiasa kufanya harambee makanisani kwani wale wanaotaka kusaidia kanisa wanafaa kufanya hivyo sawa na waumini wengine bila kutangaza michango yao hadharani.

Alisema vita dhidi ya ufisadi havifai kumhurumia mtu yeyote, na wale wanaokamatwa wabebe misalaba yao wenyewe na akaonya umma dhidi ya kuwasifu watu ambao wanashukiwa kuhusika katika ufisadi.

Wakati huo huo, alionya taifa dhidi ya kuingiza siasa katika mchakato wa Mpango wa Maridhiano (BBI) akisema hatua hiyo itawanyima Wakenya nafasi ya kutoa maoni muhimu.

Alisema wakati umefika kwa Wakenya kupiga hatua kuacha kujadili changamoto zinazowakumba, na badala yake waanze kutoa suluhisho kuhusu matatizo hayo.

Mazungumzo baina ya Kanisa na vijana yachangia kuimarika kwa usalama

Na SAMMY KIMATU

KANISA linafurahia matunda ya mazungumzo na vijana yaliyochangia kuimarika kwa usalama wakati wa msimu wa sherehe.

Aidha, hakuna ripoti zilizotolewa kuhusiana na uhalifu Desemba 2019 katika maeneo ya Ngelani na Kisekini.

Akiongea mwishoni mwa wiki katika Kanisa la Africa Inland Ngelani katika Kaunti ya Machakos, Mchungaji Bonface Kyalo Nthenge alisema nidhamu ilisisitizwa kwa vijana kupitia mikutano na kambi.

“Kama kanisa, tunashirikisha vijana wetu katika kujikimu katika kambi za vijana na programu zingine za kanisa kupitia Idara ya Elimu ya Kikristo almaarufu CED,” Rev Nthenge aliambia Taifa Leo.

Alimshukuru mtoto wa kike kwa kuwapiku wavulana katika KCPE na KCPE na kuongeza kwamba wasichana walizoewa kwa kuonekana wadhaifu wakilinganishwa na wavulana.

“Siku za hapo nyuma, kasumba ilikuwa ni wavulana wanaongoza katika mitihani lakini wakati huu, mambo yamebadilika,” akasema.

Kanisa Katoliki lapiga marufuku nguo za kubana mwili kanisani

NA SAMMY KIMATU

KANISA Katoliki lililo jijini Nairobi limeshangaza wengi kwa kuchapisha na kutundika bango langoni kuhusu mavazi ambayo hayastahili kuvaliwa kanisani.

Bango hilo kubwa katika lango la Kanisa Katoliki la St Peter Clavers lilio katikati mwa jiji, limechapisha picha za mavazi kama vile zilizopasuliwa na kuonyesha mapaja, minisketi na blauzi zilizowacha kifua wazi.

Nguo zingine ni suruali ndefu zinazoacha sehemu za mwili wazi baada ya kutobolewa mashimo miguuni, zile za kubana na pia miwani mieusi inayoficha uso, bangili na kofia.

Hili ni kanisa la pili jijini Nairobi kutangazia hadharani waumini mavazi ambayo hayaambatani na maadili ya kanisa baada ya lile la Askofu James Ng’ang’a wa Neno Evangelism Centre.

Juhudi zetu kutaka kuwahoji wasimamizi wa kanisa hilo hazikufua dafu kwani hawakupatikana. Hata hivyo, waumini na wananchi wengine walitoa hisia mseto kuhusu hatua hiyo.

Bw Alex Muinde, 26, alisema kuna uhuru wa watu kuvalia kulingana na chaguo lao binafsi na kanisa haliwezi kuonyesha mtu nguo ile atavaa na asistahili kuvaa.

Lakini Bw Peter Kuria, 52, mfanyabiashara alisema siku hizi wanawake huvalia vibaya na inastahili wapewe mwongozo.

Na Sammy Kimatu?”Nguo hizi huwa zinanafa fikra za wanaume wakati wa ibada makanisani,” Bw Kuria asema.

Dereva wa matatu nambari 33 za kwenda Ngumo/Mjini Bw Joseph Omollo, 65, aliunga mkono watu kukatazwa kuvalia mavazi hayo akidai wazazi ndio wa kulaumiwa pakubwa kwa kikosa kuonyesha binti zao jinsi ya kuvaa.

“Serikali iingilie kati kwa sababu wazazi wameshindwa kudhibiti tabia na maadili ya watu,” Bw Omollo akasema.

Binti Rosalia Alexis, 29 aliye mwanasayansi alikubaliana na kanisa akisema wanaume wana hisia za kuvutiwa na wanawake wakivalia vibaya.? “Nguo sampuli hii ni za kuvaliwa katika kumbi za densi na disko wala sio kanisani,” akasema.

Mfanyakazi wa benki, Bw Sosmas Moula, 53 asema makanisa yamechelewa kutoa ilani hii mapema na kulinganisha na wanawake wasiofunga vitambaa vichwani kuwa ni makosa.

Bi Hilda otieno, 44, mshauri wa masuala ya fedha asema matangazo kwenye runinga na wasanii wa nyimbo ndio wa kulaumiwa pakubwa kwa kuvalia mavazi mambaya na kushauri kwamba watoto waelekezwa jinsi ya kuvaa na wazazi wao.

Kwa Bi Rosemary Nzyoki, 38 anasema ata mwilini aina ya Tatoo kando na mavazi haya ni janga lililokita mizizi miongoni mwa vijana wetu.

“Biblia inatufunza watoto kuwa watiifu lakini siku hizi huwezi kumrekebisha au kumkosoa mtoto asiye wako kwa kuhofia kushtakiwa kwa machifu,” Bi Rosemary akaambia Taifa Leo.

Sababu ya Uhuru kumfuata Ruto kanisani

Na VALENTINE OBARA

Wakenya wengine walishangaa kwa nini mchango wake ulitangazwa, ilhali Kanisa Katoliki lilitoa masharti mapya kuhusu harambee kwamba michango inafaa iwe siri ili isitumiwe na viongozi kujitafutia umaarufu wa kisiasa.

RAIS Uhuru Kenyatta ameanza kufuata nyayo za naibu wake William Ruto katika juhudi za kujenga umaarufu wake uliodidimia eneo la Mlima Kenya.

Katika juhudi hizi, Rais Kenyatta ameanza kumuiga Dkt Ruto kwa kuhudhuria hafla makanisani na kuchangisha pesa.

Hapo Jumapili alihudhuria misa katika Kanisa Katoliki la St Francis of Asisi mjini Ruiru, Kaunti ya Kiambu kisha akashiriki harambee ya ujenzi wa kanisa jipya na akatoa mchango wa Sh3 milioni, na kuahidi kuongeza Sh4 milioni baadaye, kwa mujibu wa kitengo cha habari cha Ikulu (PSCU).

Hii ilikuwa mara ya pili katika muda wa wiki moja kwa Rais kuhudhuria hafla ya kimaendeleo eneo la Kati baada ya kipindi kirefu cha malalamishi ya viongozi na wakazi wa Mlima Kenya kwamba amewapuuza.

Mbinu hiyo ya kushiriki hafla za makanisa imekuwa ikiendelezwa zaidi na Dkt Ruto hasa katika eneo la Kati ambako hafla zake nyingi zimeongeza umaarufu wake kwa wakazi.

Kwa upande mwingine imekuwa nadra sana kwa Rais Kenyatta kushiriki katika harambee kwa muda mrefu sasa, na washirika wake wamekuwa wakimlaumu Dkt Ruto na hata kushutumu michango anayotoa.

Badala ya kushiriki harambee moja kwa moja, wakati mwingine Rais Kenyatta amekuwa akiwaita wasimamizi wa shule na wanafunzi katika Ikulu ya Nairobi ambapo huwa anawakabidhi mabasi ya shule yanayogharimu mamilioni ya pesa.

Hatua yake ya Jumapili kushiriki harambee kanisani ilifanya wengi kujiuliza imekuwaje akafuata mkondo wa Dkt Ruto ambao wandani wake wamekuwa wakishutumu.

“Wale waliokuwa wakimkashifu Naibu Rais kwa kufanya harambee kanisani, mko wapi?” akauliza mtumizi wa mtandao wa Twitter aliyejitambulisha kama @evans_ndaiga.

Naye @BryanSangRutto akasema: “Hatimaye Uhuru amekubali harambee si jambo baya.”

Wakenya wengine walishangaa kwa nini mchango wake ulitangazwa, ilhali Kanisa Katoliki lilitoa masharti mapya kuhusu harambee kwamba michango inafaa iwe siri ili isitumiwe na viongozi kujitafutia umaarufu wa kisiasa.

Katika hotuba yake, Rais Kenyatta alitilia mkazo hitaji la Wakenya kuungana katika vita dhidi ya ufisadi ambao alisema ni kikwazo kikuu kwa maendeleo ya nchi.

“Tafadhali tusiingize siasa katika vita dhidi ya ufisadi. Wakati mtu akipora mali ya umma huwa hafanyi hivyo kwa niaba ya familia yake wala jamii. Kwa hivyo mtu yeyote anayeshtakiwa anafaa kubeba msalaba wake mwenyewe,” akasema.

Aliongeza kuwa kisheria asasi zote zinazohusika katika kupambana na ufisadi hazifai kuingiliwa na yeyote na kwamba, kila anayeshtakiwa anapaswa kuchukuliwa kuwa asiye na hatia hadi wakati mahakama itakapoamua kwamba ana hatia.

“Kama taifa linalotii sheria, inafaa turuhusu asasi zetu zilizotwikwa jukumu la kupambana na ufisadi zifanye kazi zao kwa uhuru na kuhakikisha hakuna ubaguzi kwa washukiwa,” akasema.

Matamshi hayo yalitokea huku Gavana wa Nairobi, Mike Sonko akitarajiwa kufikishwa mahakamani leo.

Rais alikuwa ameandamana na viongozi wengine wakiwemo Naibu Gavana wa Kiambu James Nyoro, ambaye anashikilia usimamizi wa kaunti hiyo kufuatia uamuzi wa mahakama kwamba Gavana Ferdinand Waititu hastahili kuingia afisini hadi kesi yake ya ufisadi itakapokamilika.

Rais pia alitoa wito kwa wananchi kuwa na umoja kuanzia katika familia zao ili kukuza maadili ya kitaifa.

Kanisa nalo laweka kibanda katika uwanja wa maonyesho Kisumu

Na MARY WANGARI

KANISA Katoliki mjini Kisumu halikuachwa nyuma Alhamisi pale liliweka kibanda katika Maonyesho ya Kilimo yaliyong’oa nanga katika mtaa wa Mamboleo mnamo Jumatano, Julai 24, 2019.

Hatua hiyo imeibua hisia mbalimbali miongoni mwa watu; hasa waliohudhuria maonyesho hayo.

Kwa miaka mingi, maonyesho hayo ya kilimo yanayofanyika kila mwaka, yamehusishwa na watangazaji bidhaa kutoka sekta ya kilimo.

Aidha, tamasha hiyo imekuwa kivutio kikuu kutokana na vituo mbalimbali vya watoto kuchezea na sehemu za burudani.

Maonyesho hayo ya Kisumu vilevile yamezidi kujitwalia umaarufu kila mwaka kutokana na hatua yake ya kuandaa tamasha ya Omega One inayowavutia wapenda burudani na muziki wa kidunia kutoka pande zote za nchi.

Hata hivyo, kituo cha Kanisa la Katoliki katika maonyesho ya mwaka 2019 kimevutia watu wengi kiasi cha kusababisha msongamano na wakati uo huo kuibua hisia tofauti.

Kasisi Samuel Nyataya, ambaye ni Mwelekezi wa Caritas katika dayosisi ya Kisumu hata hivyo alishikilia maoni tofauti akisema kanisa hilo linatoa mtazamo jumuishi kuhusiana na masuala ya maisha.

“Kuwepo kwetu hapa si jambo geni. Swali sahihi ambalo watu wangekuwa wakiuliza ni kwa nini hatuko hapa?” alisema Nyataya.

Kasisi Nyataya anayeongoza idara ya maendeleo ya Kanisa Katoliki mjini Kisumu alisema kanisa hilo katika miaka iliyopita liliweka kituo kwenye uwanja huo na kukaa mbali kwa sababu zisizojulikana.

Wakatoliki, wengi wao wakiwa watangazaji bidhaa uwanjani humo walifurika katika kituo hicho wakati wa kila kipindi cha mapumziko ya chamcha ili kuimba pambio na kushiriki katika misa takatifu zinazoongozwa na makasisi wa Kikatoliki.

“Wanaopanda kwa machozi wataimba watakapovuna. Lau taswira kutoka juu ingewasilishwa mtu angebaki akishangaa mkusanyiko huu mdogo ni nini?” alitania Kasisi.

Akaongeza: “Hata hivyo, hii inawakilisha picha halisi ya jinsi ulimwengu ulivyogeuka. Kila kiumbe anajishughulisha na maisha yake akisahau sisi ni vyombo tu vya udongo vinavyoweza kuvunjika.”

Kanisa ladai upangaji uzazi umelipunguzia waumini

Na ALEX NJERU

MAKASISI wa Kanisa Katoliki wamelaumu matumizi ya njia za kisasa za upangaji uzazi kama sababu kuu ya kupungua kwa idadi ya watoto kwenye shule na makanisa katika Kaunti ya Tharaka-Nithi.

Kasisi wa Parokia ya Iruma Gerald Mugendi akizungumza katika kanisa Katoliki la Muthambi alionya kwamba vipindi vya somo la dini vipo hatarini kusitishwa kutokana na ukosefu wa watoto wa kuhudhuria madarasa yanakofundishwa somo hilo.

Alisikitika kwamba hata wanawake wa kanisa katoliki wamezamia upangaji uzazi ilhali wanafahamu fika kwamba hivyo ni kinyume na mafundisho ya kanisa hilo.

“Baadhi ya shule zina watoto wasiozidi watano wanaopokea mafundisho ya dini jambo ambalo limewakosesha kazi walimu wao wa dini,” akalalamika mtumishi huyo wa mungu.

Bw Mugendi alifichua kwamba wanachama wa Muungano wa Wanawake Katoliki wataungana kuzuru makanisa yote ya katoliki katika kaunti hiyo katika kipindi cha majuma matano yajayo kuwahamasisha waumini wao dhidi ya kutopanga uzazi kwa njia za kisasa. Pia aliwataka waumini waliokumbatia upangaji uzazi kusitisha mpango huo na kutubu dhambi hiyo mbele ya mungu.

“Idadi ya chini ya watoto katika kila familia tutakayoruhusu ni watano. Wanawake wote walioweka vifaa vya upangaji uzazi miilini mwao lazima waviondoe na wamwombe mungu msamaha,” akaongeza Bw Mugendi.

Mbunge wa Maara Kareke Mbiuki aliyehudhuria ibada hiyo hata hivyo aliwalaumu wanawake kwa kukumbatia upangaji uzazi bila kuwafahamisha waume wao.

Bw Mbiuki aliwatetea wanaume na akataka wanawake wa kaunti hiyo kujifungua watoto wengi ili kuongeza idadi yao.

“Wanaume hawana hatia. Wakati mwingine wake zetu hupanga uzazi bila ufahamu wetu,” akasema Bw Mbiuki.

Jinsi ya kutambua dhehebu lenye imani potovu

NA MHARIRI

WAUMINI huhitajika uaminifu wao wote uwe kwa kiongozi wao wa kidini, na hii huhitaji kukatiza mahusiano ya kifamilia na kirafiki ama kubadilisha taaluma na mambo mengine uliyokuwa ukifanya.

Waumini sugu wanahisi hawawezi kuishi nje ya kundi na huogopa kuacha kundi kwa hofu ya kufuatwa na mikosi wakiamua kuacha imani.

Ukosoaji wa imani ama kiongozi hukemewa sana na wakati mwingine wanaofanya hivyo huadhibiwa.

Mbinu za kuvuruga akili kama vile taamuli, kusifia mfululizo na kuongea kwa ndimi zinatumika kupindukia kwa nia ya kuondoa shaka kuhusu kiongozi ama kundi husika.

Kiongozi hutoa masharti kuhusu jinsi wafuasi wake wanavyofaa kufikiria na kuishi. Mfano ni wafuasi kuomba ruhusa kutoka kwa kiongozi kabla ya kuanza mahusiano ya kimapenzi, kubadilisha kazi, kuoa, ama kiongozi anawaambia aina ya mavazi wanayofaa kuvaa miongoni mwa masharti mengine.

Kundi hujiona kuwa limo katika hadhi ya juu kuliko imani zingine, na kiongozi wao wanamwona kuwa mtu maalum mwenye jukumu la kuokoa binadamu, na hupewa majina makubwa makubwa ya kidini.

Wafuasi huwaona watu wengine wasiofuata imani yao kama waliopotoka na wachafu.

Kiongozi huwa hawajibiki kwa yeyote. Ndiye mwenye usemi wa mwisho.

Kundi hutoa mafunzo ambayo si ya kawaida. Kwa mfano waumini kuambiwa kufanya mambo ambayo kwa kawaida yanaonekana kukiuka mitindo na maadili, ambayo kama si imani hiyo hawangefanya.

Marwa: Tuko tayari kumaliza zogo la kanisa Adventista

NA CECIL ODONGO

VIONGOZI Waadventista wenye hadhi serikalini na katika jamii walitangaza kujitolea kwao kupatanisha kambi mbili zinazozozania uteuzi wa wanachama wa kamati ya kuwapendekeza wahudumu wa Kanisa la Kiadventista la Nairobi Central(Maxwell).

Tofauti kuhusu uanachama wa kamati hiyo zimekuwa zikiendelea tangu mwisho wa mwaka jana huku zikitishia kulemaza jinsi shughuli za kanisa hilo maarufu nchini zinavyoendeshwa na kulipaka tope machoni mwa maelfu ya waumini kote nchini.

Katibu katika wizara ya Ugatuzi Nelson Marwa akiwahutubia waumini kanisani humo Jumamosi, alieleza kutofurahishwa kwake na kuendelea kushamiri kwa utata huo na kuzitaka kambi mbili zinazozozana kukubaliana.

“Kanisa hili ni kama Kituo Kikuu cha Kanisa la Adventista nchini kwasababu kila mgeni anayeingia nchini huelekezwa kushiriki hapa. Ni aibu sana kwamba tunashindwa kutatua mambo kwa uaminifu na kuharibu jina la kanisa lenye hadhi kama hili. Kila mtu amekuwa akiniuliza kuhusu kinachoendelea Maxwell.”

“Nimezungumza na Waziri Fred Matiang’ na Jaji Mkuu David Maraga pamoja na watu wengine ili tuone jinsi tunavyoweza kuketi chini na kutatua tofauti hizi ndipo Maxwell irejelee hadhi yake ya zamani. Watu mashuhuri wakiwemo wabunge na viongozi wa juu katika taifa hili hushiriki hapa, ni aibu kubwa iwapo mambo kama haya yanatokea. Naomba tuabudu Mungu kwa ukweli na kwa uaminifu,” akasema Bw Marwa Jumamosi.

Utata kuhusu majina ya wanakamati umeanika wazi tofauti kali kati wachungaji wawili wa kanisa hilo na wazee ambao wamewalaumu kwa kutumia ukabila kama kigezo cha kuafika majina yaliyowasilishwa awali.

Hata hivyo, Pasta Jean Pierre Maiywa ambaye alihubiri siku ya Jumamosi alitangaza kwamba kamati iliyoteuliwa awali imefutiliwa mbali huku akikosa kubainisha ni lini kamati nyingine itateuliwa ili majina ya wahudumu wa mwaka huu yatangazwe.

“Kamati iliyopendekezwa imevunjiliwa mbali ili kupisha majadiliano. Hata hivyo nawaomba waumini wanye wito, msukomo na ari ya kulihudumia kanisa kuyawasilisha majina yao. Mniombe na tuliombee kanisa letu ili tuweze kuafikiana kuhusu suala hili,” akasema Pasta Maiywa.

Baadhi ya Waumini wa kanisa hilo wamekuwa wakionyesha kutoridhishwa na uongozi wa wachungaji hao na kuutaka usimamizi wa kanisa la adventista nchini kuwahamisha.

Kwa kipindi cha majuma mawili yaliyopita, wanaoung’unika wamekuwa wakiasi ibada na kushauriana kwa makundi nje ya kanisa hilo. Mkutano wa kujadili uongozi wa kanisa hilo pia ulisambaratika wiki mbili zilizopita baada ya muafaka kuhusu majina hayo kukosekana miongoni mwa waumini, wazee na wachungaji.

Pasta atimua polo kumtamani bintiye kanisani

NA JOHN MUSYOKI

MACHAKOS MJINI

KISANGA kilizuka katika kanisa moja hapa jamaa alipofurushwa kwa madai ya kuharibu binti ya pasta. Inasemekana jamaa alikuwa mgeni katika kanisa hilo aliposimama kusalimia waumini na kudai nia yake ilikuwa ni kuoa binti ya pasta.

Matamshi yake yalimkera mtumishi wa Mungu na akamnyang’anya kipaza sauti na kumwamuru aondoke kabla ya kumchukulia hatua. “Kijana wewe, toka nje mara moja kabla sijachemka kwa hasira. Wewe ni nani na sijawahi kukuona hapa wala hujaja kwangu kujitambulisha?” pasta alimfokea.

Jamaa alijaribu kujitetea lakini mtumishi wa Mungu alimpuuza. “Kwanza wewe sio muumini wa kanisa hili na hauna nafasi ya kudai utaoa binti yangu mbele ya waumini bila ruhusa kutoka kwangu, kwenda kabisa!” Pasta alizidi kuchemka.

Hata hivyo, jamaa alijkakamua kujitetea lakini juhudi zake ziliambulia patupu. “Pasta kuwa mpole. Nishapendana na binti yako kwa dhati na hata usiku silali nikimfikiria. Binti yako sasa amekomaa na ana haki ya kuolewa. Kwa nini umemfunga nyumbani kama kuku, mpe uhuru wake aolewe,” jamaa alimwambia pasta

Inasemekana pasta alimrukia jamaa akitaka kumcharaza lakini akazuiliwa na waumini. “Huyu kijana anataka kumharibu binti yangu. Sitakubali hilo kutendeka. Hana hata heshima kuja hapa kanisani kutangaza anataka kumuoa binti yangu. Binti yangu sio kahaba na sitaruhusu mwanamume aliyepotoka kumharibu,” pasta alisema.

Jamaa kuona hivyo aliamua kuondoka kanisani na kwenda zake. Hata hivyo haikujulikana ikiwa alikuwa akimchumbia binti ya pasta huyo ambaye hakuwa kanisani wakati wa kisanga hicho.

Kwa mujibu wa mdokezi, pasta alikuwa mkali sana na hakurusu mabinti zake kutoka nje ya boma bila ruhusa.

Vurugu waumini wakipinga pasta kutumia hela za kanisa kujinunulia gari

Na CAROLINE MUNDU

VURUGU zilitokea katika Kanisa la Nyalenda Baptist mjini Kisumu Jumapili kufuatia madai kwamba pasta alitumia pesa za kanisa kununua gari bila idhini ya waumini.

Pasta Samuel Otieno, pamoja na wasimamizi wengine wakuu wa kanisa hilo, walidaiwa kutoa Sh800,000 kwenye akaunti ya kanisa na kununua gari aina ya Toyota Axio bila ruhusa wala kufahamisha waumini na viongozi wengine.

Kulingana na katibu wa kanisa, Bi Monica Mugaro, fedha za kanisa zilitolewa benki bila yeye kujua kama inavyohitajika na kanuni za usimamizi wa kanisa hilo.

“Tulishtuka tulipofahamishwa kupitia kwa tangazo kanisani kwamba pesa zilitolewa benki na gari likanunuliwa. Zaidi ya hayo, hatujaonyeshwa risiti wala kuona pesa zilizobaki baada ya gari kununuliwa,” akasema.

Hata hivyo, Bw Otieno pamoja na Shemasi Mkuu wa kanisa, Bw Dennis Oduol walikanusha madai hayo na kuahidi kuwasilisha stakabadhi zote ambazo waumini wenye malalamishi wanataka kuona.

“Kabla Jumapili ijayo tutakuwa tayari tumewaita viongozi wenye malalamishi na kuwaonyesha kila stakabadhi za ununuzi wa gari hilo,” akasema Bw Otieno.

Duru zilisema kuwa viongozi waliouliza kuhusu fedha hizo walipewa barua kwamba wameondolewa kwenye nyadhifa zao kwa mwaka mmoja na wakaonywa wasiwahi kuingia katika uwanja wa kanisa wala kujihusisha na waumini wengine.

Mwenyekiti wa kanisa hilo alimlaumu pasta wao kwa kile alichosema ni kuwadhulumu waumini.

“Tunagharamia ada zake za maji, stima, marupurupu kila Jumapili ilhali bado anatumia vibaya fedha za kanisa. Ni wazi kwamba yeye si kiongozi anayeongozwa na roho mtakatifu,” akalalama mwenyekiti huyo, Bi Catherine Otieno.

Kioja hicho kilivutia maafisa wa polisi wenye silaha ambao waliitwa kutuliza hali.

Mapasta wamekuwa wakilaumiwa kwa kuishi maisha ya kifahari huku waumini wao wengi wakiishi maisha ya uchochole.

Pasta ndani miaka 15 kwa kubaka waumini 8 mara 40 kanisani

Na GEOFFREY ANENE

PASTA mmoja kutoka nchi ya Korea Kusini amehukumiwa kifungo cha miaka 15 gerezani Alhamisi kwa kubaka waumini wanane katika zaidi ya mara 40 tofauti katika kanisa lake la Manmin Central Church jijini Seoul.

Shirika la habari la Yonhap linasema kwamba Lee Jae Rock, ambaye ni mwanzilishi wa kanisa hilo linaloaminika kuwa wafuasi takriban 130,000, alihukumiwa katika mahakama ya Seoul Central District Court kwa kutumia mamlaka yake kutenda uovu huo.

Pasta huyo mwenye umri wa miaka 75 alitumia imani ambayo ‘kondoo’ hao walikuwa nayo kwake kama mtu aliyekuwa karibu na Mungu, kuwadhulumu mara kwa mara.

Kanisa hilo, ambalo lilianzishwa na Lee mwaka 1982 na linadai kuwa na zaidi ya matawi 10,000 kote duniani, ikiwemo Kenya, liliondolewa kutoka orodha ya Baraza la Makanisa la Korea mwaka 1999 kutokana na madai linaenda kinyume na maandiko ya Kikristu.

Katika tovuti yake, kanisa hilo linadai kuwa “idadi kubwa ya watu isiyojulikana imepata uponyaji wa Mungu kwa magonjwa yasiyotibika kama Ukimwi, saratani, na mengineyo, mara moja.

Serikali ikate fungu la kumi kwenye mishahara ya waumini – Askofu

DAILY MONITOR Na PETER MBURU

MHUBIRI mmoja kutoka Kampala, Uganda ametoa pendekezo lisilo la kawaida, kuwa serikali iwe ikiwakata waumini fungu la kumi kwenye mshahara na kutuma pesa hizo katika makanisa.

Askofu Mkuu huyo wa kanisa katoliki alisema kuwa Wakristo wengi hawajakuwa wakitoa sadaka, jambo ambalo limeathiri miradi ya kanisa.

“Kila tunapoitisha sadaka, watu wanatoa tu kile walicho nacho kwa wakati huo, lakini Biblia inasema kuwa asilimia kumi ya kile unachopata kiende kanisani,” akasema Mhubiri Lwanga katika kanisa la St Mary’s Cathedral Rubaga wakati wa misa.

“Niungeni mkono ninapotoa pendekezo hili kwa kuwa ni njema kwetu. Hamchoki kutia pesa vikapuni kila wakati?”

Mhubiri huyo alisema kuwa anataka Uganda kuchukua mkondo wa Ujerumani ambapo fungu la kumi kwa waumini wa katoliki hukatwa kwenye mshahara kila baada yam waka.

Ushuru huo wa kanisa hukusanywa na serikali na baadaye kuelekezwa kwa makanisa tofauti.

“Niliambiwa kuwa Wajerumani hufanya makubaliano na serikali ikate fungu la kumi kila mwezi kisha kuzipa kanisa na pesa hizo hutumiwa kujenga makanisa,” akasema.

Wale wasiotaka kulipa fungu la kumi nchi hiyo huandika barua rasmi wakisema kuwa wameamua kuwacha kanisa kwa sababu ya hali hiyo na mara mtu anapoondoka hawezi kula sakramenti tena ama kufanya shughuli za kanisa.

Jombi aomba kanisa limsaidie kutimua mke

Na TOBBBIE WEKESA

KABARI, KIRINYAGA

Kalameni mmoja aliwashangaza waumini wa kainsa moja la hapa alipoingia kanisani na kuomba asaidiwe kumtaliki mke wake akidai alikuwa amegeuka kisirani.

Kulingana na mdokezi, polo alikuwa amechoshwa na tabia za mkewe za kumzomea kila mara. Inadaiwa polo alikuwa amejaribu mbinu zote za kumtimua kipusa lakini hakufua dafu.

Duru zinasema kipusa alipokuwa akienda kanisani, polo aliamua kumfuata polepole. Wakati mahubiri yalipoanza, polo aliingia na kumuomba pasta atulie kidogo.

“Mke wangu hushiriki hapa. Nyumbani hanipi amani wala raha. Niliamua kuzamia pombe angalau nisahau baadhi ya mambo anayonifanyia,” polo alieleza. Kila mtu kanisani alinyamaza kimya kumsikiliza polo.

“Najuta sana kumuoa. Nimejaribu kumfukuza lakini hafukuziki. Naomba talaka,” polo alisema. Mkewe polo alisimama na kumuomba pasta kutomsikiliza mumewe.

“Achana na huyo. Ni mlevi. Wewe endelea na mahubiri,” kipusa alimrai pasta.Inasemekana polo alianza kumzomea kipusa huku akitoboa siri zake zote.

“Acha ujinga. Huyu mwanamke kitandani hatuangaliani. Akiondoka asubuhi yeye hurudi jioni na hataki nimuulize. Mnisaidie nimpe talaka,” polo aliomba. Kulingana na mdokezi, pasta alimuomba polo kurudi nyumbani ili wasuluhishe mgogoro baadaye.

“Tutakuja kusuluhisha hayo mambo baada ya huduma kuisha. Tulia pale kwanza,” pasta alimrai polo. Inadaiwa polo aliamua kuondoka huku akiapa kutumia mbinu zote kumtimua kipusa.

“Sitaki kumuona kwangu. Madharau yake yamenifika kooni. Atafute bwana mwingine wa kumuoa humu kanisani,” polo alisema huku akianza safari kurudi kwake.

Baada ya ibada pasta alielekea kwa jamaa akiandamana na wazee kadhaa na haikujulikana ikiwa walifaulu kusuluhisha mzozo kati yake na mkewe

Kioja miili ya mwanamume na mwanamke kupatikana na kondomu ndani ya kanisa

Na MWANGI MUIRURI

MAAFISA wa polisi katika Kaunti ya Kirinyaga wanachunguza kisa ambapo miili ya mwanamume na mwanamke iliyokuwa uchi wa wanyama na kondomu kando ilipatikana ndani ya kanisa moja Jumamosi.

Miili hiyo ilipatikana katika kanisa la Holy Ghost Terbancle eneo la Muringe, kaunti ndogo ya Ndia.

Kando ya miili hiyo kulikuwa na mipira miwili ya kondomu iliyokuwa imetumika.

Hapo Jumapili, waumini wa kanisa hilo waliabudu nje huku kiongozi wake Askofi Kinyua Nyaga akisema leo kutakuwa na hafla ya utakaso wa kanisa hilo ambapo maaskofu wengine wataongoza harakati hizo.

Askofu Nyaga alisema atangojea uchunguzi wa polisi ili apate jibu kuhusu kisa hicho, au asubiri Mungu ampe ufunuo wa kile hasa kilifanya kanisa lake kupatwa na kisa hicho.

Tukio hilo lilizua mjadala miongoni mwa wenyeji, baadhi wakisema kuwa hiyo ilikuwa “adhabu ya Mungu kwa wawili hao kuzini ndani ya kanisa”.

Hata hivyo haijabainika iwapo walikuwa wakizini ama waliuawa na miili kutupwa humo kanisani, na ni masuala haya ambayo polisi wanachunguza

Kwa mujibu wa Afisa Mkuu wa Polisi wa Utawala wa eneo hilo, Boniface Mwaniki, wenda zao walikuwa wameonekana awali katika mji wa Kagio wakinywa pombe pamoja, na walitoka baa walimokuwa mwendo wa saa nne usiku.

“Habari tulizo nazo kwa sasa ni kuwa wawili hao, ambao hakuna anayewafahamu eneo hili, walikuwa wameingia katika baa hiyo mwendo wa saa mbili jioni na wakaanza kulewa. Imebainika kuwa mwanamke huyo, ambaye anakadiriwa kuwa wa miaka ya 40, ndiye aliyekuwa akilipa bilizake na za kijana anayeonekana kuwa wa miaka 30 hivi,” akasema Bw Mwaniki.

Alieleza kuwa taarifa za mashahidi waliowaona wawili hao wakitoka baa hiyo zinaonyesha kuwa walitembea kuelekea barabara ya Makutano – Sagana.

“Kile ambacho kimebakia kuwa kitendawili ni jinsi wawili hao waliishia hapa kanisani, ilikuwaje wakawa uchi, nguo zao zilikuwa kando mwa miili yao, kuna kondomu zilizotumika na walikumbana na mauti vipi. Wote wawili hawana majeraha ya kuashiria walishambuliwa na walikuwa wamelala wakiwa wamekaribiana na nyuso zao zikiwa sambamba,” akasema afisa huyo.

Bw Mwaniki alisema kisa hicho kinachunguzwa na maafisa wa DCI eneo hilo ili kujaribu kutegua kitendawili hicho.

Alisema kuwa kanisa hilo ambalo limejengwa kwa mbao na mabati lilikuwa limevunjwa kufuri ya mlango.

“Nje ya kanisa hilo kuna alama za magurudumu ya pikipiki. Licha ya mmiliki wa baa walimokuwa wakibugia pombe kusema kuwa alikuwa amewapa wawili hao chenji ya Sh450 walipokuwa wakitoka, hakuna pesa zilizokuwa katika eneo hilo la mauti,” akasema Bw Mwaniki.

Alieleza kuwa miili hiyo ilipelekwa katika mochari ya Embu kuhifadhiwa huku uchunguzi zaidi ukiendelezwa.

“Kwa sasa, tumechukua alama za vidole za miili hiyo na pia mipira ya kondomu ili kuchunguza kama uchafu ulio ndani yazo ni wa ngono ya wawili hao au ni wa mwingine,” akasema.

Alisema kuwa uchunguzi zaidi utatekelezwa katika upasuaji wa miili ili kufahamu jinsi walivyoaga.

Jela miezi 6 kwa kupanda bangi kanisani akidai ni maua

Na TITUS OMINDE

MWANAUME mmoja alifungwa jela Jumatatu na mahakama ya Eldoret baada ya kupatikana na hatia ya kupanda mmea wa bangi katika shamba la watawa dayosisi ya kanisa la Katoliki mjini Eldoret.

Mahakama iliambiwa kuwa Joash Kiplimo Chirchir ambaye hufanya kazi katika shamba hilo liloko katika mtaa wa Kimumu mjini Eldoret, alipatikana akiwa amepanda mashina 1,000 ya mmea huo shambani humo mnamo Juni 3.

Watawa husika hawakuwa wanajua mmea kwani waliugundua baada ya kuita majirani kuwasaidia kuutambua.

Majirani waliwaelezea kuwa mmea huo ulikuwa ni bangi ambapo ni hatia kuupanda.

Watawa hao waliripoti kisa hicho katika kituo cha polisi cha Kapsoya ambapo polisi walifika shambani humo na kushika mshukiwa kabla ya kung’oa mmea huo.

Mshtakiwa alikiri mashtaka dhidi yake mbele ya hakimu mkuu wa Eldoret.

Wakati wa kujitea mshtakiwa alisababisha kicheko mahakamani alipoambia mahakama kuwa hakuwa na nia mbaya kupanda mmea huo bali aliupanda kama maua huku akitaka mahakama imsamehe.

Akitoa hukumu yake hakimu alisema kifungo cha juu cha makosa kama hayo ni kufungwa jela kwa miaka mitano au faini ya Sh250,000 hata hivyo, alimuonea mshtakiwa huruma na kumfunga kwa miezi sita au kutozwa faini ya Sh50,000.

Wiki jana katika mahakama hiyohiyo, watu wengine wanne walikiri mashtaka ya kupatikana na misokoto zaidi ya 200 ya bangi.

Idadi kubwa ya washtakiwa hao walikuwa vijana ikiwa ni pamoja na wanafunzi wa shule moja ya upili katika kaunti ya Uasin Gishu.

Washtakiwa hao ambao walinaswa katika mitaa mbalimbali mjini Eldoret wanatarijiwa kuhukumiwa wiki hii.

Buda akiri kanisani anakaranga yaya na mkewe kwa kikaango kimoja

Na SAMMY WAWERU

MUNYU, THIKA

KIOJA kilishuhudiwa katika kanisa moja mtaani hapa mzee aliyeokoka alipokiri kwamba alikuwa na uhusiano wa kimapenzi na yaya.

Inasemekana mkewe alikuwa akijaribu juu chini jamaa aokoke ili awe akiandamana naye kanisani kwa miaka 17 iliyopita. Hivi majuzi, ilikuwa furaha kwa mama huyo maombi yake yalipojibiwa na jamaa akaokoka.

“Huyu ndiye Mungu ninayemuomba kila siku, umekaribishwa sana kanisani mume wangu,” mkewe alisema akitabasamu.

Wakiwa kanisani mama aliketi karibu na mumewe uso wake ukionekana kujawa tabasamu. Misa ilianza na kuendeshwa kwa utaratibu.

Pasta alilisha kondoo wake chakula cha kiroho, ukawadia muda wa kutaka aliyeamua kukabidhi maisha yake kwa Mwenyezi Mungu ajitokeze.

Jamaa alinyanyuka na kuombewa. Hata hivyo, aliomba apewe dakika kadhaa ashukuru. “Kwa hakika niko mahala hapa kwa juhudi za mke wangu mpendwa. Nina ujumbe ambao ningeomba kumpasha,” jamaa alisema kanisa likitulia.

Alijipa dakika mbili hivi na hatimaye akapasua mbarika.

“Kuanzia leo nimekuwa mtu mpya, ambaye ameamua kumfuata Yesu Kristo. Maisha yangu ya awali yalikuwa yenye maovu tele, ninaomba kwa dhati mke wangu anisamehe kwa kuwa na uhusiano haramu na yaya. Ni jambo ambalo limekuwa likinikereketa maini,” alifichua.

Hata hivyo, yasemekana mkewe alikasirika, akasonga mbele na kumshika mashati. “Haiwezekani, iweje ufanye ukorofi huo? Yaani umekuwa ukinikaanga chungu kimoja na mjakazi wa nyumbani?” mama alitaka kujua.

Mama huyo alitishia kumpa polo talaka lakini pasta akamtuliza akimwambia tayari jamaa alikuwa kiumbe kipya.

Aliita kikaokilichojumuisha wazee wa kanisa, na haikufahamika kilichojadiliwa.

…WAZO BONZO…

Gunia la miraa latolewa kanisani kama sadaka

Na LEAH MAKENA

MUTUATI, MERU

Polo wa eneo hili alishangaza waumini wa kanisa moja kwa kupeleka gunia la miraa kanisani kama sadaka ya kutoa shukrani kwa mavuno mema.

Yasemekana pasta wa kanisa hilo alikuwa amekubali washiriki kutoa mavuno kama sadaka.

Kwa kawaida, mavuno hayo huuzwa na pesa zinazopatikana hutumiwa kwa miradi ya kanisa.

Inasemekana kuwa waumini wengi walipeleka aina mbali mbali ya vyakula.

Hata hivyo, polo mmoja aliamua kupeleka gunia la veve kanisani akisema alikuwa amefanikiwa kupata mavuno mazuri na hangekosa kutoa shukrani kwa Maulana.

Pasta alishangaa alipofungua gunia na kupata miraa. Alimlaumu jamaa kwa kudharau kanisa lakini alijitetea akisema hakuona makosa yoyote kushukuru Mungu kwa baraka alizomjalia.

“Kama huwa mnakubali pesa ninazotoa sadaka nikiuza miraa mbona msikubali zao lenyewe? Isitoshe, mko na faida kwa sababu huwa ninauza kwa bei ya juu sana na hivyo kanisa litafaidi mkifanyia kazi zaka hiyo,” polo aliongeza.

Waumini walioshuhudia tukio hilo walisema kuwa pasta alimkemea polo kwa kitendo chake na kumtaka kuondoka na gunia lake la miraa. Alisema hangekubali biashara ya vileo kanisani.

Jamaa alilazimika kurejea nyumbani na gunia lake akimlaumu pasta kwa kumbagua na kukataa kukubali zaka yake ilhali kwa miaka mingi amekuwa akikubali pesa zinazotokana na zao hilo.

Alidai pasta alijifanya kwa sababu anajua waumini wengi ni wakulima wa miraa na hiyo ndiyo njia yao ya kujitafutia riziki.

Alisema pasta alifaa kuombea zao hilo ili lizidi kunawiri wakazi wapate pesa zaidi na kutoa sadaka nono apate kufaidika.

…WAZO BONZO…

Akemea pasta kanisani kumchochea aachane na mumewe amtafutie bwanyenye

Na CORNELIUS MUTISYA

KAVIANI, MACHAKOS

MAMA wa hapa alimkemea pasta wake mbele ya waumini akimshutumu kwa kumchochea amteme mumewe ili amtafutie mume mwingine tajiri.

Kulingana na mdokezi, mama huyo alikuwa muumini katika kanisa la pasta huyo. Ajabu ni kwamba, pasta hakuwa ameoa licha ya kutimu umri wa kuwa na mke.

Tetesi zilitanda mtaani kuwa mama alikuwa mpango wa kando wa Mtumishi huyo wa Mungu.

Siku moja, pasta alimualika katika ofisi yake ili ampatie ushauri wa kiroho kufuatia maono aliyodai yalimjia usiku akiwa usingizini.

“Alimweleza kwamba alifunuliwa kuwa ndoa yake haikuwa shwari na akamwambia roho alimfunulia aondoke katika ndoa hiyo yenye laana mara moja. Alimwambia angemtafutia mume mwingine tajiri,” alieleza mdokezi.

Hata hivyo, mama huyo alitilia maanani ushauri wa pasta na akaenda nyumbani, alifunganya virago vyake na akakodi chumba sokoni hapa akisubiri pasta amtafutie mume mzuri na tajiri.

“Miezi sita ilipita bila pasta kumtafutia mume na akaanza kukata tamaa. Alianza kujuta kwa kuhadaiwa aondoke katika ndoa yake,” alisema mpambe wetu.

Inasemekana siku ya kioja mama alifika kanisani akiwa na hamaki kuu na akaanza kumfokea pasta peupe.

“Kumbuka ulinidanganya niondoke katika ndoa yangu ukidai ulitumwa na roho mtakatifu. Miezi sita imepita na hujanitafutia mume ulivyodai ulifunuliwa,” alifoka mama huyo huku waumini wakibaki vinywa wazi.

Penyenye zaarifu pasta alipata fedheha na akamwambia mama azidi kusubiri miujiza.

Hata hivyo, waumini walishangaa jinsi pasta alivyoweza kuvunja ndoa akidai angemtafutia mwanamke huyo mume mwingine ilhali yeye mwenyewe hakuwa na mke.

…WAZO BONZO…

Pasta ashangaza kuomba waumini idhini afurushe mkewe

Na TOBBIE WEKESA

KABATI, MURANG’A

PASTA wa kanisa moja la hapa aliwaacha wengi vinywa wazi alipowaomba ruhusa waumini ili amtimue mke wake.

Inasemekana pasta alitangazia waumini masaibu aliyokuwa akipitia mikononi mwa mkewe na akawaomba ruhusa aweze kumfurusha.

Kulingana na mdokezi, pasta alichukua nusu saa kuelezea kanisa sababu za kufikia uamuzi huo. Kulingana na pasta, mkewe alikuwa mtu asiyeaminika  katika ndoa.

“Nikiondoka kwenda semina, mke wangu pia huondoka. Haendi kwao. Anakoenda mimi sijui,” pasta alieleza.

Kila mtu kanisani alikuwa ange kumsikia pasta. Wengi waliofahamu tabia  za mkewe walitabasamu. Penyenye zinasema mkewe alikuwa  akimcheza pasta  kwa muda mrefu.

Kila wakati pasta akiondoka nyumbani kwenda mikutano ya maombi, kipusa alikuwa akiondoka kwenda kwa mipango ya  kando.

Pasta alieleza namna alivyong’ang’ana na majukumu nyumbani hata mkewe akiwa.

“Ni Mungu tu amenitunza. Nimepitia mengi. Naomba idhini yenu ili nimtimue,” pasta alieleza.

Duru zinasema kabla ya kanisa kuanza, mwanadada huyo alikuwa amegundua mipango ya pasta. Aliamua kuondoka mapema akihofia kuaibishwa.

“Kama ni hayo unayopitia, pasta ruhusa tumekupa na utafute mwanadada mwingine atakayekutunza,” muumini mmoja alisimama na kumueleza pasta.

“Nimechoka kusikia hadithi mtaani. Jina langu limeharibika. Mke wangu hatulii. Sijui ameingiliwa na shetani gani,” pasta akasema.

Kulingana na mdokezi, waumini wote walikubaliana kwa kauli moja kumuunga pasta.

“Mfukuze. Tutakusaidia kupanga harusi nzuri. Huyo mke hata sisi tunajua mienendo yake,” muumini mmoja alisema kwa sauti huku wenzake wakikubaliana naye.

…WAZO BONZO…

Polo aliyeokoka afichulia waumini yeye ni mpenziwe mke wa pasta

Na SAMMY WAWERU

KANDARA, MURANG’A

WAUMINI wa kanisa moja mtaani hapa walipigwa na mshangao jamaa aliyeamua kuokoka alipodai alikuwa na mpango wa kando wa mke wa pasta.

Jamaa alimwaga mtama na kuaibisha mke wa pasta huku mumewe akitoka na kupoteza fahamu.

Inasemekana polo alijiunga na kanisa hilo kufuatia ushawishi wa pasta na mkewe kwa kipindi cha mwaka mmoja.

“Pasta na mkewe walikuwa wakialika kalameni kwao kumhubiria aokoke,” alieleza mdokezi wetu.

Siku ya kioja pasta alieleza washirika wa kanisa hilo kuwa alikuwa na ujumbe maalum kwao.

“Leo tumejaaliwa kuwa na mgeni, ni kijana ambaye mimi na mke wangu tumefanya kila tuwezalo kumnusuru kutoka ulevini,” alisema mhubiri huyo akialika jombi kutoa ushahidi.

Jamaa alijitambulisha, na kushukuru mtumishi wa Mungu kwa dhati kwa kumgeuza kuwa kiumbe mpya. Alikuwa mcheshi, ambapo kanisa liliangukia kicheko kutokana na aliyosimulia.

Hata hivyo, kanisa lilitulia kama maji mtungini aliposema ana ujumbe maalum aliotaka ujulikane. “Kusema ukweli nina kila sababu ya kutabasamu na kumshukuru pasta kwa kunikomboa.

Naomba mtumishi wa Mungu unisamehe kwa kuwa nusura nivunje ndoa yako kwa kuwa nilikuwa na uhusiano wa kimapenzi na mke wako, nilikuwa mtenda dhambi lakini naungama makosa yangu,” alitangaza kalameni.

Waumini walijishika tama, kwa siri iliyofichuka wakifahamu fika kuwa mama huyo alikuwa katika mstari wa mbele kanisani kukashifu usinzi kwenye ndoa.

Pasta alipoteza fahamu na kupelekwa katika chumba maalum ili kufanyiwa huduma ya kwanza. Mkewe alionekana akimwaga machozi na kuomba msamaha kwa kanisa.

…WAZO BONZO…

Uchawi wazidi kanisani huku waumini wakiamini nguvu za giza kuliko Mola

Na MWANGI MUIRURI

WAUMINI wengi makanisani wanashiriki uchawi kuliko wanavyozingatia mafunzo ya kidini, Muungano wa Makanisa ya Kiprotestanti (KAPC) umedokeza.

Mwenyekiti wa KAPC, Askofu Peter Mburu aliambia kongamano la kuombea taifa linaloendelea katika uwanja wa Kasarani jijini Nairobi kuwa Wakristo wengi wamegeukia uchawi wakitafuta utajiri, vyeo na kinga maishani. Wengi wanaenda kanisani na kushiriki shughuli za kidini kama mazoea tu ama kulinda hadhi yao wasigunduliwe mienendo yao ya kisiri.

Askofu Mburu alikiri kuwa hata wahubiri wengi wametumbukia kwenye uchawi sawa na waumini wao. “Katika muungano wetu tumesimamisha kazi wahubiri 23 tangu Januari 2017 kwa kuwapata na makosa ya kushiriki ushirikina. Waumini wetu wengi wamekiri waziwazi kuwa wameenda kwa waganga kutafuta usaidizi kwa matatizo yao,” akasema.

Alieleza kuwa wanaoshiriki uchawi zaidi ni wafanyabiashara, wafanyakazi katika sekta ya umma na kibinafsi pamoja na wanasiasa. Wengine wanaotegemea waganga ni wanaotafuta kazi, wachumba na wanawake wanaotafuta nguvu za kutawala waume zao.

Padre Joseph Wamalwa wa Kanisa Katoliki Nairobi alisema idadi ya waumini wanaovaa hirizi imeongezeka wakitafuta kujikinga na mikosi ya kijamii, kiuchumi au kisiasa.

Padre Wamalwa alisema kuwa shirika la The Pew Research Center kutoka Amerika mwaka jana lilitoa ripoti ikionyesha kuwa Wakenya wengi huabudu sanamu, hutoa kafara, hushiriki ushirikina na pia kuamini maroho ya kuzimu.

“Ripoti hiyo inaonyesha kuwa Kenya imo mbele ya mataifa kama Demokrasia ya Congo, Ethiopia, Nigeria, Zambia na Rwanda katika kuamini ushirikina,” akasema.

Alisema kuwa robo ya Wakenya waliohojiwa, ambao ni waumini wa dini mbalimbali walikubali kuwa wanavaa hirizi na pia hutembelea wachawi maarufu.
Bw George Ongere, ambaye ni Mkurugenzi Mkuu wa Shirika la Center for Inquiry-Kenya, anasema wameandaa mikakati ya kuandaa warsha kote nchini kupambana na ushirikina.

Alisema mikakati hiyo imeanzishwa katika Chuo Kikuu cha Moi ambapo kikundi kiitwacho Moi Freethinkers kitashirikisha juhudi za kuhamasisha wananchi dhidi ya ushirikina na mila ambazo zimepitwa na wakati.

“Hatua kama hiyo inashirikishwa na kikundi kingine kutoka Chuo Kikuu cha Nairobi ambapo tutawatumia wanafunzi wa vyuo vikuu,” akasema Bw Ongere . Aliongeza kuwa wameanzisha jarida liitwalo Skeptical Inquirer ambalo litatolewa bila malipo kwa wananchi kwa lengo la kuwashawishi kutupilia mbali ushirikina.

Padre Paul Kariuki wa Kanisa Katoliki alisema uchawi ni kinyume cha mafunzo ya Ukristo na ni sawa na uabudu shetani.

Naye Kasisi Paul Wanjohi wa Redeemed Gospel alisema kuwa wananchi wanapoteza pesa nyingi kwa wachawi ambao wamefurika katika kila pembe ya nchi na wanatangaza huduma zao waziwazi.

 

 

Makasisi waliotimuliwa kuhusu ushoga wataka korti iadhibu kanisa

Na JOSEPH WANGUI

KANISA Anglikana la Kenya limepuuzilia mbali ombi lililowasilishwa mahakamani na makasisi watatu ambao wanataka ibainishwe lilikiuka agizo la mahakama.

Watatu hao walikuwa wamesimamishwa kazi baada ya kuhusishwa na vitendo vya ushoga.

Kupitia kwa wakili William Muthe, Wadhamini Waliosajiliwa wa Kanisa Anglikana walisema ombi la makasisi hao katika Mahakama ya Leba ya Nyeri halifai.

Makasisi hao John Gachau, James Maigua na Paul Warui, walikuwa wamewasilisha ombi hilo kutaka wadhamini hao waadhibiwe kwa kukiuka agizo lililoamrisha warudishwe kazini.

idha, kupitia kwa wakili wao, Bw Donald Onsare, walimwomba Jaji Nzioki wa Makau aagize wadhamini hao wafungwe gerezani kwa miezi sita kwa kukosa kuwalipa ridhaa ya Sh6.8 milioni.

Walisema wadhamini wa kanisa hilo wamepuuza maagizo mawili yaliyotolewa na Mahakama ya Leba mnamo Septemba 30, 2016.

“Hatua ya washtakiwa kupuuza na kutotii agizo la mahakama ni dharau kwa mahakama hii ya heshima na ni lazima tabia hiyo iadhibiwe,” akasema Bw Onsare.

Alisema kanisa halijatii maagizo hayo licha ya kuwa yaliwasilishwa, na akatoa wito hatua ichukuliwe ili kulinda hadhi na mamlaka ya mahakama.

Wakili huyo alieleza kuwa msimamo wa kanisa kutotii agizo la mahakama unaathiri makasisi hao vibaya na hivyo basi kuwazidishia matatizo ya kimawazo.

Wakijitetea, wadhamini hao walisema ombi hilo lina dosari kubwa na halina msingi kisheria.

Wakili Muthee alisema afisi ya wadhamini wa kanisa ni shirika lililosajiliwa na hivyo basi haiwezekani kulihukumu kifungo cha gerezani.

“Ombi hili halijatimiza matakwa ya Sheria za Ukiukaji wa Maagizo ya Mahakama. Jinsi lilivyonakiliwa, haliwezi kukubalika,” akasema Bw Muthee.

 

 

 

 

Kesi hiyo itaendelea kusikilizwa Aprili 5, 2018 mbele ya Jaji Nzioki Makau katika Mahakama ya Leba ya Nyeri.

Makanisa yasisitiza uchaguzi wa 2017 wafaa kutathminiwa

Na LEONARD ONYANGO

VIONGOZI wa kidini sasa wanataka tathmini ya uchaguzi wa 2017 kufanywa ili kuwe na mabadiliko yatakayohakikisha kuwa chaguzi zijazo zinakuwa huru za haki.

Viongozi hao wakiongozwa na kiongozi wa Baraza la Makanisa Nchini (NCCK) Canali Peter Karanja, walisema kuna mengi ya kujifunza kutokana na uchaguzi wa Agosti 8 na ule wa Oktoba 26 mwaka 2017.

Walipendekeza kwamba badala ya wanasiasa kuchukulia kuwa suala hilo limepita, kuwe na uchunguzi wa kina ili kuwezesha Wakenya kutambua kasoro zilizojitokeza, ili zirekebishwe.

Kwenye taarifa iliyosomwa kwa zamu baada ya kongamano la siku mbili katika jumba la Ufungamano jijini Nairobi, viongozi hao wakiwemo Askofu Martin Kivuva wa Kongamano la Maaskofu wa Kanisa Katoliki (KCCB), walisema tathmini hiyo itaiwezesha nchi kurekebisha sheria za uchaguzi ili kuimarisha chaguzi za siku za usoni.

Wengine waliosoma taarifa hiyo ni Dkt Alfred Marundu wa kanisa la SDA, SB Varma (Baraza la Wahindu), Abdalla Kamwana wa Baraza Kuu la Waislamu (SUPKEM), Askofu John Warari (Evangelical Alliance of Kenya), Sheikh Muhammad Khan (National Muslim Leaders Forum) na Askofu Joseph Mutia (Organisation of African Insititued Churches).

Walisema kufanya hivyo itakuwa hatua muhimu ya kuleta utangamano, baada kuzuka kwa mgawanyiko mkubwa miongoni mwa Wakenya kwa misingi ya kikabila.

“Ili kumaliza mjadala kuhusiana na uchaguzi wa 2017, kuna haja ya kuchukua hatua ya kijasiri zitakazosaidia kuwaunganisha Wakenya na kudumisha amani.

Hatua hizo ni pamoja na kuchunguza kwa kina uchaguzi wa 2017 na kubaini mianya ambayo itazibwa ili tuwe na chaguzi za kuaminika katika siku zijazo,” akasema Askofu Kivuva.

Viongozi hao wa kidini pia walikosoa utendakazi wa maafisa wa polisi baada na kabla ya uchaguzi wa Agosti 8 na Oktoba 26 huku wakilaumu serikali kwa kujikokota kutekeleza mageuzi katika Idara ya Polisi.

 

Inajikokota

“Serikali inajikokota katika kufanikisha mageuzi katika idara ya polisi. Tunafaa kuwa na mdahalo wa kitaifa kuhusiana na magezi haya,” akasema Sheikh Khan.

Idara ya Polisi ililaumiwa kwa kutumia nguvu kupita kiasi dhidi ya waandamanaji wa muungano wa National Super Alliance (NASA) waliokuwa wakipinga matokeo ya uchaguzi wa Agosti 8.

Makundi ya kutetea haki za kibinadamu yalidai kuwa polisi waliua kwa risasi zaidi ya watu 30 wakati wa maandamano hayo. Lakini madai hayo yamepingwa na idara ya polisi.

“Maafisa wa polisi wanafaa kuwa na utu na kuhudumiwa Wakenya wote bila kuwa na upendeleo kwa misingi ya vyama,” akasena Sheikh Khan.

Walisema kuna haja ya kufanyia mabadiliko Katiba ili kujumuisha vipengee vitakavyounganisha Wakenya kabla na baada ya uchaguzi.

Baraza la (NCCK) limekuwa likishinikiza kupanuliwa kwa serikali na kubuni nyadhifa za Waziri Mkuu, Kiongozi wa Upinzani ili kuhakikisha kuwa wawaniaji maarufu wananufaika hata baada ya kupoteza uchaguzi.