Wahubiri wataka michango ya wanasiasa kanisani itolewe kisiri

Na VALENTINE OBARA

VIONGOZI wa dini nchini sasa wamependekeza kuwa michango ya wanasiasa makanisani na katika taasisi nyingine za kidini iwe ikitolewa kisiri.

Kupitia kwa muungano wao wa kujadili changamoto za kitaifa, viongozi wa dini mbalimbali walisema wanasiasa wakomeshwe kutangaza michango wanayotoa wakati wa harambee za taasisi za kidini ili taasisi hizo zisionekane kama kwamba zinafaidi kutokana na ufisadi au zinatakasa wafisadi.

Kwa muda mrefu, viongozi wa kidini hasa wa makanisa wamekuwa wakishambuliwa kwa maneno na baadhi ya wananchi wakiwemo wanasiasa wanaochukizwa na mitindo hiyo ya wenzao, kwa kupokea mamilioni ya pesa ambazo hazijulikani zinakotoka.

“Taasisi za kidini hazifai kukubali michango hadharani kutoka kwa wanasiasa waliochaguliwa au viongozi wengine wa kisiasa wala maafisa wa kitaifa, ambayo hutolewa kwa shamrashamra kubwa. Michango kutoka kwa watu aina hii inafaa kutolewa kisiri na kibinafsi sawa na jinsi waumini wengine wote wanavyofanya,” wakasema, kwenye taarifa iliyochapishwa katika baadhi ya magazeti jana.

Baadhi ya viongozi wa kisiasa ambao wamewahi kujitokeza wazi kupinga jinsi makanisa yanavyopokea mamilioni ya pesa za wanasiasa ni Mbunge wa Nandi Hills, Bw Alfred Keter, na Kiongozi wa Chama cha Thirdway Alliance, Dkt Ekuru Aukot.

Mmoja wa wanasiasa mwenye umaarufu wa kutoa michango mikubwa ya pesa makanisani ni Naibu Rais William Ruto, ambaye amekuwa akipuuzilia mbali mahasimu wake wanaomhusisha na ufisadi.

 

Pesa za ufisadi

Hata hivyo, viongozi wa kidini wamekuwa wakijitetea kuwa ni vigumu kutofautisha kati ya pesa zilizopatikana kutoka kwa ufisadi, na pesa zinazopatikana kwa njia ya haki ambazo hutolewa wakati wa mchango.

Muungano huo wa kidini unajumuisha makundi mbalimbali kama vile Shirikisho la Kievanjelisti la Kenya, Baraza la Wahindu la Kenya, Baraza la Maaskofu wa Kanisa Katoliki, Baraza la Kitaifa la Makanisa ya Kenya, Baraza la Kitaifa la Viongozi wa Kiislamu, Shirika la Makanisa ya Kiafrika, Kanisa la Kiadventista la Sabato, Chama cha Kiislamu cha Shia Ithnashari na Baraza Kuu la Waislamu la Kenya.

Mbali na suala hilo la ufisadi, muungano huo ulikariri misimamo yake kuhusu marekebisho ya katiba ambapo huwa unapigia debe kuundwa kwa nafasi zaidi katika kitengo kikuu cha utawala wa taifa ili kuwe na waziri mkuu na manaibu wake wawili.

Viongozi hao walipendekeza pia marekebisho ya katiba yafanywe ili mgombeaji urais anayeibuka wa pili katika Uchaguzi Mkuu awe akiachiwa wadhifa wa kiongozi wa upinzani katika bunge la taifa, na mgombea mwenza wake aongoze upinzani katika seneti, na tume maalumu ibuniwe kuongoza utekelezaji wa ripoti ya Tume ya Ukweli, Haki na Maridhiano (TJRC).

Kuhusu ugatuzi, wamependekeza ugavi wa fedha kwa serikali za kaunti uongezwe hadi kiwango kisichopungua asilimia 30.

Waziri na wabunge 13 watoa Sh1,216 pekee kwa mchango

KIBOGA, UGANDA

Na JOSEPH KATO

WAKAZI wa kijiji cha Kibiga, Wilaya ya Kiboga, walipigwa na butwaa Jumanne wakati Waziri wa Jinsia, Peace Mutuuzo, akiandamana na wabunge 13 na maafisa wa utawala wa Kiboga walipotoa mchango wa Sh1,216 pekee (Sh45,000 za Uganda) kwa mwanamke mkongwe anayelea wajukuu zaidi ya 10 mayatima.

Pesa hizo zillikabidhiwa kwa nyanya huyo mwenye umri wa miaka 80, Teresa Namuli, na waziri pamoja na kilo mbili za sukari na mikate.

“Mimi si waziri lakini nikiwa na pesa, kile kiwango kidogo zaidi ninachoweza kutoa ni Sh270 (Sh10,000 za Uganda) au ninunue bidhaa mbalimbali niwape watu. Sielewi jinzi wabunge na mawaziri wanaweza kutoa pesa kidogo hivyo kwa familia yenye mahitaji mengi,” akasema mkazi, Robert Katumwa.

Bi Namuli anaishi kwenye nyumba ya matope iliyozeeka na baadhi ya wajukuu wake wamecha kwenda shuleni kwa sababu hawana uwezo wa kugharamia masomo.

Imekusanywa na Valentine Obara

Ruto afuta ziara ya harambee katika shule ambako wazazi wanapunjwa

Na NDUNGU GACHANE

NAIBU Rais William Ruto, amefutilia mbali ziara ya Shule ya Upili ya Murang’a ambapo alitarajiwa kuongoza mchango Aprili 6, baada ya wazazi kulalamika kuwa wanalazimishwa kulipa Sh40,000 za ziada.

Harambee hiyo ililenga kuchangisha pesa za kujenga ukumbi, mabweni, madarasa, kituo cha teknolojia kilicho na maabara ya Teknolojia ya Habari na Mawasiliano, na bwawa la kuogelea.

Mkuu wa shule hiyo, Bw Alex Kuria, alikuwa ameambia wazazi walipe pesa hizo kabla Aprili 6.

Mzazi ambaye aliomba asitajwe jina alisema wasimamizi wa shule hiyo walikuwa wanalazimisha wazazi kulipa pesa hizo kabla siku ya harambee ambayo ingesimamiwa na Bw Ruto.

“Awali tulikuwa tumeambiwa tuchangishe Sh50,000 lakini baadaye kiwango hicho kikapunguzwa kwa Sh10,000. Hatukushauriwa kuhusu suala hilo na tulikuwa tunalazimishwa tu, na hiyo si haki,” akasema.

Seneta wa Murang’a, Bw Irungu Kang’ata, alithibitisha Bw Ruto ameahirisha ziara hiyo lakini hakutoa sababu zake. “Ni kweli naibu rais amenijulisha hatazuru shule hiyo wiki hii lakini hakueleza kama msimamo wake umetokana na malalamishi ya wazazi kwamba wanalazimishwa kulipa pesa kwa harambee,” akasema.

Seneta huyo alisema Bw Ruto alipangiwa kuzuru Shule ya Upili ya Murang’a iliyo mjini Murang’a na Shule ya Upili ya Kiaraithe iliyo Kangema.

Taifa Leo ilibainisha kuwa wanachama ya Bodi ya Usimamizi wa shule hiyo na Chama cha Wazazi na Walimu walikutana kwa muda mrefu Alhamisi iliyopita kujadili hatua itakayochukuliwa kufuatia malalamishi ya wazazi na uamuzi wa Bw Ruto kutohudhuria harambee.

“Tulikuwa tunatarajia mchango mkubwa kutoka kwa naibu rais ambaye amekuwa akishiriki kwenye michango ya shule hii tangu mwaka wa 2015 lakini tunatumai atapanga kuwa nasi siku nyingine,” mmoja wa wanachama wa bodi hiyo akasema, na kuomba asitajwe.

Mkurugenzii wa Elimu katika Kaunti ya Murang’a, Bi Victoria Mulili, alisema maafisa kutoka kwa Wizara ya Elimu walichunguza kama shule ilifuata kanuni kabla kutoza wazazi pesa hizo, na uamuzi utatolewa hivi karibuni.

Kanuni huhitaji wasimamizi wa shule waandike barua kwa Bodi ya Elimu ya Kaunti kuomba ruhusa ya kutoza wazazi fedha.

Baada ya hapo, afisi ya mkurugenzi wa elimu katika kaunti hutakikana kuwasilisha ombi hilo kwa Waziri wa Elimu ambaye ndiye huamua kama ni sawa wazazi kutozwa ada zozote.

Mbali na hayo, wazazi ambao watoto wao walikamilisha masomo katika shule hiyo pia walilalamika kuwa watoto wao wamenyimwa vyeti vyao vya kukamilisha elimu ya sekondari kwa kuwa hawajalipa Sh40,000 zilizotakikana.

“Tulikuwa tumefanya harambee mwaka uliopita tukaambiwa na mwalimu mkuu tulipe Sh40,000 ambazo siwezi kugharamia. Cheti cha mwanangu bado kimekwama. Anahitajika kujiunga na chuo kikuu,” akasema mzazi.

Niliporwa mamilioni niliyochangiwa na Wakenya – Miguna Miguna

Na CHRIS WAMALWA

MWANAHARAKATI wa vuguvugu la NRM, Miguna Miguna amedai kuibiwa Sh2 milioni alizochangiwa na Wakenya wanaoishi Amerika.

Dkt Miguna, ambaye anarejea nchini Jumatatu, alielekeza kidole cha lawama kwa kundi la Wakenya waliopanga mikutano kadhaa aliyoandaa katika mji wa Dallas katika jimbo la Texas kwa wizi huo uliofanyika Machi 10.

Bw Steve Aseno ndiye alikodi ukumbi wa mkutano na kupanga safari za Dkt Miguna.

Mwanasiasa huyo alitoa hotuba mjini Dallas, shughuli iliyofuatwa na mchango wa fedha za kuwalipa mawakili wake na kukarabati makazi yake katika mtaa wa Lavington, Nairobi yaliyoharibiwa na polisi waliotumwa kumkamata.

Dkt Miguna alidai kwa sauti ya juu kwamba, Bw Aseno ndiye alipora pesa zilizokusanywa katika mkutano wa Dallas.

Hata hivyo, Bw Aseno amekana madai hayo, akisema yeye ndiye alilazimika kutumia Sh100,000 zake mwenyewe.

Promota huyo alisema hafla ya kuchanga pesa ilifeli Dkt Miguna alipoanza kumshambulia kiongozi wa NASA Raila Odinga kwa kuamua kushirikiana na Rais Uhuru Kenyatta.

Bw Aseno alisema wafuasi wengi wa Bw Odinga ambao walikuwa wamethibitisha kuhudhuria shughuli hiyo walibadili nia Dkt Miguna alipoanza kushambulia Bw Odinga.

 

Adhabu ya kumkejeli Raila

“Ni wageni 114 pekee walihudhuria. Walitozwa Sh2,000 kila mmoja kama ada ya kungia ukumbini, Sh1,000 kwa kupiga picha na Miguna na Sh500 ili kupewa picha ya Raila. Kwa sababu Miguna alikuwa akitoa matusi dhidi ya Raila, hakuuza picha zozote wala kupata nafasi ya kupigwa picha na wageni waliohudhuria.

Hii ndio maana michango ilikuwa finyu zaidi,” Bw Aseno akesema kwenye mahojiano na “Taifa Jumapili”.

Promota huyo alisema alimkabidhi Dkt Miguna Sh119,500 zilizopatikana kutokana na mchango na Sh15,000 za mauzo ya picha, akisema haelewi ni kwa nini mwanasiasa huyo anadai kuwa yeye na wasaidizi wake walimwibia Sh2 milioni.

Wakati huo huo, Msomi Profesa David Monda anayeishi Amerika asema, huenda Dkt Miguna akakumbana na hali tofauti kabisa ya kisiasa baada ya Bw Odinga kukubali kushirikiana na Rais Kenyatta.

“Mandhari ya kisiasa nchini Kenyatta yamebadilika baada ya Rais Kenyatta kusalimiana kwa mkono na Bw Odinga. Miguna atabaini kuwa bila Raila hakuna NASA, na hata vuguvugu lake la NRM halipo tena.

Vijana wengi kutoka Luo Nyanza wanaweza kuhatararisha maisha yao kwa sababu ya Raila lakini hawawezi kufanya hivyo kwa Miguna,” akasema Profesa Monda.

Aliongeza: “Hulka yake ya makabiliano kila wakati, kando na ujasiri wake, ilidhihirika wakati wa ziara yake. Hali hiyo ilionekana wazi jinsi alivyopuuza maswali kutoka kwa washiriki na kuwashambulia wanasiasa akiwemo Bw Odinga. Amejitenga na wafuasi wa NASA,” alisema.

Miguna Miguna sasa awaomba Wakenya wamchangie hela arudi nchini

Na WYCLIFFE MUIA

WAKILI Mbishi Miguna Miguna sasa anawaomba Wakenya wakarimu wamchangie pesa za nauli ya ndege ili aweze kurejea nchini kutoka Canada, kuendeleza kampeni za mageuzi ya uchaguzi.

Kupitia mtandao wake wa Twitter, Bw Miguna vilevile anaomba mchango wa pesa za kuwalipa mawakili waliomtetea mahakamani pamoja na pesa za kugharamia ukarabati wa nyuma yake.

“Nahitaji nauli ya kurudi nyumbani. Pia nahitaji pesa za kujenga upya nyumba yangu iliyoharibiwa. Mawakili wangu waliotetea uraia wangu kortini pia hawajalipwa tangu Februari. Unaweza kunichangia? Kuwa huru kufanya hivyo,” Bw Miguna aliandika katika akaunti yake ya Twitter.

Wakili huyo alitimuliwa nchini mnamo Februari 6 hadi Canada na serikali ya Kenya ikampokonya pasipoti yake baada ya kudaiwa kuwa nchini kinyume cha sheria.

Dkt Miguna aliwafokea waliomtaka atumie hela zake mwenyewe akisema wameleweshwa na wizi wa mali ya umma. Picha/ Twitter

Waziri wa Usalama wa Ndani Dkt Fred Matiang’i alisema Bw Miguna alijivua uraia wake wa Kenya miaka ya1980 na akapata uraia wa Canada.

Hata hivyo, mnamo Februari 16 Mahakama Kuu iliagiza serikali kumrejeshea wakili huyo vyeti vyake vya usafiri na kumpa nafasi ya kerejea Kenya.

Akitoa agizo hilo Jaji Chacha Mwita alisema Miguna yuko huru kutumia pasipoti ya Canada kurejea Kenya iwapo serikali itamnyima pasipoti ya Kenya.

Akiwahutubia wafuasi wa muungano wa NASA nchini Canada, Bw Miguna alisema anahitaji kurudi Kenya ili apambane na uongozi wa Rais Uhuru Kenyatta na Naibu wake William Ruto.

Aliwataka Wakenya wanaoishi Canada waungane naye kushinikiza mageuzi ya uongozi nchini akisema kinara wa upinzani Raila Odinga anaendelea kuzeeka hivyo sharti watu warithi nafasi yake.

“Raila sasa ana miaka 73 na kwa sababu ni binadamu hataishi milele..atakufa tu. Ni lazima tujipange kuendeleza juhudi za ukombozi wa Kenya,” alisema Bw Miguna.

Familia yakabiliwa na mzigo wa kulipia upasuaji wa binti yao

Na PETER MBURU

Kwa Muhtasari:

  • Babake Jane Wacuka, aliamua kumgawia sehemu ya ini lake asimwone akiteseka tena
  • Familia hiyo masikini ilifanya mchango na kupata Sh3 milioni
  • Kadri anavyokua Wacuka, ini lake linazidi kuwa dogo

FAMILIA moja katika eneo la Bahati, Nakuru inatatizwa na mzigo wa kulea binti wa miaka 14, ambaye anasumbuliwa na ugonjwa wa ini.
Ingawa mzazi wa mtoto huyo, Bw Geoffrey Warui aliamua kumgawia bintiye sehemu ya ini lake, shughuli hiyo inafaa kufanywa nchini India.

“Inaniuma sana kumwona mwanangu akiteseka kila wakati, amekuwa na matatizo mengi ya afya ambayo yameishia kuathiri elimu yake. Niliamua kumgawia sehemu ya ini langu nisimwone akiteseka tena,” Bw Warui akaeleza Taifa Jumapili.

Msichana Jane Wacuka, 14, amekuwa na ugonjwa wa ini (Liver Cirrhosis) tangu akiwa na miezi sita, jambo ambalo limetatiza hali ya maisha yake na elimu.
Leo, familia hiyo itakuwa ikifanya mchango nyumbani kwao eneo la Ndundori ili kujaza pesa zilizosalia.

Matibabu hayo ambayo yatahusisha upasuaji wa baba na bintiye kwa takriban saa 15, utafanyika katika hospitali moja nchini India na yatagharimu Sh7 milioni.

Familia hiyo masikini ilifanya mchango na kupata Sh3 milioni ambapo wazazi walizuru India mnamo Januari 14 pamoja na binti yao kwa ajili ya upasuaji, wakiwaacha marafiki na familia wakichangisha pesa zilizosalia.

“Utakuwa upasuaji wa wazi baina yangu na binti yangu tukiwa katika chumba kimoja na utaendeshwa na vikosi vitatu vya madaktari watano kila kimoja, kwa saa tano,” Bw Warui akaeleza.

Serikali ya kaunti ya Nakuru imekuwa ikishirikiana na familia hiyo kutoa msaada na iliahidi kuzidi kuwashika mkono.

“Tunaamini kuwa pesa zilizosalia zitapatikana ili mtoto huyo apone na erejelee maisha ya afya bora,” Spika wa kaunti Joel Kairu akasema.

Kulingana na babake mtoto huyo, kadri anavyokua Wacuka, ini lake linakuwa dogo na hivyo inakuwa vigumu kwa mwili wake kuendesha shughuli zake kikamilifu.