Caroline Mwatha aliuawa na polisi – Orengo

NA CAROLINE MUNDU

VIONGOZI katika Kaunti ya Siaya, wamepuuzilia mbali ripoti ya uchunguzi wa polisi iliyoonyesha mwanaharakati Caroline Mwatha aliaga dunia kupitia uavyaji mimba.

Wanasiasa hao pamoja na familia ya marehemu, sasa wanataka uchunguzi wa kina kufanywa ili kutegua kitendawaili cha kilichomuua mwanaharakati huyo, aliyefahamika sana mtaani Dandora kwa kuwatetea raia.

Wakiongozwa na Seneta James Orengo, Mbunge Mwakilishi wa Wanawake, Dkt Christine Ombaka, Mbunge wa Rarieda, Otiende Amollo na mwenzake wa Gem, Elisha Odhiambo, viongozi hao walikemea matokeo ya uchunguzi wa polisi wakati wa mazishi ya mwanaharakati huyo katika kijiji cha Asembo, eneobunge la Rarieda, Kaunti ya Siaya.

Bw Orengo alisikitika kwamba mauaji ya kiholela ya wanaharakati na kupotea kwa watu kwa njia tatanishi yanaendelea kuongezeka kwa kiwango cha kutisha nchini, huku polisi wanaohusika wakisalia huru bila kuchukuliwa hatua.

“Tunataka majibu kuhusu kifo cha Bi Mwatha. Hatujaridhishwa na uchunguzi uliofanywa na polisi kuhusu kifo cha mwanamke huyu. Tabia ya polisi kuwatekea wanaharakati kisha kuwaua kwa njia tatanishi lazima ikome,” akasema Seneta Orengo.

“Hatujasahau jinsi marehemu Musando alivyouawa kinyama. Tunawaambia polisi kuchunguza visa hivi kwa makini kabla hawajazungumza kuvihusu,” akasema.

Matamshi ya seneta huyo yaliungwa mkono na Bw Odhiambo, ambaye aliwataka polisi kufuata sheria badala ya kutoa ripoti aliyosema inaficha ukweli kuhusu mauaji ya Bi Mwatha.

“Walioshiriki mauaji ya msichana huyo lazima waadhibiwe kisheria, na ikiwa ni polisi waliohusika, nawalaani kabisa. Lazima tuheshimu uhai wa binadamu wenzetu,” akasema Bw Odhiambo.

Mumewe marehemu, Joshua Ochieng’ ambaye alizidiwa na hisia wakati wa ibada ya mazishi, alimtaja mkewe kama shujaa atakayekumbukwa na wengi.

“Nimempoteza rafiki na mke. Alikuwa shujaa atakayekumbukwa sana,” akasema Bw Ochieng’ akidondokwa na machozi.

Stanslaus Mbai, babake Bi Mwatha alisema mwanawe hakuwa mjamzito na kudai kwamba alikatwa tumboni kisha kijusi kikawekwa ndani.

MATHEKA: Heko kwa maafisa wetu wa polisi kwa kazi murua

Na BENSON MATHEKA

IWAPO kuna kitu kilichonifurahisha wiki iliyopita, ni utendakazi wa maafisa wa polisi.

Ninajua kwamba huwa wanafanya mengi katika kazi yao ya kudumisha usalama kwa wote na haikuwa tofauti na wiki jana.

Hata hivyo, ninataka kutaja matukio matatu ambayo yalinifanya kuwaonea fahari maafisa wetu wa polisi na nitaeleza ni kwa nini. Kwanza, wiki iliyopita ilianza kwa ripoti kuhusu kutoweka kwa mwanaharakati Carole Mwatha mtaani Dandora, Nairobi.

Hofu ya wengi ilikuwa kwamba mwanaharakati huyo ambaye mwili wake ulipatikana katika mochari ya City baada ya siku sita, alikuwa ametekwa nyara na kuuawa kwa sababu ya kulaumu polisi kwa mauaji ya kiholela mtaani humo.

Kwenye mitandao ya kijamii, polisi walirushiwa kila aina ya lawama, watu wakasahau kwamba wanawahitaji kwa usalama wao kila siku.

Kile ambacho raia hawakufahamu ni kwamba wapelelezi walikuwa wakifanya kazi yao kwa kufuatilia simu ya mwanaharakati huyo hadi wakagundua kwamba alikuwa katika hospitali moja mtaani humo na sababu ilikuwa ni kujaribu kutoa mimba.

Cha kusikitisha ni kuwa polisi wasingemuokoa kwa sababu wakati walipopata habari kuhusu kutoweka kwake, alikuwa ameaga dunia.

Licha ya lawama za kila aina, kutoka kwa raia na makataa kutoka kwa wanaharakati, polisi walifanya kazi yao na kuwakamata washukiwa na kuwafikisha kortini kwa wakati.

Joto lilitulia upasuaji wa maiti uliofanywa na mwanapatholojia huru kuthibitisha kwamba mwanaharakati huyo aliaga dunia akijaribu kutoa mimba.

Polisi walibeba lawama lakini walidumisha utaalamu wa hali ya juu kuchunguza mauaji hayo na wanafaa kupongezwa. Naomba kumpongeza kiongozi wa uchunguzi huo, Inspekta Mkuu Joseph Wanjohi wa ofisi ya upelelezi ya Dandora kwa ustadi, utulivu na utaalamu wake katika uchunguzi wa kutoweka na mauaji ya Bi Mwatha.

Funzo

Hapa kuna funzo kwa Wakenya kwamba wanafaa kuwa na subira na kuwapa maafisa wa usalama nafasi ya kufanya kazi yao. Muhimu kwa umma ni kushirikiana na polisi kwa kutoa habari muhimu badala ya lawama.

Aidha, ni wiki jana ambapo aliyekuwa afisa wa cheo cha juu alihukumiwa kunyongwa kwa mauaji, ishara kwamba sheria ikifuatwa kikamilifu haki itatendeka kwa wote.

Katika kisa kingine, Kaunti ya Nyeri wiki jana, polisi walimtia mbaroni mshukiwa wa kujitoa mhanga akielekea katika chuo kimoja kikuu na kumpata na vifaa vilivyoshukiwa kuwa vilipuzi.

Najua kwamba polisi wamefaulu kuzima mashambulio mengi lakini ninahisi kukamatwa kwa mshukiwa huyu huenda kulizuia hasara kubwa hasa ikikumbukwa mkasa wa chuo kikuu cha Garissa.

Tukio jingine ambalo polisi walidhihirisha ustadi wao wiki jana ni kumsaka na kumkamata mshukiwa aliyekuwa akijifanya chokoraa. Picha ya mhalifu huyo iliposambazwa katika mitandao ya kijamii akiwa na bastola, polisi walichukua hatua za haraka na kumnasa.

Hili ni funzo kwa Wakenya kwamba wakitoa habari za kuaminika kwa polisi, visa vya uhalifu vinaweza kukabiliwa vilivyo.

Kitendawili cha mauaji ya wanawake Nairobi

Na WYCLIFFE MUIA

MWILI wa mwanaharakati Caroline Mwatha Ochieng Jumanne ulipatikana katika hifadhi ya maiti ya City, Nairobi, siku saba baada ya mwanaharakati huyo kuripotiwa kutoweka mtaani Dandora, Nairobi.

Maafisa wa polisi wanaochunguza kisa hicho walidokezea Taifa Leo kuwa mwili wa mwanaharakati huyo ulipelekekwa na ‘raia wa kawaida’ kutoka Hospitali ya Kenyatta (KNH), Nairobi.

Rekodi za polisi zinaonyesha kuwa mwili wa Bi Mwatha ulitolewa katika Hospitali ya Kenyatta na mtu aliyejitambulisha kama mumewe.

Maafisa wanaochunguza kesi hiyo wanasema mtu huyo aliyejitambulisha kama mkewe mwanaharakati huyo alipata kibali kutoka kituo cha polisi cha Kenyatta ili kupeleka mwili wake katika hifadhi ya maiti ya City.

Polisi walidai kuwa Bi Mwatha, ambaye ni mama wa watoto wawili, alikuwa na ujauzito wa miezi mitano na alikufa akijaribu kuavya mimba katika kliniki moja jijini Nairobi.

“Mmiliki wa kliniki pamoja na daktari mmoja walijitokeza na kukiri kuwa walipeleka mwili wake katika Mochari ya City na kuandikisha jina lisilo lake na kuripoti kuwa alikufa baada ya kuhara,” afisa wa polisi ambaye hakutaka jina lake litajwe alisema.

Maafisa wa ujasusi waliambia shirika la AFP kuwa waliona jumbe za simu zilizohusu mpango wa Bi Mwatha wa kuavya mimba.

Msemaji wa Polisi Charles Owino alithibitisha kukamatwa kwa mmiliki huyo wa kliniki na daktari husika.

“Wawili hao ambao ndio waliopeleka maafisa wa ujajusi katika mochari wanaendelea kuzuiliwa na polisi,” alisema Bw Owino.

Uavyaji mimba ni haramu nchini Kenya na sharti kliniki au daktari awe na leseni ya kuavya mimba iwapo maisha ya mama yamo hatarini.

Caroline Mwatha aliyekuwa mwanaharakati wa shirika la Dandora Community Social Justice Centre aliyepatikana ameuawa jana na mwili wake kupelekwa katika mochari ya City, Nairobi. Picha/Hisani

Polisi wanasema mwili wa mwanaharakati huyo ulipelekwa katika mochari ya City Februari 7 lakini familia ilisema haikupata mwili wake siku hiyo hiyo ilipokuwa inatafuta mwili wake eneo hilo.

Baadhi ya jamaa zake walisema mwili wa Bi Mwatha haukuwa na majeraha yoyote lakini wakapinga madai ya polisi kuwa aliaga akiavya mimba.

Mashirika ya kijamii yalikuwa yameanza maandamano kushinikiza polisi wamtafute Bi Mwatha hasa ikizingatiwa kuwa alikuwa mwanaharakati aliyepinga mauaji ya polisi ya kiholela kupitia shirika la Dandora Community Social Justice Center .

Kifo cha Bi Mwatha kinajiri siku chache baada ya vifo vingine viwili vya Mildred Odira na Mary Wambui vilivyowaacha Wakenya wengi na maswali.

Bi Odira, ambaye alikuwa mtaalamu wa simu katika kampuni ya habari ya Nation Media Group (NMG) alitekwa nyara katika hali tatanishi, ambapo mwili wake ulipatikana baadaye katika mochari ya City, Nairobi baada ya kutafutwa kwa zaidi ya wiki moja na familia yake.

Kilichoibuka baada ya upasuaji wa mwili huo ni kwamba aliuawa kinyama -kabla ya kutupwa barabarani na kukanyagwa na magari.

Naye Wambui ambaye mwili wake ulipatikana eneo la Ruiru anadaiwa kuuawa katika nyumba ya mpenzi wa mumewe eneo la Kiambu kabla ya mwili wake kusafirishwa kwenda kutupwa.

Mwezi uliopita, mwanafunzi Carilton Maina alipatikana ameuawa kitatili katika mtaa wa Kibera jijini Nairobi, ambapo mwili wake ulikuwa na majeraha ya risasi.

Ripoti zilisema mwanafunzi huyo wa Chuo Kikuu cha Leeds, Uingereza, aliuawa na polisi kwa kutuhumiwa kuwa miongoni mwa kundi la vijana waliokuwa wakiwahangaisha wakazi.

Mnamo 2016 wakili Willie Kimani na mteja wake pamoja na dereva wa teksi walipatikana wameuwa kinyama na miili yao kutupwa mtoni.