Klabu yatumia madoli kama ‘Samantha’ yawe ‘mashabiki’

Na CHRIS ADUNGO

KLABU ya FC Seoul nchini Korea Kusini imeomba msamaha kwa kutumia madoli kama ‘Samantha’ kujaza viti ambavyo kwa kawaida, hukaliwa na mashabiki wanaofika uwanjani kuhudhuria mechi.

Shughuli za soka zimeanza kurejelewa katika baadhi ya mataifa kama vile Ujerumani, Korea Kusini na Belarus licha ya janga la corona kutodhibitiwa vilivyo duniani.

Hata hivyo, mchezo huo wa mpira wa mguu unaopendwa sana utakuwa ukipigwa ndani ya viwanja vitupu bila mashabiki.

Katika soka ya Ujerumani na Belarus kwa mfano, ni watu wasiozidi 322 ndio wamekuwa wakiruhusiwa ugani huku muziki unaochezwa kwenye vyombo ukihanikiza anga za viwanja ambavyo vilikuwa vimezoea mbwembwe na hekaheka za mashabiki waliojitokeza kutilia shime wanasoka.

Kwa mujibu wa mtandao wa rt.com, FC Seoul ilijaza madoli kwenye viti vya uwanja wao wa nyumbani mnamo Mei 17, 2020, kabla ya mechi ya Ligi Kuu dhidi ya Gwangju FC.

Ilihitaji macho makali ya mashabiki kutambua kwamba madoli hayo yalikuwa ya mapenzi na punde wakajibwaga kwenye mitandao mbalimbali ya kijamii kutaka kujua kiini cha hatua hiyo ya FC Seoul ambayo awali usimamizi ulisisitiza kwamba walikuwa wakitangaza mavazi mbalimbali ambayo madoli hayo yalivalishwa.

Ingawa cha kushangaza ni jinsi mashabiki walivyobaini kwamba madoli hayo hutumiwa katika masuala ya ngono, vinara wa FC Seoul wamekiri makosa na kutumia mtandao wa Instagram kuomba radhi huku wakishikilia kwamba mkandarasi aliyetakiwa kuupamba uwanja wao kwa madoli ya kawaida, alichanganyikiwa.

Shabiki mmoja aliyetambua matumizi halisi ya madoli hayo kabla ya FC Seoul kuomba msamaha alisema: “Nimeshangaa kuona madoli ya ngono katika uwanja. Hayo ni madoli ambayo yaliwahi pia kujaribiwa na kikosi cha Dinamo Brest. Ni kana kwamba ‘mashabiki’ hawa wa FC Seoul ni ‘madoli ya ngono’. Itakuwa aibu kubwa iwapo ni kweli.”

Shabiki mwingine alisema, “Hebu fikiria mchakato mzima wa kujaza madoli ya ngono yenye maumbo ya wanawake kwenye viti vya uwanja mzima na kuyavisha jezi za wanasoka. Je, hilo ni wazo bovu kweli? Ni wazo tamu mno. Hongereni sana @FCSeoul.”

2018: Habari 10 zilizovutia wasomaji katika tovuti ya Taifa Leo

NA FAUSTINE NGILA

LICHA ya mwaka wa 2018 kukumbwa na mawimbi ya sakata nyingi za ufisadi, tukio la kiongozi wa ODM kujiapisha kuwa ‘rais wa wananchi’, Dkt Miguna kufurushwa nje ya nchi na hatua ya maridhiano ya Rais Uhuru Kenyatta na Raila Odinga, Wakenya walipendekezwa na habari tofauti, kama inavyoashiriwa na orodha ifuatayo.

 

  1. Kijana aliyetoroka Al Shabaab asimulia maisha yalivyokuwa akiwa gaidi

Hii ilikuwa simulizi baada ya Taifa Leo kukutana na kijana wa miaka 29 katika kaunti ya Kwale aliyerudi nchini 2015 baada ya kuchoshwa na kuwa mtumwa wa Al Shabaab.

Alialikwa na binamu yake mjini Lamu kwa ahadi kuwa angepata kazi nzuri. Aliishi kwa kwake kwa miezi mitatu kisha akamtambulisha kwa vijana wengine watatu kisha wakapewa Sh10,000 kila mmoja. Aliwahadaa wakaingia gari la kibinafsi wapelekwe mahala ambapo wangeanza kufanya kazi ya mshahara wa Sh40,000 kwa mwezi.

Lakini walijipata kwenye kambi iliyokuwa na vijana wapatao 200. Hapo ndipo alipong’amua kuwa alikuwa ndani ya kambi ya Al Shabaab nchini Somalia. Humo kambini walianza kupokea mafunzo ya kijeshi ambayo yalikuwa yachukue miaka miwili. Baadaye wangetumwa uwanja wa vita kupigana.

Mafunzo yalikuwa makali sana. Tulikuwa wakiamka saa kumi alfajiri ambapo walishiriki mafunzo na mazoezi hadi saa kumi na moja jioni.

Mafunzo yalihusisha jinsi ya kutumia silaha tofauti kama bunduki, gurunedi miongoni mwa nyingine. Pia walibebeshwa magunia mazito yaliyojaa mchanga. Ilikuwa ni lazima ushiriki mafunzo upende usipende.

Aligombana na kamanda na akapanga na Mkenya mwingine jinsi wangehepa. Walitoroka usiku wakiogopa kuuawa na wenzao wa Al Shabaab.

Baada ya kutembea kwa siku mbili msituni walipatana na mzee ambaye aliwasaidia kufika Mandera. Kisha waliingia lori lililotupeleka Garissa.

Simulizi hii ilivutia wasomaji wengi zaidi kwa kuwa walitaka kuelewa kuhusu mafunzo ya Al Shabaab na jinsi walifika Kenya.

 

  1. Kioja demu kuangua kilio baada ya bosi wake kukataa kumbusu

Hii ilikuwa mojawapo ya habari za ucheshi zinazochapishwa kwenye sehemu ya Dondoo kwenye gazeti.

Kioja hicho kilitokea mjini Kiambere ambapo ‘slay queen’ mmoja alishangaza wapangaji alipoanza kulia akimlaumu mdosi wake kwa kumnyima busu.

Kitendo hicho kiliwafanya wafanyakazi wenzake kubaini kwamba demu huyo alikuwa na uhusiano wa mapenzi na mdosi ambaye ana mke na watoto.

Yasemekana uhusiano huo ulikuwa umeanza kuingia baridi na demu akamwendea mdosi na kumtaka ambusu.

Wasomaji wa tovuti yetu mwaka uliopita walikita kambi kwa habari za Dondoo huku sehemu hiyo ikiibuka nambari tatu kwa vitengo vya habari vilivyosomwa zaidi.

 

  1. Zambia kuwasukuma jela watakaonaswa wakiwa na ‘Samantha’

Habari hii ilivutia hisia za wasomaji wakati ambao vinyago vya visura vilikuwa vinaundwa kwa wingi duniani na hata kufika Kenya na Zambia.

Lakini serikali ya Zambia ikaanzisha msako mkali dhidi ya madoli hayo ya mahaba na kuonya kuwa watakaopatikana nayo wangeadhibiwa kwa kusukumwa gerezani.

Hatua hiyo ilipelekea suala la madoli ya mahaba kugongwa vichwa vya habari kwa mwezi mzima wa Februari na kuibua mjadala mkali kwenye mitandao ya kijamii.

Wasomaji walishangaa ni vipi mwanamume mwenye akili zake timamu atanunua kinyago badala ya kusaka urafiki na msichana binadamu.

 

  1. Riba ya ‘Okoa Jahazi’ ya Safaricom ni haramu, wananchi waambia mahakama

Wakenya wengi husukumwa na makali ya gharama ya juu ya maisha kuchukua mkopo wa muda wa maongezi kutoka kwa kampuni ya Safaricom.

Hiyo ilichochea Wakenya wawili kuishataki Safaricom kuhusiana na huduma yake ya ‘Okoa Jahazi’ ambayo walisema hutozwa riba waliyodai ni haramu.

Ashford Koome na Eric Kithinji walidai kuwa kampuni hiyo haijapewa leseni ya kutoa huduma za benki, hivyo, riba wanayotoza huduma hiyo ilikuwa haramu.

Hata hivyo, kwa kujitetea, kampuni hiyo ilisema hiyo ni ada na sio riba kama walivyodai, kwa kuwa imeidhinishwa na Mamlaka ya Mawasiliano nchini (CA).

 

  1. Miguna Miguna: Raila ndiye aliniambia Jubilee ilimpa Magaya Sh30 milioni

WAKILI mbishi Miguna Miguna aliedai kwamba kinara wa ODM, Raila Odinga, alimweleza binafsi kwamba Bw Norman Magaya, alipokea Sh30 milioni kutoka kwa chama cha Jubilee.

Akihojiwa na kituo cha runinga cha TRT World jijini Toronto, Canada, Bw Miguna alikanusha madai kwamba alikuwa anampiga vita Bw Odinga.

“Ni kweli Bw Magaya alipokea Sh30 milioni kutoka kwa Jubilee ndipo aondoe kesi ya kupinga ushindi wa gavana wa Nairobi. Raila Odinga mwenyewe alinifahamisha hayo,” alidai Bw Miguna.

 

  1. Tutajiapisha kama Raila Odinga, upinzani nchini Venezuela wasema

Wanasiasa wa upinzani nchini Venezuela walitangaza kuwa wangemuiga Bw Raila Odinga kwa kuapisha mwaniaji wao ikiwa Rais Nicolas Maduro angeiba kura katika uchaguzi wa mwaka uliopita.

Mwanaharakati wa kisiasa wa upinzani David Smolansky alisema kuwa Bw Odinga alikuwa kielelezo kwao kwa kujiapisha kuwa ‘rais wa wananchi’ baada ya kuwepo kwa udanganyifu wa kura.

Bw Smolansky aliyekuwa akizungumza katika mahojiano na kipindi cha HARDtalk katika runinga ya BBC, alisema Upinzani pia ungesusia uchaguzi uliopangwa kufanyika Aprili 22, 2018.

 

  1. BI TAIFA JULAI 28, 2018

Wasomaji wetu pia hupendezwa na ukurasa wa tatu wa gazeti ambapo picha za wasichana warembo kutoka maeneo tofauti ya nchi huchapishwa. Wasomaji walipendezwa na picha za Bi Taifa kwa jina Cecilia Rioba aliyekuwa na miaka 25 mwaka 2018.

 

  1. BOBI WINE: Shinikizo kwa Museveni aachilie huru msanii zazidi

Wasomaji pia walitazama video ya maandamano yaliyofanyika Nairobi, huku Wakenya wakimshinikiza Rais Yoweri Museveni wa Uganda amwachilie huru Bobi Wine. Ilishangaza maandamano haya kufanyika Kenya maanake Bobi Wine si Mkenya.

 

  1. Kwaheri Volkswagen Beatle

Wapenzi wa magari ya Volkwagen walishtuka baada ya kampuni hiyo kutangaza kukomesha utengenezaji wa gari aina ya Beatle ambalo lilipata umaarufu ulimwenguni miaka ya zamani, na kusema itakuwa ikiunda magari ya kielektroniki.

 

  1. Waziri Echesa ashauriwa arudi shuleni kunoa maarifa

Waziri wa Michezo na Turathi Bw Rashid Echesa Muhamed alishauriwa kutumia nafasi yake ya uwaziri kurejea shule kujiendeleza kimasomo.

Lakini kiongozi wa wengi Aden Duale alisema uhitimu wa kimasomo siyo hitaji kuu kuliko uwezo wa mtu kutekeleza majukumu ya uwaziri.

“Kazi ya uwaziri haina uhusiano wowote na shahada za digrii au chuo kikuu ambacho mtu alisomea bali uwezo wake wa kutekeleza majukumu aliyopewa,” akasema Bw Duale.

Zambia kuwasukuma jela watakaonaswa wakiwa na ‘Samantha’

NA AFP

LUSAKA, ZAMBIA

SERIKALI imeanzisha msako mkali dhidi ya madoli ya mahaba na kuonya kuwa watakaopatikana nayo wataadhibiwa kwa kufungwa gerezani.

Hatua hiyo imepelekea suala la madoli ya mahaba ligonge vichwa vya habari na kuibua mjadala mkali kwenye mitandao ya kijamii ambapo kuna misimamo tofauti katika nchi hiyo iliyo yenye misimamo ya kitamaduni na kidini kusini mwa Afrika.

“Kutokana na kuwa nchi hii ni ya Kikristo, ni wazi kwamba tunaongozwa na misingi ya Kikristo ambayo yanahusu maadili na tabia njema,” akasema Waziri wa Mwongozo wa Taifa na Masuala ya Kidini, Bi Godfridah Sumaili.

Kulingana naye, uuzaji au utumizi wa madoli ya mahaba ni kinyume cha sheria za Zambia. Aliapa kuwa serikali itahakikisha vidosho hao bandia hawatanunuliwa kupitia kwa intaneti wala kuingizwa nchini kutoka nchi za nje.

“Sheria inazuia mtu yeyote kufanya biashara au kutumia vidude aina hii kwa hivyo ndio maana tunaambia Wazambia kwamba hiki ni kitu ambacho si cha kawaida kabisa,” akasema.

Waziri huyo alisema marufuku iliyotolewa inastahili, baada ya vyumba vya habari kuripoti kuwa madoli hayo huingizwa nchini kutoka mataifa ya bara Asia. Alisema polisi wanachunguza madai hayo.

Kwa miezi kadhaa sasa, vyumba vya habari Zambia vimekuwa vikitenga sehemu nyingi magazetini kuchapisha habari na maoni kuhusu maduka ambayo yameanza kuongezeka katika mji mkuu wa Lusaka kuuza vidoli vya mahaba.

“Mungu aliumba mume na mke ili waridhishane kimahaba, lakini mwanamume au mwanamke anapoamua kutumia kiumbe kisicho na uhai hiyo ni tabia mbovu. Tusilete imani na tabia za kigeni humu nchini. Tushikilie tu imani zetu wenyewe,” akasema.

Watengenezaji wa vidoli vya mahaba husema wanaweza kutibu upweke na kusaidia wanaume wakongwe ambao hawana wake.

Chama cha Patriots for Economic Progress (PEP) nchini humo kilisema msimamo wa serikali kuhusu vidoli hivyo unaonyesha jinsi utawala wa Rais Edgar Lungu unazidi kuwa wa kiimla.

“Msimamo kuwa Biblia hairuhusu utumizi wa kidude chochote ni makosa,” akasema mkuu wa chama hicho, Sean Tembo.

Aliongeza: “Ni Biblia hiyo hiyo ambayo hupeana uhuru wa kuamua na itakuwa makosa kumfunga mtu gerezani kwa kuamua kutumia vidoli vya mahaba. Kuna wanaume ambao hawajiamini na hawaezi kutongoza.”

Makanisa yataka serikali izime ‘Samantha’

Kinyago cha wanaume kujiburudisha kimapenzi almaarufu ‘Samantha’. Makanisa yameitaka serikali kuzima biashara hii. Picha/ Hisani

 

Na MWANGI MUIRURI

Kwa muhtasari:

  • Askofu Hillary Mugo aitaka serikali kukomesha biashara ya ‘Samantha’
  • Makanisa yamtaka waziri wa Usalama wa Ndani, Dkt Fred Matiang’i ajumuishe misako dhidi ya vinyago hivyo
  • Tamadauni za kizungu zakataliwa nchini

MUUNGANO wa Wakristo ukanda wa Mlima Kenya, unaitaka serikali iunde sheria ya kupiga marufuku utumizi wa vinyago vya mahaba hapa nchini, hasa muundo wa ‘Samantha’.

Unasema utumizi wa vinyago hivyo ni upotovu wa kimaadili na hali inayoashiria uabudu wa shetani.

Mwenyekiti wao, Askofu Hillary Mugo, muungano huo ulisema Jumamosi kwamba serikali hadi sasa inaonekana kuchukulia mwelekeo huo wa kuunda vinyago hivyo na kuvisambaza mashinani kama njia moja ya kibiashara.

Akiongea Mjini Murang’a, askofu huyo alisema kuwa hadi sasa vinyago hivyo vimepenya mashinani na ambapo majumba spesheli ya kuburudika mahaba yanapokea wateja wa kushiriki mahaba kwa malipo na vinyago hivyo.

“Niko na ushahidi kuwa katika mitaa ya Githunguri katika Kaunti ya Kiambu, Nyeri, Murang’a na Kirinyaga kuna ‘Samantha’ hao. Wazee kwa vijana wanajumuika kulipa ada ili washiriki mahaba na hilo ni suala la kishetani,” akateta.

Alisema kuwa serikali isiyowajibikia masuala ya kimaadili na kuwahimiza watu wake wafuate mkondo uliowekwa na tamaduni za kijamii na maandiko matakatifu kuhusu ndoa na mahaba ni mshirika wa ushetani.

‘Uzungu’

“Tulianza na kuletewa ‘Uzungu’ wa ndoa za jinsia moja pamoja na biashara ya ukahaba ndani ya mpangilio huo potovu. Tukawa na vinyago vya kuridhisha wanawake kimahaba na tena tukawa na watoto wetu wa kike wakisajiliwa katika mitandao ya biashara ya ngono na wanyama. Sasa tumeletewa Samantha na serikali haijaongea kupinga kwa kuwa hatutarajii iunge mkono,” akasema.

Askofu Mugo alimtaka waziri wa Usalama wa Ndani, Dkt Fred Matiang’i ajumuishe misako dhidi ya vinyago hivyo sambamba na magenge haramu na pia mitambo ya kamari katika amri zake za misako.

Aidha, ameitaka serikali izindue mpango maalum wa kutoa imani ya kimaisha kwa vijana wa taifa hili “ambao wameishiwa na uvumilivu dhidi ya mahangaiko ya kimaisha kiasi kwamba kujituliza, badala ya wakimbizane na ya kuwafaa maishani, wanafuatana na yale ya kuwaangamiza.”

Alisema kuwa misukosuko ndani ya ndoa inhayoshuhudiwa kwa sasa imetokana na kuishiwa na imani hiyo kwa maisha kiasi kwamba “sasa kuepuka mahangaiko, kuna mauaji, ulevi kiholela, utumizi wa mihadarati na sasa kujituliza hisia za mahaba na vinyago.”