Nairobi yaongoza maambukizi, Mombasa kwa vifo

Na JUMA NAMLOLA

KAUNTI ya Nairobi inaongoza kwa idadi ya maambukizi ya virusi vya corona huku Mombasa ikiongoza kwa watu walioaga dunia kutokana na ugonjwa wa Covid-19.

Wizara ya Afya ilitangaza kwamba kati ya visa 963 vilivyoripotiwa kufikia Jumanne, Nairobi ina 470.

Aidha, kati ya vifo 50, Mombasa imechangia 27.

Waziri wa Afya, Bw Mutahi Kagwe aliyetokea kwa mara ya kwanza katika kipindi cha wiki nzima, alisema jana kuwa, kati ya watu 1,933 waliopimwa kuna wanaume 32 na wanawake 19 waliambukizwa.

“Kufikia leo (jana Jumanne), tumepima jumla ya watu 46,784. Tunafurahi kuwa watu wengine 22 wameruhusiwa kurudi nyumbani, na kufanya idadi ya waliopona kuwa 358,” akasema.

Orodha ya kaunti kumi zinazoongoza kwa maambukizi inaonyesha Mombasa inachukua nafasi ya pili kwa visa 331. Maambukizi katika kaunti nyingine ni; Kajiado (43), Mandera (18), Kiambu (17) na Wajir (16). Migori ina visa 14, Kilifi (10), Kwale (7) huku Kitui na TaitaTaveta zikiwa na visa vitano kila moja katika nafasi ya kumi.

Takwimu zinaonyesha kwamba watu wa umri wa kati ya miaka 20 na 39 ndio walioambukizwa zaidi.

Waziri Kagwe alisema kati ya vifo 50, Mombasa kuna watu 27 waliokufa ikifuatwa na Nairobi (20) huku Siaya, Bomet na Kiambu zikiwa na kisa kimoja kimoja.

Alionya kwamba vifo hivyo vinaweza kusababisha maambukizi zaidi iwapo vitatokea nyumbani.

“Idadi kubwa ya waliofariki Mombasa walikuwa nyumbani. Hii inahatarisha maisha ya watu wengi zaidi, ikizingatiwa kuwa huenda watu waliwazika bila kuzingatia kanuni za usalama,” alieleza.

Waziri wa Ushirikiano wa Afrika Mashariki, Bw Adan Mohamed alionekana kupuuza mzozo uliopo kati ya Kenya na Tanzania kuhusu mipaka yao.

Alisema, kinyume na taarifa kuwa Tanzania imezuia madereva wa matrela kutoka Kenya, magari hayo yanaendelea kusafiri kati ya pande zote mbili.

Siku ya Jumatatu, Mkuu wa Mkoa wa Tanga, Bw Martine Shigela, alitoa maagizo kwa walinzi wa mpakani eneo la Horohoro, kwamba wasiwaruhusu madereva kutoka Kenya kuingia Tanzania.

Bw Shigela alisema malori pekee kutoka Kenya yatakayoruhusiwa ni yale yanayopeleka mizigo katika mataifa ya Malawi, Rwanda, Msumbiji na kadhalika.

Lakini Jumanne Bw Mohamed alisema hali iko shwari na madereva wa Kenya wanaendelea kupimwa virusi vya corona na kuvuka mpaka huo.

Corona kuvuruga kalenda ya soka ya kimataifa kwa hadi miaka mitatu

Na CHRIS ADUNGO

COVID-19 huenda ikaathiri kalenda ya soka ya kimataifa kwa kipindi cha miaka miwili au mitatu.

Haya ni kwa mujibu wa Lars-Christer Olsson ambaye ni mwanachama wa kamati ya soka ya bara Ulaya (Uefa).

Olsson ambaye pia ni Rais wa Ligi za Ulaya, amesema kwa sasa itakuwa ni suala la kusubiri na kuona hali itakavyokuwa ili kuweza kutathmini athari za janga la corona katika mapambano mbalimbali, zikiwemo fainali za Kombe la Dunia za 2022 nchini Qatar.

Uefa ina matumaini ya kumaliza kampeni za Klabu Bingwa Ulaya (UEFA) na Europa League mnamo Agosti 2022.

Uamuzi wa iwapo hilo linawezekana au la unatarajiwa kutolewa Mei 18, 2020.

Pia kuna mipango ya kuratibu michuano mara tatu badala ya mara mbili katika ngazi ya soka ya kimataifa kama vile Euro 2020, michuano ya ligi ya taifa na mechi za kirafiki.

Kwa mujibu wa Olsson, itakuwa heri zaidi msimu wa sasa usimalizike badala ya kuchelewa kuanza kampeni za msimu ujao.

“Sina shaka kwamba kalenda yetu itaathirika kwa miaka miwili au mitatu,” akasema Olsson akitoa maoni yake kuhusu kusitishwa kwa michezo ya soka katika nchi mbalimbali na pia kuahirishwa michuano ya Euro 2020.

Awali, alikuwa ameshikiliwa kwamba hakuna maridhiano miongoni mwa mataifa kuhusu michuano ya ndani ya nchi, kwa sababu kila nchi inakabiliwa na hali tofauti baada ya kuathiriwa na janga la corona kwa viwango tofauti.

Ligi mbili za hadhi ya juu nchini Ufaransa, Ligue 1 na Ligue 2, hazitarejelelewa kabisa msimu huu baada ya Ufaransa kupiga marufuku michezo yote licha ya mapendekezo kwamba ichezewe ndani ya viwanja vitupu hadi Septemba 2020.

Ligi ya Uholanzi ilisitishwa wiki jana huku kukikosekana klabu iliyopandishwa daraja, kushushwa ngazi wala kutangazwa mshindi.

Alipoulizwa kuhusu utaraibu wa kushirikisha PSG na Ajax, katika kipute cha UEFA baada ya ligi za Ufaransa na Uholanzi kuhitimishwa, Olsson alisema, “Hili ni jambo gumu kulizungumzia lakini katika hali yoyote ile, masuala yasiyo ya kawaida huhitaji utatuzi usio wa kawaida.”

“Kwa sasa tunaendelea na mipango, tunajaribu kupiga hatua katika kufanikisha maandalizi ya mechi zilizosalia msimu huu katika kipindi cha mwezi mmoja wa Agosti,” akatanguliza.

“Kama hilo litafanikiwa, basi nafikiri tutaweza kuhifadhi uhalisia wa michuano yote ya kimataifa ya kandanda. Itatupasa kurejelea kampeni hizi kufikia mwishoni mwa Mei kwa sababu zaidi ya hapo, hakika itakuwa vigumu kwa mipango hii kufaulu,” akaongeza.

Huku ikisalia miaka miwili pekee kwa michuano ya Kombe la Dunia kufanyika, Olsson anakiri kwamba kutakuwa na matatizo makubwa katika kalenda ya kimataifa.

“Pale ambapo baadhi ya michuano itaahirishwa kwa mwaka mmoja zaidi katikati ya msimu, hapo kutakuwa na athari. Lakini nafikiri kwanza inatupasa kusubiri na kuona ni kwa namna gani athari hizi zitaendelea,” akasisitiza.

Jamii ya Wamakonde yalalama imetengwa katika ugavi wa chakula

Na MISHI GONGO

JAMII ya Wamakonde wanaoishi eneo la Makongeni, Msambweni katika Kaunti ya Kwale, ina malalamiko kuhusu kutengwa katika ugavi wa chakula unaoendelea katika kaunti hiyo.

Wanasema japo Rais Uhuru Kenyatta aliitambua jamii hiyo kuwa kabila la 43 nchini, wameendelea kubaguliwa katika ugavi wa misaada ya chakula kinachoendelea kutolewa kuwasaidia wasiojiweza katika jamii kipindi hiki ambapo janga la corona limelemaza shughuli mbalimbali za kiuchumi.

Baadhi ya wakazi hao wamelalamikia majina yao kutolewa katika orodha ya wanaofaa kusaidika na misaada ya chakula kutoka kwa serikali ya kaunti kwa kile wanachokitaja kuwa ni viongozi kudai kwamba jamii hio haitambuliwi

Maureen Thomas akisikitishwa na jinsi alivyokosa nafasi katika mradi wa kazi mtaani ulioanza siku tatu zilizopita ili kuwapiga jeki vijana wakati huu ambapo taifa linapigana na janga la corona.

Hata hivyo, mzungumzaji wa jamii hiyo aliwataka wakazi hao kuwa na subira shughuli hiyo itakapoendelea.

Awali Gavana wa Kaunti ya Kwale Salim Mvurya aliwahakikishia wakazi wa kaunti hiyo kuwa familia zote zisizojiweza zitanufaika na chakula hicho.