Polo aambia kanisa babake ni tapeli

SOY, UASIN GISHU

JOMBI wa hapa aliwashangaza waumini wa kanisa kwa kuwaambia kwamba baba yake alikuwa pasta tapeli.

Jamaa aliwaarifu washirika kwamba baba yake alikuwa akiwapotosha. Inasemekana baba ya jamaa alirejea hapa kutoka jijini na kisha akaanzisha kanisa.

Kwa muda mfupi, kanisa hilo lilianza kuwa na waumini wengi hata kushinda makanisa mengine.

Hata hivyo, jamaa alidai babake alikuwa na kesi nyingi zinazohusiana na utapeli.

Alidai kwamba babake alifukuzwa kutoka jijini Nairobi baada ya kutapeli mwanamume mmoja Sh150,000.

Jamaa alisikitika kwamba, washiriki walikuwa wamepumbazwa macho kuamini kwamba walikuwa wakipokea uponyaji bila kujua lengo la baba yake ni kuwatapeli.

“Nataka kuwaambia kitu ambacho hamjui. Huenda mtashtuka lakini mjue ni ukweli wa mambo. Mkitaka mnichukie, mkitaka msiniamini lakini nitakuwa nimewaambia. Babangu si mchungaji halali. Ni tapeli mkubwa sana,” alisema kijana.

Kanisa lilibaki kwenye mshangao wasiamini maneno hayo. Polo aliwatolea mifano ya jinsi hela za kanisa hilo zilikuwa zikipotea kwa njia tatanishi. Baadhi yao walidai kwamba huenda kijana huyo alikuwa akitumiwa na mahasidi wa kanisa hilo huku wengine wakisema huenda alikuwa akisema ukweli.

Wakati wa kisa hicho, baba ya jamaa hakuwa kanisani.

Polo alidai alikuwa amekosana na babake mara kwa mara kutokana na msimamo usiotetereka wa kusema ukweli.

“Mjue kinachofanya nitofautiane na baba yangu ni kwamba, napenda ukweli. Nilipomkosoa kwa kwenda kombo, alidai mimi ni mtoto mbaya,’’aliongezea jamaa.

Wazee wa kanisa waliapa kufanya uchunguzi kuhusu madai ya jamaa huku akiwashauri washiriki kutohama kanisa
hilo. “Hakuna haja ya kuhama. Ngojeni ukweli utajulikana,’’alisema mwenyekiti wa kamati ya wazee kanisani. – Na DENNIS SINYO

Nani hapa anasema ukweli?

 

Pasta atekwa na mama sukari na kutema familia

MWANDA, TAITA

WAUMINI wa kanisa moja eneo hili walipigwa na butwaa kugundua kwamba pasta wao alikuwa ametekwa na mama sukari hadi akateleleza familia yake.

Ripoti ziliarifu kuwa, mama huyo alijiunga na kanisa hivi majuzi.

Kila mara alikuwa akitoa sadaka kubwa na fungu la kumi pamoja na kufadhili miradi tofauti kanisani.

Alianza kumchangamkia kwa kumnunulia chamcha kila Jumapili na kila wakati pasta alipokuwa akienda safari, alikuwa akijitolea kumpeleka kwa gari lake.

Akidhani ni miujiza iliyokuwa imetendeka, pasta alianza kuwa karibu na mama huyo na kila jioni mama alimwalika nyumbani kwake kwa kikombe cha chai na maombi.

Pasta alianza hata kulala kwa mama huyo na kurejea kwake asubuhi na mkewe anapomuuliza alimweleza alichelewa kwa huduma. – Na HOLINESS MWAMBI

 

WAZO BONZO

Wazo Bonzo, Jumamosi, Machi 30, 2019

Kiu ya kileo yamtupa mashakani kilabuni

MAKIMA, MWEA

JAMAA mmoja kutoka hapa alinusurika kichapo kutoka kwa mapolo kilabuni kwa kuteremsha pombe ya demu.
Kulingana na penyenye, jamaa alichukua chupa ya pombe ya mwanadada huyo baada ya kukosa mtu wa kumnunulia dozi.

Demu alipiga kamsa jamaa alipochukua pombe yake na kuvutia waliokuwa kilabuni.

Kitendo cha jamaa huyo kiliwakera wahudumu na wateja na wakaamua kumfunza adabu.

Watu walimrukia huku kila mmoja akitaka kumtwanga lakini kwa bahati, walinzi wa kilabu hicho waliingilia kati na kumuokoa.

Licha ya jamaa kunusurika kichapo hicho, watu walimrushia kila aina ya maneno.

“Wewe ni mwanamume sampuli gani,” watu walifoka kilabuni.

Inasemekana demu alinunuliwa pombe na wanaume kadhaa huku jamaa akitoroka. – Na JOHN MUSYOKI

 

Wazazi vinywa wazi polo kutema mkewe

NYAMARANGA, MIGORI

JAMAA mmoja kutoka hapa aliwashangaza wengi alipodai kwamba amechoka kuishi na mkewe.

Inasemekana polo alimtaka mkewe arudi kwao ili ampe nafasi ya kurejelea maisha yake ya hapo awali ya ukapera, maisha aliyodai hayana vikwazo vyovyote.
Kulingana na mdokezi, polo aliwaomba wazazi wake wamsihi kipusa arudi kwao, la sivyo atamlazimisha kufanya hivyo.
“Namtaka huyu mwanamke arudi kwao. Nimechoka kuishi naye,” polo alidai. Inadaiwa wazazi wa polo walibaki midomo wazi wasijue la kufanya.
“Nilipokuwa kapera, nilikuwa na uhuru mwingi sana. Leo hii siwezi kufanya jambo lolote bila ruhusa yake. Heri aende,” polo alisema. – Na TOBBIE WEKESA

Mama akaanga vipusa kuhusu gumzo chafu

Na WAANDISHI WETU

Huu hapa mkusanyiko wa visa na visanga vya kukuvunja mbavu:

 

Mama akaanga vipusa kuhusu gumzo chafu

TUWATUGAWE, MOMBASA

MABINTI wawili mtaani hapa walijipata pabaya baada ya mama yao kuwafumania wakijadili mbinu za kurushana roho na wapenzi wao.

“Mama alikuwa msalani alipowasikia binti zake wakijadili mbinu za kuwafurahisha washikaji wao,” asema mdaku wetu.

Mabinti hawakujua mama alikuwa chooni, walipoanza kushauriana jinsi ya kuwadekeza wapenzi wao.

“Nikimpata wangu kesho nitamuonyesha mapenzi mazito anichotee kiasi chochote ninachohitaji. Hata kama ni kumtumbuiza kitandani niko tayari,” binti mmoja alisikika akimwambia mwenzake.

“Wangu nitampeleka beach tukamalizanie huko, nikirudi sirudi bure,” binti wa pili alimwelezea mwenzake.

Mama yao akiwa chooni alisikia yaliyozungumzwa hadi akakatiza haja yake, akafungua mlango na kutoka nje ghafla.

“Endeleeni na gumzo lenu chafu, napoteza hela kuwasomesheni kumbe nasomesha makahaba hatari wachumao pesa kwa wanaume,” mama alifoka akiwakodolea macho mabinti.

Inasemekana vipusa hao walianza kusuasua, mama akaokota fimbo na kuwatwanga.

“ Nyinyi hamna adabu, sijui niliwazaa wa nini, hata hamna tabia kabisa,” mama aliwafokea huku akiendelea kuwacharaza kwa fujo.

Baba aliposikia mabinti wakilia, alitoka ndani ya nyumba akamwona mama akiwacharaza.

“Wuuii, usiniulie wanangu, wamefanyaje hadi unawaadhibu namna hii,” mzee aliropokwa kwa hasira.

“Waulize kinachofanya niwaadhibu, nilidhani nimezaa watoto kumbe nimezaa Malaya,” mama alimweleza mzee.

“Mbona sikuelewi, hasira za nini mpaka unaita wanao malaya,” mzee alitaka jibu lakini mama aliwataka mabinti wamjibu.
Hatimaye mzee aligundua mabinti walikuwa wahanyaji mtaani.

“Walishindwa kuelezea kilichosababisha waadhibiwe, hali iliyomfanya pia mzee kupandwa na hasira za mkizi na kuwaadhibu mara ya pili,” aliarifu mdaku. – Na Ludovick Mbogholi

 

Bwanyenye amtorosha mke wa pasta wake

VOI MJINI

Pasta wa kanisa moja mjini hapa aliangua kilio baada ya kupokonywa mke na bwanyenye aliyejiunga na kanisa lake majuzi.

Kulingana na mdokezi, bwanyenye huyo ni mfanyabiashara mtajika.

Alipofika kanisani, pasta alifurahia sana na akajua fika kuwa fungu la kumi lingeongezeka.

Kile ambacho pasta hakufahamu ni kwamba, jamaa alikuwa na uhusiano na mkewe.

Yasemekana mke wa pasta alianza kumdharau mumewe huku akiondoka na kurudi nyumbani na bidhaa za bei ghali.

Baada ya pasta kugundua, alimuuliza mkewe ambaye alijifanya hakuwa na habari kabisa.

Mumewe alipotisha kumpiga, mwanadada alipasua mbarika.

“Unashinda hapa ukiniuliza maswali ambayo uko na majibu. Ndio nimepata mwenye pesa na sina haja na senti zako. – Na Holiness Mwambi

WAZO BONZO

Wazo Bonzo Machi 16, 2019

 

Mama atelekeza wanawe kikaoni

MATUNGWA, MAKUENI

Mzee wa hapa alijipata pabaya mkewe alipomletea watoto kwenye kikao cha wazee.

Yasemekana mzee alitumia pesa za kulipia watoto karo kushiriki kamari huku akinuia kupata donge nono.Wawili hao walianza kuzozana watoto walipofukuzwa shuleni mzee alipoitishwa pesa na kusema alikuwa amezitumia.

Baada ya siku tatu, mkewe alikasirishwa na tabia hiyo na akaamua kumpelekea mumewe watoto kikaoni.

Wazee tayari walikuwa wamezama kwenye gumzo huku wakijadili masuala yao.

Mzee aliona haya kumuona mkewe akiandamana na watoto.

Mama alianza kumfokea mzee akimlaumu kwa kutumia pesa walizokuwa wamehifadhi.

Jaribio la kumzima mkewe halikufua dafu.Mke alitikisa kichwa na kumuachia watoto. – Na Mirriam Mutunga

 

Kioja polo kuponea bakora ya kalameni

RHONDA, NAKURU

Jombi mmoja mtaani hapa, aliacha kusonga sembe na kutorokea dirishani alipopata fununu kuwa mzee wa mtaa alikuwa akimsaka.

Inasemekana jamaa alikuwa miongoni mwa kundi la vijana waliomtukana binti ya mzee wa mtaa jioni moja akitoka saluni.

“Jamaa na wenzake walikuwa wakichana veve, mrembo alipowapita bila kuwapa salamu. Stimu zilipanda kichwani wakaanza kurusha cheche za matusi, wakimtaka mwanadada aache maringo na ajifundishe kukaa na watu,” aliarifu mdaku.

Alipokuwa akipika sembe kwake alisikia mzee wa mtaa akiteta nje na akajua mambo yalikuwa mabaya. Alizima stovu na kutorokea dirishani kwenda mafichoni.

Duru zasema mzee bado amsaka kwa lengo la kumkamata jamaa kwa kudunisha binti yake mrembo. – Na Richard Maosi

 

VITUKO VYA POKOYOYO

Vituko vya Pokoyoyo Machi 16, 2019

Ajificha chooni kuhepa mademu

Na DENNIS SINYO

KHWISERO, KAKAMEGA

JOMBI mmoja alilazimika kujificha chooni baada ya mademu wawili kumsaka wakitaka hela za matumizi.

Inaarifiwa kwamba jamaa huyo alikuwa na mazoea ya kuwadanganya vipusa alikuwa akifanya kazi katika ofisi za kaunti ilhali hakuwa na kibarua chochote.

Fununu zinadai alikuwa na tabia ya kuwatumia wasichana na kisha kuwahepa akidai hakuwa tayari kuoa.

Inasemekana alikuwa akiahidi wasichana hao pesa kila mwezi jambo ambalo hangetimiza.

Wawili kati ya wasichana aliokuwa akidanganya walianza kumsaka awape pesa alizowaahidi.

Siku ya kioja, jamaa alikuwa ameketi nje ya duka moja akipiga gumzo na marafiki zake alipowaona wasichana hao wawili wakielekea alipokuwa.

Punde tu alipowaona, alipiga kona na kujificha kwenye choo katika kituo cha kuuza mafuta kilichokuwa karibu.

Vipusa hao walipomkosa walianza kufoka wakisema walitaka kumwaibisha hadharani ili akome kuwachezea kila mara.

“Akionekana hapa mwambieni tunazidi kumtafuta. Mwambieni akome huo ujanja wake la sivyo atajua sisi ni nani,” alifoka mmoja wa wasichana hao.

Kulingana na mdokezi, akina dada hao walipoondoka, jamaa alitoka chooni akitokwa na kijasho chembamba.

Marafiki zake walimshauri akome kuchezea wasichana wakidai alikuwa akijichafulia jina.

“Kama unataka kulinda jina lako, tafadhali wachana na hawa wasichana. Ikiwa uliwapa ahadi ya kuwatumia pesa, watumie kisha uachane nao,’’ alisema rafiki yake mmoja.

Inasemekana jamaa alijigamba kwamba yeye ni bingwa wa kuwaingiza mademu kwenye boksi na kisha kuwahepa kwani hakuwa tayari kuoa.

Marafiki zake walimweleza kwamba asipoacha tabia hiyo siku moja atakiona cha mtema kuni.

“Wanawake sio wa kuchezea, watakuweza siku moja,” walimwambia.

 

Azushia mkewe kupata mlango ukiwa wazi usiku

CHWELE, BUNGOMA

KALAMENI wa hapa, ambaye amekuwa akimchunga mkewe kama shilingi, alizua rabsha baada ya kupata mlango wa nyumba yao ukiwa wazi.

Kalameni huyo alijuana na mwanadada mmoja mrembo na wakaoana.

Urembo wa mwanadada huyo ulimfanya mumewe kushuku ana mipango ya kando na kuhofia anaweza kunyakuliwa na wanaume wengine.

Siku ya kisanga, kalameni alipitia kilabuni ili azime mwasho wa koo lake kwa mvinyo na usiku ulipoingia, alianza safari ya kuelekea nyumbani.

Kalameni alipigwa na butwaa kupata mlango wa nyumba ukiwa wazi.

“Sasa nimejua kwamba kuna mafisi wanaokuja hapa kunyemelea mali yangu na leo wamekuwa na tamaa wakasahau kufunga mlango,” jamaa alipayuka.

Inasemekana alijaribu kumrushia kofi lakini akahepa na kupiga nduru watoto wakaamka na kumpata jamaa kwenye sakafu.

Yasemekana mkewe alijifungia chumba cha kulala na kumuacha jamaa kulala. – Na KIMANI wa NJUGUNA

WAZO BONZO

Wazo Bonzo

Demu afokea jamaa wake kwa kugundua anaishi kibandani

SEGA, SIAYA

KIDOSHO mmoja wa hapa alimrushia mpenzi wake maneno makali baada kupata alikuwa amejenga nyumba ya msonge.

Kulingana na mdokezi, jamaa alikuwa akimwambia kipusa alikuwa amejenga nyumba nzuri na kila kitu kilikuwa sawa.

Kidosho alipigwa na butwaa alipopata kuwa jombi alikuwa amejenga nyumba matope iliyoezekwa nyasi.

Demu aliwaka na kuanza kumfokea jamaa vikali akimlaumu kwa kujengea kibanda.

“Mimi siwezi nikaishi kwenye kibanda. Muda huo wote umekuwa ukiniambia umejenga nyumba nzuri, sasa nionyeshe nyumba uliyokuwa ukidai,”demu alisema kwa hasira.

Jamaa kusikia hayo alijawa na wasiwasi na kumtuliza kipusa na kuahidi kumjengea nyumba nzuri baadaye. – Na MIRRIAM MUTUNGA

Mhubiri akasirika vyombo vya kanisa kutumiwa kwa densi

PASTA mmoja aliteta vikali vyombo vya kuhubiri kanisani vilipotumiwa kucheza nyimbo za densi.

Duru zasema mwanasiasa maarufu kutoka hapa alikuwa amekodisha vyombo vya kanisa la pasta kutumia katika mkutano uliokuwa umesubiriwa kwa hamu.

Yasemekana mkutano uliingia ndoa, DJ alipoangusha burudani la muziki, huku waliohudhuria wakibanjuka na kunengua viuno kwa raha zao.

Mchungaji alikosa utulivu moyoni na akaamuru ngoma izimwe mara moja, akisema vyombo vya kanisa sio vya kucheza muziki wa “kidunia.”

“Ama kweli barabara ya kwenda mbinguni ni nyembamba, hata sijui ni ibilisi gani alinituma kujumuika na wenye dhambi,” pasta alifoka na kuondoka akiahidi katu hatoruhusu vyombo vya kanisa kutumiwa kwenye mikutano ya kisiasa tena. – Na RICHARD MAOSI

Pokoyoyo

Changudoa atimuliwa kwa kuanika chupi hadharani kuteka waume

Na CHARLES ONGADI

Mtwapa, Kilifi

AKINA mama waliojawa na hasira za mkizi walimtimua changudoa mpangaji mwenzao kwa tabia ya kuanika chupi zake hadharani.

Kwa mujibu wa mdokezi, akina mama hao walidai kipusa huyo alifanya hivyo akilenga kuteka hisia za waume wao.

“Hii tabia ya mwanamke huyu kutuanikia chupi zake mbele ya milango yetu ni uchokozi na ni lazima ahame hapa apende asipende,” mama mmoja alisikika akimnong’onezea mwenzake kwa hasira.

Kufumba na kufumbua, akina mama hao walikusanyika katika veranda na kumbishia kipusa huyo aliyekuwa akijipodoa chumbani mwake akijitayarisha kwa mishemishe zake za siku.

Akina mama hao walimtaka kuondoa mara moja chupi zake zote alizoanika kwenye kamba iliyokuwa verandani na kufunganya virago vyake kuondoka ploti hiyo au aone cha mtema kuni.

“Kwani nia yako ni gani wewe ? Wataka kutuibia waume wetu kwa kuwachochea kwa chupi zako, ondoka ama tukuoneshe kivumbi,” alibweka mama mmoja kwa hasira.

Walidai kwamba mbali na mwanadada huyo kuanika chupi zake hadharani pia alikuwa na mtindo wa kuvalia nguo zisizo za heshima na kuchukua muda mwingi akiongea na kutaniana na waume wao.

Licha ya kipusa kujitetea kwamba alikuwa akianika chupi zake ili zipate kukauka haraka na wala hakuwa na nia yoyote mbaya, akina mama hao hawakutaka kusikia la mwadhini wala mteka maji msikitini.

Na kwa kuwa wengi wape, alisalimu amri na kuomba kupewa muda kutafuta nyumba kwingine ahame.

Lakini alipokuwa akihama, aliapa kuwafunza akina mama hao adabu kwa kumsingizia na kumfukuza.

“Hao mnaowaita waume wenu watanitafuta wenyewe basi mpende msipende na hadi mnikome nyie,” alisema kwa hasira.

Vipusa walimana kanisani wakizozania polo

Na TOBBIE WEKESA

Kibabii, Bungoma

Waumini wa kanisa moja la hapa walibahatika kutazama sinema ya bure mrembo mmoja alipomuangushia mwenzake makofi kanisani akimlaumu kwa kueneza umbea kumhusu.

Inadaiwa mrembo alikasirishwa na madai ya mwenzake kwamba alikuwa akimtongoza mumewe.

Kulingana na mdokezi, purukushani hizi zilianza pindi tu pasta alipotamatisha ibada.

Duru zinasema mrembo alimkaribia kipusa na kumtaka afafanue madai aliyoibua.

“Nimesikia unatangatanga kila mahali ukinichafulia jina. Hebu nieleze bwanako nilimtongoza lini na ana nini spesheli ninachoweza kutaka wake?” mrembo alimfokea kipusa.

Kipusa alimuangalia mrembo yule usoni na kumuonya asidhubutu kuzungumza na bwana yake tena.

“Kila mtu anakujua. Tafuta mume wako. Wewe hujui vile nilihangaika nikitafuta mzee. Mwizi wewe!” alimuonya mrembo.

Penyenye zinasema mrembo alinyoosha mkono na kumpa kipusa makofi mawili makali.

“Naona umenizoea. Utakoma kucheza na mkia wa mamba,” alimuonya kipusa huku milio ya makofi ikisikika.

Waumini wa kanisa waliokuwa karibu waliingilia kati kuwatenganisha.

“Eti mimi namtafuta bwana yake. Wewe ukiangalia ananiweza kweli,” mrembo alimkaripia kipusa. Vicheko vilisikika kwote. “Una bahati. Kama si hawa, ningekugonga mpaka ushangae,” mrembo alifoka.

Mrembo aliamua kuondoka. “Ukiniletea ujinga tena mimi nitakupondaponda. Sikuogopi,” alimuonya kipusa huku akienda.

Kila mtu alibaki mdomo wazi. Iliwabidi Waumini kumuita pasta ili aweze kuwapatanisha wawili hawa.

Ilisemekana kuwa kipusa alikuwa amepata fununu kwamba mwanadada huyo alikuwa akimmezea mate mumewe na walikuwa wameonekana pembeni.

Hata hivyo hakukuwa na ushahidi kwamba walishiriki ufuska. Pasta wa kanisa hilo aliahidi kuzungumza na wawili hao kutatua mzozo huo.

Yambidi atoroke ukweli wa mimba usijulikane

Na TOBBIE WEKESA

Mathare, Nairobi

Kipusa aliyekuwa akiishi katika ploti moja mtaani hapa aliwashangaza marafiki zake alipofunganya virago na kuhamia mtaa mwingine akihofia kujifungua mtoto anayefanana na mpango wake wa kando.

Kulingana na mdokezi, kipusa alikuwa na uhusiano wa kimapenzi na kalameni fulani ambaye walikuwa wakiishi ploti moja.

Inasemekana jamaa huyo alikuwa na familia lakini ilikuwa ikiishi mashambani.

Duru zinaarifu kwamba familia ya jamaa ilimtembelea na kipusa alishangaa kuona kwamba watoto wote walikuwa wakimfanana na polo.

Jambo hili lilimtia kipusa wasiwasi akihofia hata mtoto atakayejifungua huenda akafanana na jamaa.

Kipusa aliamua kutulia kidogo akifikiri familia ya jamaa ingerudi mashambani. Juma moja lilipita, hakuna lolote lililofanyika. Mwezi ukapita na hawakuondoka.

Baada ya miezi mitatu, kipusa akikaribia kujifungua, familia ya jamaa ilikuwa haionyeshi dalili za kuondoka. Duru zinasema kipusa alihofia sana siri zake zingejulikana na wapangaji wa ploti hasa mumewe kwa sababu alikuwa na uhakika kwamba mimba aliyokuwa amebeba ilikuwa ya mpango wake wa kando.

Habari zilizotufikia zinadai kwamba uhusiano wa kipusa na polo ulikuwa ukiendeshwa kwa siri kubwa mno.

“Hata mume wa kipusa siku zote aliamini kwamba mimba aliyokuwa amebeba mkewe ilikuwa yake. Hakufikiri mkewe angeweza kuwa na mpango wa kando,” alieleza mdokezi.

Ilimbidi kipusa amshawishi mumewe wahamia ploti nyingine.

“Kwani kuna nini hicho kinachokufanya useme tuhame? Tumeishi nawe hapa kwa zaidi ya miaka mitatu. Mbona wahama?” kipusa aliulizwa na rafiki yake.

Kipusa alimueleza kwamba alitaka kuhamia kwingine kwani alikuwa amechoshwa na kuishi hapo na alitaka kujifungua katika mazingira mapya.

Vilio vya demu vyakosa kuzima harusi kanisani

Na SAMMY WAWERU

Kangaita, Kirinyaga

Hafla moja ya harusi kijijini hapa ilisitishwa kwa muda ili kutuliza msichana aliyeangua kilio akilalamika kuwa bibi harusi alikuwa amenyakua mwanamume mpenzi wake.

Mwanadada alidai kwamba jamaa aliyekuwa akifunga pingu za maisha alikuwa mpenzi wake wa miaka mingi, na kwamba alishangaa jinsi mwanadada huyo alivyomnyakua upesi.

Kulingana na mdokezi harusi hiyo iliyoanza kwa utulivu na furaha nusura ivurugike kipusa alipotaka kuelezwa sababu za bibi harusi kumfanyia madharau kiasi hicho ilhali walikuwa marafiki wa dhati.

Inasemekana kidosho alisubiri wakati wawili hao walipokuwa wakivishana pete akazua kioja.

“Huu si utu hata kidogo, huyu ni mchumba wangu ambaye tumekuwa na uhusiano kwa zaidi ya miaka mitatu,” alisema huku akiangua kilio.

Inasemekana kipusa huyo alikuwa akifanya kazi nchi za nje, na kalameni alipomuomba wafanye harusi alidai hakuwa tayari kwa ndoa. Kulingana na mdokezi, demu alitulizwa na baada ya harusi jamaa alieleza sababu za kuoa rafiki yake.

“Nilipokuomba urejee nchini tuoane ulisema haujajitayarisha kwa mambo ya ndoa,” jamaa alimwambia. Hata hivyo, mwanadada alisisitiza bibi harusi alimsaliti.

“Nilisema nitasafiri ili nione huyu msaliti akitiwa pete na mchumba wangu,” aljibu.

Watu walishangazwa na kioja hicho, wengine wakikemea kidosho huyo kwa kukawia kukubali posa ya polo. Hata hivyo, pasta na wazee wa kanisa walituliza mwanadada huyo ambaye aliondoka kwa machungu akiahidi kuhakikisha ndoa hiyo itasambaratika ili mchumba wake amrudie.

“Tutaona kama utaishi na huyu mpenzi wangu,” alionya kipusa. Pasta aliitisha maombi ya kutakasa ndoa ya wawili hao, akikemea matamshi ya msichana huyo.

Apoteza demu kwa kimya cha siku mbili

Na Leah Makena

Kirigara, Chogoria

JAMAA wa hapa alilazimika kurudi mawindoni baada ya kutemwa na mpenzi wake alipokosa kumvutia waya kwa muda wa siku mbili.

Inaarifiwa kuwa polo alikuwa na mazoea ya kumpigia kidosho simu kila siku ila mambo yakabadilika alipoingia mitini kwa muda wa siku mbili baada ya wawili hao kutofautiana.

Kulingana na mdokezi, wawili hao walikosa kuelewana kuhusu harusi yao kidosho alipoanza kulalamika kuwa jamaa alikuwa akisita ilhali aliwakataa majamaa wengi waliotaka kumuoa.

Inasemekana jamaa hakufanikiwa kumshawishi kidosho kuwa alitaka muda wa kujipanga kabla ya kumuoa kwani kidosho alidai kuwa jamaa alitaka tu kuchovya asali kisha atoweke na kumuacha.

Baada ya kukosa kuelewana kuhusu harusi ndipo simu za jamaa zilipopungua, jambo lililomchoma kidosho roho na kuhisi kuwa alikuwa akichezewa.

Hapo ndipo aliamua kumgeukia mmoja wa machali waliokuwa wakimmezea mate na akamsahau polo.

Siku mbili baada ya kumtema ndipo jamaa alifika kwa kidosho na kugundua alikuwa amepigwa teke na mrembo kunyakuliwa na kalameni mwingine .

Licha ya kujaribu kumbembeleza mrembo na kuomba radhi, polo aliachwa mataani kwani mrembo alikuwa amejipa shughuli.

Duru zasema kuwa polo alidai simu yake ilikwa imepotea ila mwanadada akadinda kukubaliana naye akisema polo alijua namba ya simu na hivyo angetumia simu yoyote kumpasha kuhusu kupotea kwa simu yake.

“Sitakubali uniharibie muda wangu kwa sababu sitaki kuwa mzee nikiwa kwa baba yangu. Kama uko na muda wa kuharibu chezea vipusa wengine ila sio mimi,” kidosho alimueleza.

“Ninajua ulikuwa unawaza iwapo utaendelea kunichumbia au la, ila nishakupa jawabu. Endelea kujipa muda utaoa wale ambao hawana haraka ya maisha.”

 

Vita lojing’i baada ya polo kukataa kulipia asali aliyochovya

Na Leah Makena

Giaki, Meru

SINEMA ya bure ilishuhudiwa kwenye lojing’i moja eneo hili pale jombi na kimwana walipochapana jamaa alipodinda kulipia huduma za uroda.

Duru zasema kuwa wawili hao waliamua kulishana asali kwenye chumba hicho wiki moja baada ya kujuana lakini demu akataka kulipwa kwa huduma akidai polo angeingia mitini baada ya kuonja asali.

Licha ya polo kusititiza kuwa alitaka mrembo wa kuoa, kidosho alishikilia alitaka malipo.Yasemekana kuwa mambo yaliharibika jamaa alipomkabidhi kidosho noti ya shllingi mia moja badala ya shilingi mia tano walivyokuwa wamekubaliana.

Hakuamini polo alipodai alikatiza muda waliokuwa wamepanga kurushana roho kwa nia ya kuokoa uhusiano wao na pesa alizompa zilitosha.

Hapo ndipo hasira za mwanadada zilipanda na akachokoza nyuki alipojaribu kuchukua pesa kwa nguvu kutoka mfuko wa koti ya jamaa.

Vuta nikuvute ilibadilika kuwa vita zilivyofanya wengi kuacha shughuli zao ili kuwatenganisha. Hakuna aliyekubali kumshawishi polo kuongezea demu hela.

Alidai kidosho alitaka kupora pesa zake. Hatima ya mzozo huo haikujulikana kwani mrembo alishikilia kuwa alitaka haki yake jamaa alivyokuwa amemuahidi.

 

Mama mkwe amnyima jombi kiti eti ana kiburi

Na TOBBIE WEKESA

Luanda, Vihiga

KIOJA kilizuka hapa baada ya mama mkwe kuamrisha mume wa binti yake asipewe kiti cha kukalia. Hii ni baada ya polo kuhudhuria sherehe ya kulipa mahari ya mwanyumba wake. Inadaiwa mama mkwe alikuwa amekasirishwa na tabia ya polo ya kuwa na kiburi na kutomheshimu.

Kulingana na mdokezi, makalameni wote waliokuwa wameoa mabinti wa mama huyo walikuwa wamealikwa. Inasemekana polo ndiye aliyekuwa wa mwisho kuwasili.

Duru zinasema polo alipowasili, alimkuta mama mkwe akitoa shukrani zake kwa mabinti zake pamoja na waume wao kwa kuendelea kumsaidia.

“Huyu ni nani. Asipewe kiti mwanzo,” mama mkwe alifoka. Kila mtu alitulia na kushangaa. “Mimi sipendi watu wakaidi na wakora. Kiburi utampelekea mtu mwingine, si mimi,” mama mkwe alizidi kufoka.

Mabinti za mama huyo waliamua kuingilia kati ili kumtuliza mama yao. “Achaneni na mimi. Huyu jamaa hataketi hapa. Ana kiburi sana. Hana aibu hata kidogo kukanyaga nyayo zake kwenye ardhi yangu. Anataka nini,” mama aliwakaripia mabinti zake.

Kuona ameaibishwa, polo aliamua kumkemea mama mkwe.

“Acha zako. Kila wakati ukinipigia simu ni kuombaomba tu. Ni lini hata na wewe utatulia ufanye kazi,” polo alimfokea mama mkwe.Polo aliendelea kurusha cheche za matusi huku akiondoka karamuni.

“Hata kwangu kuna viti vya kuketi. Mwanzo si vya kukunjwa na vilivyojaa kunguni kama hivi vyako. Ni makochi kutoka Ulaya,” polo alifoka.

Mama mkwe alibaki mdomo wazi. Majirani walibaki kutazama sinema ya bure.

“Usiwahi kunipigia simu tena. Wale ng’ombe wawili niliokuletea wanakutosha,” polo alisikika akisema huku akienda.

 

Polo atimuliwa na mahari yake ya kuku

Na LEAH MAKENA

Irunduni, Tharaka

POLO wa hapa nusura achapwe na mashemeji alipowapelekea kuku wawili kama mahari siku chache baada ya kuhepa na dada yao.

Yasemekana jamaa alikuwa akimchumbia mwanadada huyo kwa muda licha ya pingamizi kutoka kwa ndugu zake.

Kulingana na mdokezi, ndugu za mwanadada huyo walikuwa wameshindwa kumshawishi dada yao kumtema polo wakidai kwamba alikuwa mlala hoi.

“Mwanadada alitia masikio nta na kuhamia kwa polo licha ya kukatazwa na ndugu zake. Juhudi za kuwasiliana naye ziligonga mwamba alipozima simu,” alisema mdokezi.

Wiki moja baada ya kuona kuwa amefaulu kukaa na mrembo, ndipo polo alifika nyumbani na alipopata wazazi, akawa na muda wa kujitetea na kueleza sababu ya kuhepa na binti yao.

“Naomba mniwie radhi kwa sababu sikuwa na uwezo wa kuandaa karamu kubwa wala kufanya harusi. Ninaahidi kutia bidii angaa nipate cha kuwatunuku huku nikihakikisha kuwa binti yenu anakula na kuvaa vizuri,” polo alijitetea huku akiwataka wazazi kupokea kuku aliokuwa amebeba.

Duru zasema kuwa mashemeji walivutiwa waya na wakalazika kuacha vinywaji klabuni kwenda kumkabili polo.

Mkutano wa jamaa na wakwe ulikatizwa na mashemeji walipofika kwa fujo na kujaribu kumtia polo viganjani ila wakashindwa alitimua mbio na kutokomea.

“Unadhani unayedai kuwa mkeo ameokotwa ndipo ulete mahari ya kuku?Umetupa mbao kutonesha kidonda kwani tunakuhakikishia kuwa hutaishi naye kabisa,” ndugu wa mwanadada waliteta.

Habari zasema kuwa mashemeji walibeba kuku hao tayari kuwarudisha kwa polo huku wakiapa kumtwaa dada ili warudi naye nyumbani na kutishia kumkomesha iwapo angeendelea kuwa kero kwao.

…WAZO BONZO…

Polo akataa kuketi baada ya kutahiriwa

Na SAMMY WAWERU

Eworet, Bomet

KIJANA mmoja aliyepashwa tohara katika kijiji hiki alikataa kuketi chini akitaka babake mzazi kutimiza ahadi ya kumpa zawadi ya ng’ombe.

Inasemekana baba yake aliahidi kumpa ng’ombe iwapo angestahimili kisu cha ngariba. “Mimi nikiwa babako nitakupa ng’ombe kama utafaulu kwenye tohara,’’ mzee alimuahidi.

Kulingana na mdokezi, babake alikuwa na wasiwasi huenda mwanawe angepiga nduru mbele ya umati kijijini wakati wa kupashwa tohara. Hii ilimfanya amuahidi ng’ombe kumtia motisha afaulu ‘mtihani’ huo.

Siku ya tohara, boma lote lilikuwa limejaa watu, wake kwa waume, wakubwa kwa wadogo. Wazazi wa kijana walikuwa na wasiwasi. Hata hivyo, kijana huyo alisimama tisti na kutahiriwa.

Sekunde chache baadaye, firimbi ililia kuashiria kwamba alikuwa amefaulu mtihani. Babake hakuamini kwamba mwanawe alikuwa amekuwa mtu mzima.

Kulingana na mdokezi, kijana alimfunika leso na kutakiwa kuketi lakini alikataa katakata kufanya hivyo. Alisema alikuwa akitaka zawadi yake. Watu walishtuka kumuona kijana akikataa kuketi kwenye kiti hadi baba yake atimize ahadi.

Ilibidi baba yake aitwe kudhibitisha iwapo alitoa ahadi hiyo au la. “Baba yake alikubali. Aliagiza ng’ombe mmoja kuletwa na kukabidhiwa kijana.

Alisema kijana alikuwa na haki ya kidai zawadi aliyomuahidi kwa sababu alikuwa ameonyesha ni mwanamume kamili,” alisema mdokezi.

Vigelegele, shangwe na nderemo zilitanda huku wakazi wakifurahia vyakula na pombe ya busaa kwa wingi.

Kulingana na mila na desturi za jamii ya eneo hili, kijana anayepashwa tohara huwa na haki ya kuitisha chochote anachotaka kabla ya kuketi au kuingizwa kwenye nyumba.

Nusra afutwe kazi kwa kuonja mlo wa mdosi

Na DENNIS SINYO

POLO mwenye tabia ya kuonjaonja chakula cha bosi wake, alijipata pabaya baada ya kupatikana peupe akiteremsha mchuzi wa nyama uliokuwa umeandaliwa kwa ajili ya mwajiri wake.

Jamaa huyo ambaye si mpishi, alikuwa na mazoea ya kuingia jikoni saa saba mchana kila siku.

Inasemekana alikuwa akitumia nafasi hiyo kuwachenga wapishi ili kupata nafasi ya kuonja mapochopocho wanayopikia mkubwa wa kampuni iliyokuwa imemwajiri.

Licha ya kupewa onyo mara kadhaa, jamaa hakukoma kabisa kuingia jikoni. Tabia hiyo iliwakera wapishi ambao waliamua kumripoti kwa msimamizi wao ili achukuliwe hatua kali kwani alikuwa amevuka mipaka.

Inasemekana kwamba jamaa huyo aliwekewa mtego bila kujua.

“Mdosi alikuwa amewaambia wapishi wamfahamishe punde tu baada ya jamaa kuingia jikoni. Jamaa alipokuwa akionja chakula ilivyokuwa kawaida yake, mdosi alidunda jikoni na kumfumania peupe,” alisema mdokezi.

Kalameni hakuamini macho yake alipomuona mdosi akimtazama kwa jicho la hasira.

“Kumbe ni ukweli unaonja chakula changu? Unajua kuwa kosa hilo linaweza kukufanya upoteze kazi yako?’’ alifoka mdosi.

Swali hilo lilimfanya jamaa kuishiwa na nguvu na kubakia mdomo wazi. Alilazimishwa kutafuna chakula chote wafanyikazi wengine wakimtazama kwa mshangao.

“Jamaa alishindwa kula chakula hicho na badala yake akapiga magoti kuomba msamaha kwa kosa hilo.

Mdosi wake alisema alikuwa amechoshwa na tabia ya jamaa akisema ilikuwa kinyume na kanuni za kampuni. “Tabia hii haikubaliwi katika kampuni yetu na sitaki kuona tena tukio hilo,” alichemka mdosi.

Jamaa aliinuka na kuondoka jikoni asiamini kwamba ulafi wake nusura umfanye amwage unga. Aliapa kutoingia jikoni tena huku wapishi wakipewa onyo la kutoruhusu yeyote kuingia humo kwa mara nyingine.

Polo ajuta kutomasa mama pima kazini

NA TOBBIE WEKESA

Mukuru, Nairobi

Kizaazaa kilizuka eneo hili baada ya makalameni kumkabili polo walipomkuta akitaka kumbusu mama pima.

Inasemekana makalameni hao walikasirika sana walipogundua kwamba jamaa ndiye aliyefanya wasihudumiwe upesi kwa kumpapasa mama pima.

Kulingana na mdokezi, makalameni hao walifika kwa mama pima asubuhi na mapema ili kupata dozi. Kilichowashangaza ni jinsi mama pima alivyojikokota kuwahudumia. “Kwani leo huyu mama hataki hela zetu?” kalameni mmoja alisikika akisema.

Makalameni waliamua kumpa mama pima muda kidogo. “Ama ameshakuwa tajiri? Acha tumpe muda pengine anajitayarisha kuamka,” makalameni walisema.

Duru zinasema baada ya kungoja kwa muda mrefu, makalameni waliamua kuchungulia ndani ya nyumba ya mama huyo ili kubaini kilichokuwa kikiendelea.

Penyenye zinasema walimuona polo kwenye kochi bila wasiwasi wowote. Kando yake mama pima alikuwa ameinamisha kichwa chake kwenye bega la jamaa.

“Angalia huyu jamaa. Tunaendelea kupigwa na baridi tukingoja pombe kumbe yuko hapa kumzubaisha mama yetu,” kalameni mmoja alisikika akisema.

Makalameni walianza kumfokea jamaa. “Bosi, hatuwezi kuumia kwa sababu yako. Toka hapa haraka,” makalameni walichemka.

Kutokana na aibu, mama pima aliwahimiza makalameni watulie ili awape kinywaji. “Kazi yake tunaijua. Yeye na wanawake hawaachani. Atoke haraka ama tumpe adabu,” mapolo walifoka.

Habari zilizotufikia zinasema makalameni walianza kutafuta viboko tayari kumuadhibu jamaa. “Kama anataka mtu wa kupapasa aje jioni. Hawezi kutupotezea wakati hapa. Hata sisi tuna shughuli nyingine za kufanya,” makalameni waliteta.

Inadaiwa jamaa alipoona mapolo wakiingia kila mmoja akiwa na kiboko, aliamua kuchana mbuga kuhepa aibu.

Polo ajutia kupeleka mkewe kwa mganga

Na SAMMY WAWERU

SERGOIT, ELDORET

Jombi mmoja wa kijiji hiki, alijuta kwenda kwa mganga kutafuta ndumba atulize hasira za mkewe, mwanadada alipochotwa na “daktari ” huyo.

Yasemekana mganga alitumia fursa hiyo kumnyemelea mke wa jamaa wakawa wapenzi.

Kulingana na mdokezi, mke wa jamaa ni mkali na huwa hampi jombi nafasi ya kuongea, hasa anapokosea.

“Mzee akifika kwake akiwa amechelewa, boma huwa halikaliki,” alisema mdokezi.

Jamaa alipoona mkewe amemkalia kupita kiasi, aliomba ushauri kutoka kwa wazee wenza waliomuelekeza kwa mganga.

“Nina mganga mmoja maarufu atakayetuliza mkeo,” mzee mmoja alimweleza.

Yasemekana kalameni hakupoteza muda, alimwaga mtama kwa mganga yule. “Huyu mke wangu ameninyima amani kabisa, hata tunda la ndoa ninapata mara moja kwa mwezi au hata ninanyimwa kabisa,” polo alimsimulia mganga.

Yasemekana mganga alimhakikishia kuwa angezima ghadhabu za mkewe iwapo angemshawishi wafike kwake pamoja. Kulingana na mdokezi kalameni alifanya juu chini, akamhadaa mkewe kuwa alihitaji kumpeleka ziara.

Mama huyo alijawa na furaha, wakapanga siku maalumu wakaenda zao. “Sasa ninaona umetambua mimi ndiye mkeo,” alisema mama huyo kwa tabasamu.

Ziara iliishia bomani kwa mganga aliyewafanyia matambiko. Wanandoa wale waliondoka kwa mganga mke akilalamika kuwa hiyo haikuwa ziara aliyotarajia.

Duru zinasema mama huyo kwa sasa amekuwa mgeni wa karibu kila siku kwa mganga, na kwamba uhusiano wa mapenzi tayari umeota.

Inasemekana akitoka kazini, jambo la kwanza analofanya ni kupitia kwa mganga hadi saa tano za usiku.

Minong’ono imeenea kijijini humo kuwa wawili hao ni wapenzi, na tayari imefikia polo. Baadhi ya watu wanasema huenda mganga alitumia ndumba zake kumchota mama huyo ambaye ni mwalimu.

Nusra kipusa afutwe kazi kukatalia chenji

Na SAMMY WAWERU

Ruiru Mjini

Kidosho mmoja mhudumu wa baa mjini hapa nusra amwage unga alipofumaniwa na bosi akikataa kumrudishia mteja chenji yake.

Yasemekana mwanadada huyo aliajiriwa katika baa hiyo mwezi Aprili mwaka huu na alikuwa na mazoea ya kukosa kurejesha chenji ya wateja.

Juhudi za keshia kumuonya akomeshe tabia hiyo zilionekana kugonga mwamba.

Siku ya kisanga, mteja alimpa noti ya Sh500 atoe bili ya Sh450. Demu alilipa bili hiyo kwa keshia na akaweka chenji mfukoni.

Mteja alingoja chenji yake kwa muda wa dakika 20 hivi hadi akaamua kuuliza kipusa. “Bili yangu ilikuwa Sh450, na nimekupa Sh500 hivyo basi nangoja chenji ya Sh50,” jamaa alimfafanulia.

Inasemekana kipusa alijifanya hakusikia naye mteja hakuchoka kuitisha haki yake.

Kulingana na mdokezi, mteja alipoendelea kuitisha chenji, kidosho alimfokea akimweleza mwanamume hafai kungoja chenji kidogo kama hiyo.

“Wazee ninaowahudumia huwa hawangoji chenji ya pesa kidogo kiasi hicho. Hizi ni za macho kwa aliyekuhudumia,” alisema.

Wawili hao walirushiana maneno yasiyoweza kutajwa hapa. Ni katika harakati hizo ambapo mmiliki wa baa hiyo, ambaye ni mama alifika na kusikiliza malalamishi ya mteja.

“Wewe hizo tabia si katika baa yangu, nenda ufungue yako uwe ukibakia na chenji za wateja wako,” alichemka na kutisha kumpiga kalamu.

Inasemekana kipusa hakuwa na budi ila kumpa jamaa chenji yake ambaye alishukuru mmiliki wa baa hiyo kwa dhati.

Yasemekana mhudumu huyo alionywa na kutakiwa kuepuka tabia za aina hiyo ambazo bosi alizitaja kama za kumharibia biashara yake.

Kalameni ajuta kuwatongoza binti za mama pima

Na DENNIS SINYO

Matungu, Mumias

Jombi aliyefika kwa mama pima kupata dozi, alitimuliwa kwa kumtongoza binti wa mama huyo.

Inasemekana kwamba mama pima alikuwa na wasichana warembo sana ambao hakutaka mtu yeyote kuongea nao bila idhini yake. Hata hivyo, jamaa huyo aliamua kujaribu bahati mama alipokuwa akihudumia wateja wengine.

Kulingana na mdokezi, jamaa alianza kurushia mwanadada mmoja mistari mfululizo ili amwingize box. Licha ya kuonywa kwamba alikuwa akicheza na moto, jamaa alijitia hamnazo.

Inasemekana mama pima alimpata akiongea na binti yake na akakasirika. Alimwamrisha msichana kuondoka kisha akaanza kumfokea jamaa. “Wewe ulikuja kunywa pombe au kusumbua wasichana wangu? Kama hujui kilichokuleta hapa, nitakuonyesha,’’ alifoka mama huyo.

Jamaa akidhani ni mzaha, mama alichukua pombe yake na kuimwaga chini na kumwamuru aondoke mara moja. “Usicheze na mimi. Ninaweza kukupa adabu ambayo hutasahau maishani mwako. Nakwambia simama na utoke

hapa mara moja!” mama huyo aliamuru.

Jamaa alikataa mara ya kwanza lakini mama akawa mkali zaidi. Alimnyanyua juu kwa shati na kumsukuma nje. Alimuonya kwamba akirejea wake angekiona cha mtema kuni.

Kioja hicho kilimfanya jamaa kusalimu amri na kuondoka kwa uchungu huku akirushiwa maneno mazito mazito. “Usidhubutu kurejea hapa. Unakuja hapa na Sh50 na unajifanya kuwa sonko kumbe huna kitu ila kusumbua watoto wangu tu,” mama alimweleza.

Mama huyo ana wasichana watano warembo anaowachunga sana huku yeyote anayedhubutu kuwasumbua akijipata pabaya

Kulingana na mdokezi, jamaa huyo aliponea kwani mama huwacharaza wanaume wanaowatamani mabinti zake wakiwa kwake. “Kwanza wewe una bahati sana.

Huyo mama angekucharaza kwa nyahunyo watu wakiangalia,” jamaa huyo aliambiwa na makalameni wenzake baada ya kuondoka kwa mama pima.

Jombi aaibisha demu aliyetaka warudiane

Na JOHN MUSYOKI

Embu Mjini

MWANADADA mmoja kutoka mjini hapa, alifokewa na kalameni kwa kujipendekeza kwake baada ya kumtema.

Inasemekana kwamba demu huyo alikuwa mpenzi wa jamaa huyo lakini wakaachana baada ya demu kukataa kuolewa naye.

Penyenye zinasema wakati huo demu alikuwa na kiburi na kusema hangeolewa na jamaa mwingine mwenye pesa.

Kalameni alipoona kitumbua chake kilikuwa tayari kimeingia mchanga, aliamua kuishi maisha ya ukapera huku akisubiri siku moja mola atamjalia.

Demu aliolewa lakini baada ya miezi tisa alishindwa kuvumilia maisha ya ndoa na akatengana na mume wake.

Kwa kuwa demu huyo alikuwa ameolewa na bwanyenye, alipora pesa nyingi na akaanza kujiendeleza kimaisha.

Majuzi, alikutana na jamaa na akaanza kujipendekeza akitaka warudiane lakini kalameni alikataa katakata ombi la mwanadada huyo.

“Pole sana mpenzi wangu. Nilikukosea sana na nimeamua turudianae ili tufungue upya ukurasa wa uhusiano wetu. Kwa sasa sina shida yoyote. Nilienda kutafuta pesa. Nina uwezo wa kugharamia mahitaji yako yote na pia yangu. Nakusihi unipe nafasi,” demu alisema.

Inasemekana ombi lake liliambulia patupu jamaa alipomgeukia na kumrushia maneno makali.

“Una nini sasa kama sio pesa za kupora. Mimi sio mjinga. Hapo awali ulipandwa na kiburi na kunitupa. Hata kama una mali kiasi gani hauna nafasi kwangu. Endelea kuponda raha tu. Pole sana. Ondoka mbele yangu, ” jamaa alimwambia demu.

Demu hakuwa na lingine ila kuondoka baada ya jamaa kukataa ombi lake. Baadhi wa watu walipigwa na butwaa baada ya jamaa huyo kufanya uamuzi ulioshtua watu wengi.

Hata hivyo, haikujulikana ikiwa baadaya Kalameni aliamua kusaka mke mwingine au alibadilisha msimamo wake huo mkali na kumkubali mkewe wa kwanza.

Polo akemea mke kwa kuomba chumvi kwa dume jirani

Na JOHN MUSYOKI

MAJENGO, EMBU

SINEMA ya bure ilishuhudiwa mtaani hapa kalameni mmoja alipomgombeza mkewe kwa kuomba chumvi kutoka kwa jirani.

Duru zinasema kuwa jamaa aliasi ukapera majuzi na hakutaka mkewe kushirikiana na wapangaji hasa wanaume.

Siku ya kioja, kalameni alipofika nyumbani jioni alipigwa na mshangao mkubwa kupata demu katika chumba cha barobaro mmoja akiomba chumvi na akadhani walikuwa wakipiga gumzo za hapa na pale.

Jamaa alikasirika na kujitoma ndani ya chumba na kuanza kumgombeza demu nusura amwangushie makonde akimshuku alikuwa akigawa asali.

“Wewe ni mwanamke sampuli gani? Kumbe umekuwa ukishirikiana na wanaume hapa plotini kula uroda. Leo ni leo basi msema kesho ni mwongo. Nimekupata mimi mwenyewe. Utajutia siku za kuzaliwa kwako,” kalameni alimfokea demu wake.

Mwanadada alijaribu kumweleza kwamba alikuwa akiomba chumvi lakini jamaa hakusikia la mwadhini wala la mteka maji msikitini. Aliendelea kumtetesha vikali bila kusita.

Inasemekana mwenye chumba aliamua kumsaidia mwanadada huyo kwa sababu alikuwa amezidiwa maarifa lakini juhudi zake ziliambulia patupu alipotishwa vikali.

“Unamtetea kwa nini? Kumbe umekuwa ukinyemelea mke wangu na ndio mnadai alikuwa akiomba chumvi. Wewe ni mtu bure kabisa. Utakiona cha mtema kuni,” jamaa alisema.

Wakati majamaa walipokuwa wakimenyana, demu alipata nafasi ya kuponyoka na kutoka shoti ungedhani alikuwa akifukuzwa na pepo.

Ilibidi baadhi ya wapangaji kuingililia kati na kuzima mzozo huo. Demu alikimbililia usalama wake na haikujulikana iwapo alirejea.

maa huyo tena.

…WAZO BONZO…

Kakangu huenda kwa mganga akitaka kuniangamiza, polo aambia kijiji

Na TOBBIE WEKESA

NYATIKE, MIGORI

Kalameni mmoja kutoka hapa aliwashangaza wazee alipowaambia kwamba ndugu yake huenda kwa mganga akitaka kumwangamiza amrithi mkewe.

Kulingana na mdokezi, polo aliitisha kikao na wazee ili kujadili mienendo ya ndugu yake. Polo alidai kwamba mtu fulani aliyejitambulisha kama mganga maarufu alimpigia simu na kumtahadharisha dhidi ya kula pamoja na ndugu yake.

“Sijui mganga huyo alipata wapi nambari yangu. Lakini aliniambia kwamba ndugu yangu humtembelea akitaka nipatwe na ugonjwa mbaya ili nilemazwe,” polo alidai.

Polo, alidai kwamba ndugu yake hufanya haya yote ili apate wakati mzuri wa kumrithi mke wake. Vicheko vilisikika kikaoni huku wazee wakimtaka polo afafanue zaidi kuhusiana na madai aliyoibua.

“Hata nyinyi nimeona mmeungana na huyu mtu. Kama ni hivyo acha mkutano huu ukamilike na nimshughulikie jinsi nijuavyo,” polo aliwafokea wazee.

Inasemekana ndugu yake alisimama na kuwaeleza wazee kwamba polo alikuwaa amepagawa. “Huyu jamaa ninashuku ameingiwa na mashetani. Kama sio hivyo, basi ameanza kuvuta bangi,” ndugu ya polo alidai.

Lakini jamaa alidai kwamba si simu ya mganga pekee ambayo ilimfanya kushuku ndugu yake. Alisema mara kwa mara amekuwa akipokea simu kutoka kwa majirani wakimueleza jinsi polo alivyopenda kuingia kwa boma lake.

“Nikiwa kazini huwa ninapata hadithi nyingi sana. Yeye hufanya nini na mke wangu?” polo alichemka.

Inadaiwa wazee walimshauri polo afanye uchunguzi wa kina bila kumhusisha mtu yeyote. “Hakuna uchunguzi nitafanya,” polo alipandwa na mori na kumzaba kaka kofi. Wazee wote walilazimika kutorokea usalama wao.

…WAZO BONZO…

Hofu ya ulevi wa jombi yafikisha mke kwa bosi

Na LEAH MAKENA

GIAKI, MERU

MAMA wa hapa alishangaza watu wengi alipozuru ofisi alikokuwa akifanya kazi mume wake ili kupata hakikisho kwamba  hakuwa amepigwa kalamu.

Mama alikiri kuwa alishuku  mumewe alikuwa amefutwa kazi kwa sababu mara nyingi alionekana kwa mamapima akibugia mvinyo na kila alipomuuliza alidai  kuwa alikuwa likizoni.

Habari zasema kuwa mama alisikitishwa na tabia ya mumewe ya kurauka alfajiri kana kwamba alikuwa akienda kazini kisha kukita kambi kwa mamapima mchana kutwa.

Hapo ndipo aliamua kufika kwa bosi kubaini iwapo jamaa alifaa kuwa likizoni baada kukosa kutoa cheti cha kuonyesha  alikuwa mapumzikoni.

Siku ya tukio, mama alifika ofisini mapema na kulazimika kusubiri  bosi wa mumewe aliyefika mwendo wa saa nne.

Baada ya kukubaliwa kuongea na bosi, mama alifungua roho na kuelezea hofu yake kuhusu tabia ya polo na  kukiri kuwa ilimpa wasiwasi  ndipo akashuku jamaa alikuwa amepigwa kalamu.

Inasemekana kuwa mama alipata nafuu alipohakikishiwa kuwa jamaa bado alikuwa mfanyikazi wa kampuni hiyo ila bosi akaonya kuwa mwenendo wake ulikuwa unatiliwa shaka na hivyo alitakiwa kurekebisha iwapo hakutaka kumwaga unga.

Hapo ndipo mama alipata nguvu na kuanza mikakati ya kuwafahamisha ndugu za polo wamfanyie kikao ili apunguze ulevi kabla ya kitumbua kuingia mchanga.

Hata hivyo, wosia wa mama ulionekana kama kumpigia mbuzi gitaa kwani polo alikuwa amezama kwenye ulevi na hakuonyesha dalili za kujinasua.

Minong’ono yasema kuwa mama aliapa kufanya vyovyote vile kumtoa kwenye dimbwi la ulevi na akatishia kuondoka iwapo polo asingetambua juhudi zake.

…WAZO BONZO…

Jombi wa kunyemelea wajane kijijini aona cha mtema kuni

Na JOHN MUSYOKI

MASINGA, MACHAKOS

KALAMENI mmoja kutoka sehemu hii alikemewa vikali na wakazi kwa tabia ya kuwanyemelea wajane kijijini.

Penyenye zinasema kuwa jamaa hakuasi ukapera licha ya kufikisha umri wa kuoa na hakupenda kuchumbia mabinti mtaani.

Cha kushangaza ni kuwa jamaa alikuwa akinyemelea wajane na kuwahangaisha kwa kuvuja mali yao.

Hata hivyo, tabia yake ilikasirisha wakazi waliojua njama yake na wakapanga kumchukulia hatua.

Siku ya kioja jamaa alipokuwa kwa mjane mmoja mwendo wa saa mbili usiku baadhi wa wakazi walifika na kuanza kumfokea vikali. “Hautalala hapa leo.

Una akili timamu wewe. Hauna haya mtu mzima kama wewe kurandaranda kwa maboma ya wajane na kukesha kwao kana kwamba ni kwako.

Haujaoa na hata hauchumbii mabinti mtaani. Unafanya nini kwa wajane. Kuanzia leo tunakupa onyo la mwanzo na la mwisho. Tukikupata kwenye boma za wajane tutakuonyesha cha mtema kuni,” wakazi walisema.

Jamaa alipoambiwa atoke boma ya mjane huyo alinuna na kupuuza agizo la wakazi. Hata hivyo, juhudi zake hazikufua dafu wakazi walipomnyanyua juu na kumfurusha.

“Nenda kabisa, unataka nini hapa na sio kwako. Unakatalia hapa kwa nini. Wewe ni mtu bure kabisa. Nenda ukaoe mke wako,” wakazi walizidi kufoka. Alipomtaka mjane huyo kumtetea kama mwenyeji wake, alikataa na kumwambia aondoke.

Ilibidi jamaa kutoka shoti kuhepa ghadhabu za wakazi kwa sababu wengine walikuwa tayari wamebeba fimbo kumtwanga.

Inasemekana baadhi ya wajane walikuwa wamepanga njama na wakazi baada ya kuchoshwa na tabia ya polo ya kuwanyemelea.

…WAZO BONZO…

Jombi mlevi akamatwa akifuata kipusa msalani

Na TOBBIE WEKESA

TOLL, RUIRU

KIZAAZAA kilizuka katika kilabu kimoja eneo hili baada ya polo kutimuliwa alipopatikana na mabaunza katika choo cha akina dada. Kulingana na mdokezi, polo aliingia kilabuni kupigia mwili pole na baada ya kukamata chupa kadhaa, ulevi ulimlemea vilivyo.

Duru zinasema tamaa ilimuingia polo hadi akawa anawataka warembo wote kilabuni.

Penyenye zinasema polo alikuwa akisonga kutoka meza moja hadi nyingine akitaka kuzungumza na kila mrembo hadi akaamua kumfuata mmoja aliyekuwa akienda msalani.

Yasemekana mrembo aliingia ndani ya choo, naye polo akaamua kujitupa ndani ya choo kilichoshikana na kile alichoingia mwanadada huyo.

“Tafadhali msupa, naomba nambari yako ya simu,” sauti hafifu ya polo ilisikika. Kwa bahati mbaya, jamaa wawili mabaunza wa kilabu walipita karibu na vyoo vile.

“Hiyo sauti nimesikia haiwezi kuwa ya demu. Lazima kuna jamaa ameingia hapa,” baunza mmoja alimueleza mwenzake.

Duru zinasema mabaunza waliamua kumngoja polo nje.

“Boss, nani kakwambia hicho choo ni cha wanaume. Ama wewe ni mwanamke,” baunza walimchemkia polo.

Polo aliwaangalia na kujitia hamnazo. “Choo ni choo tu. Kazi ni moja. Hamuwezi kunikataza kuingia popote,” polo aliwaambia mabaunza. Majamaa nao walikasirishwa na matamshi yake ya madharau.

“Huyu jamaa hafai kuwa hapa. Anafaa kutolewa hapa. Anaingiaje choo cha akina mama na maagizo ndiyo haya pamoja na picha,” baunza alishangaa. Inadaiwa wawili hao walimuinua na kumtoa nje.

“Tunakupa dakika mbili uwe umepotea hapa,” mabaunza walimkaripia polo.

Majamaa hao walimtimua polo huku wateja waliokuwa kilabuni wakishangazwa na tabia yake.

…WAZO BONZO…

Buda akiri kanisani anakaranga yaya na mkewe kwa kikaango kimoja

Na SAMMY WAWERU

MUNYU, THIKA

KIOJA kilishuhudiwa katika kanisa moja mtaani hapa mzee aliyeokoka alipokiri kwamba alikuwa na uhusiano wa kimapenzi na yaya.

Inasemekana mkewe alikuwa akijaribu juu chini jamaa aokoke ili awe akiandamana naye kanisani kwa miaka 17 iliyopita. Hivi majuzi, ilikuwa furaha kwa mama huyo maombi yake yalipojibiwa na jamaa akaokoka.

“Huyu ndiye Mungu ninayemuomba kila siku, umekaribishwa sana kanisani mume wangu,” mkewe alisema akitabasamu.

Wakiwa kanisani mama aliketi karibu na mumewe uso wake ukionekana kujawa tabasamu. Misa ilianza na kuendeshwa kwa utaratibu.

Pasta alilisha kondoo wake chakula cha kiroho, ukawadia muda wa kutaka aliyeamua kukabidhi maisha yake kwa Mwenyezi Mungu ajitokeze.

Jamaa alinyanyuka na kuombewa. Hata hivyo, aliomba apewe dakika kadhaa ashukuru. “Kwa hakika niko mahala hapa kwa juhudi za mke wangu mpendwa. Nina ujumbe ambao ningeomba kumpasha,” jamaa alisema kanisa likitulia.

Alijipa dakika mbili hivi na hatimaye akapasua mbarika.

“Kuanzia leo nimekuwa mtu mpya, ambaye ameamua kumfuata Yesu Kristo. Maisha yangu ya awali yalikuwa yenye maovu tele, ninaomba kwa dhati mke wangu anisamehe kwa kuwa na uhusiano haramu na yaya. Ni jambo ambalo limekuwa likinikereketa maini,” alifichua.

Hata hivyo, yasemekana mkewe alikasirika, akasonga mbele na kumshika mashati. “Haiwezekani, iweje ufanye ukorofi huo? Yaani umekuwa ukinikaanga chungu kimoja na mjakazi wa nyumbani?” mama alitaka kujua.

Mama huyo alitishia kumpa polo talaka lakini pasta akamtuliza akimwambia tayari jamaa alikuwa kiumbe kipya.

Aliita kikaokilichojumuisha wazee wa kanisa, na haikufahamika kilichojadiliwa.

…WAZO BONZO…

Demu ararulia polo long’i akisaka hela

Na JOHN MUSYOKI

KOSOVO, MACHAKOS

KIZAAZAA kilizuka katika kilabu kimoja sehemu hii kidosho alipoangushiwa makofi na wateja kwa kurarua mfuko wa suruali ya jamaa akitaka pesa za kununua dozi.

Duru zinasema jamaa alikuwa ameahidi kumnunulia demu pombe siku moja lakini akadinda kutimiza ahadi yake.

Siku ya kioja, polo alipoenda kilabuni kupata dozi, alimpata demu akiwa amemgoja kwa hamu na ghamu amtimizie ahadi yake.

“Uliahidi kuwa utaninunulia pombe lakini umekuwa ukinipiga chenga. Leo ni leo na hautaondoka hapa bila kunitimizia ahadi yangu,” demu alisema.

Jamaa kwa upande wake alipuuza madai ya demu huyo na kutaka kuondoka lakini demu alimwahi na kuanza kumfokea vikali.

“Ahadi ni deni na dawa yake ni kulipa. Nataka pesa za kununua pombe. Uliniahidi lakini ukaanza kunipiga chenga. Leo hauna bahati lazima utimize ahadi,” demu alisema.

Hali iliyoonekana kuwa mzaha iligeuka na kuwa vita demu alipoweka mkono mfukoni mwa jamaa huyo akitaka kuchukua pesa kwa lazima.

Wakati demu alipozidiwa maarifa alirarua mfuko wa suruali ya polo na wateja wakajawa na hamaki na kumzaba makofi huku wakimfokea vikali.

“Kwenda kabisa mwanamke usiye na heshima wewe. Hauna haya kurarua mfuko wa suruali ya mwanamume ukitaka akupe pesa kwa lazima.

Siku hizi umeanza kuvuna usikopanda. Ukiendelea na tabia hiyo tutakuchukulia hatua na tukupige marufuku kuingia hapa na katika baa zote mjini hapa,” wateja walisema.

Wakati demu alipozidiwa na ghadhabu za wateja alichomoka mbio na kwenda kujificha chooni kabla ya kuondoka. Hata hivyo haikujulikana polo alikuwa na uhusiano gani na mwanadada huyo.

…WAZO BONZO…

 

Kisura aaibisha kakake kutangaza alifeli KCSE

Na TOBBIE WEKESA

BUTERE, MUMIAS

Kioja kilizuka katika eneo la hapa baada ya mzozo mkali kuzuka baina ya polo na dadake. Inadaiwa polo alitaka kumuadhibu kipusa kwa madai kwamba alimkosea heshima mbele ya marafiki zake. 

Kulingana na mdokezi, kipusa alikasirishwa na hatua ya polo kuwakaribisha marafiki zake katika chumba chake bila idhini yake.

Jamaa huyo alikuwa na mazoea ya kuwaalika marafiki katika chumba cha dada yake, jambo ambalo halikumfurahisha kipusa. Siku ya kioja demu aliamua kukomesha tabia hiyo na akamkabili mbele ya wageni.

Kipusa alianza kumfokea polo kwa kudai kwamba ni mjinga aliyefeli mitihani wa kidato cha nne (KCSE).

“Wewe ulipopelekwa shuleni ulikuwa ukiongoza kutokea nyuma. Ungekuwa na akili nzuri hungewaleta hawa watu kwa nyumba yangu.

Kuwa na heshima,” kipusa alimwambia polo. Duru zinasema baada ya marafiki zake kuondoka, polo aliamua kumvamia dadake huku akiapa kumpa adabu. Inasemekana ilikuwa ni hali ya miguu niponye kwa kipusa.

“Huwezi kuniaibisha hivyo mbele ya marafiki zangu. Hata kama nilianguka shuleni, wewe ni mtoto sana kunitusi,” polo alimkaripia dadake.  Majirani walibaki kutazama sinema ya bure.

“Kwenda kabisa. Ukitaka kuolewa nenda ukaolewe. Sijui unafanya nini hapa,” polo alimkemea kipusa.

Hata hivyo mwanadada aliapa kutokubali jamaa kuwakaribisha wageni wake katika chumba chake.

“Ni kweli ulifeli mtihani kwa sababu ya tabia kama hii. Hauna haya kualika marafiki katika nyumba ya dada yako hata siwezi kupata nafasi ya kufanya kazi zangu. Bure kabisa wewe,” demu aliwaka.

Majirani walimuunga mkono na kumlaumu jamaa kwa kukosa heshima. Walimsaidia mwanadada kumfukuza jamaa wakisema hawangetazama akimdhulumu dada yake.

…WAZO BONZO…

Mlo wa bei ghali wafanya kidosho ajipate singo

Na LEAH MAKENA

KARIOBANGI, NAIROBI

KIDOSHO mmoja mtaani hapa aliachwa mataani baada ya kushindwa kudhibiti tamaa yake ya kupenda samaki kila alipokutana na mpenzi wake.

Habari zasema kuwa kidosho alizoea kumtaka jamaa kumnunulia samaki kila alipozuru kwake au walipopata nafasi ya kula mikahawani, tabia iliyokuwa ikimuudhi jamaa.

Siku chache za kwanza, jamaa alifika kwa kidosho akiwa na samaki ila akashangaa mwanadada alipoanza kumlazimisha kufika kwake na samaki bila kujali iwapo alikuwa na pesa au la.

Juhudi za jamaa kujitetea ziliambulia patupu kwani kidosho alisisitiza kuwa ulikuwa wajibu wake kumlisha kwa kila alichotaka na kushughulikia mahitaji yake kama ishara ya kuonyesha angemtunza akimuoa.

Siku ya kioja, jamaa alimvutia kidosho waya na kumtaka wakutane kwenye hoteli moja mjini ili wazungumze na hapo ndipo mambo yalitumbukia nyongo.

Mwanadada alitonesha kidonda alipomtaka weita kumletea samaki licha ya jamaa kuitisha vinywaji kwa kuwa mazungumzo yalipangiwa kuchukua muda mfupi.

Hapo ndipo jamaa alipandwa na mori na kuanza kumkemea mwanadada kwa kutaka kutumia pesa zake kiholela.

“Unadhani huwa ninaokota pesa barabarani? Haunipendi ila ni pesa zangu unataka kufuja. Hiyo sahani ya ugali na samaki uliyoitisha utalipa wewe ili ujue ninayopitia,” jamaa alisema na kusimama.

Inasemekana kuwa polo alimuonyesha kidosho mgongo baada ya kulipia chupa mbili za soda alizokuwa ameitisha na kumtaka mwanadada kuzibugia zote.

Duru zasema kuwa mrembo alilazimika kulipa deni huku akijuta kutofuata agizo la jamaa.

Huo ndio ulikuwa mwisho wa uhusiano huo kwani kidosho hakufanikiwa kumpata jamaa tena.

…WAZO BONZO…

Weita mpenda ombaomba amwaga unga

Na DENNIS SINYO

MECHIMERU

MWANADADA aliyekuwa weita katika hoteli moja hapa alipoteza kazi yake kwa kuwa na mazoea ya kuwaomba wateja pesa.

Inasemekana mwanadada huyo alikuwa na mazoea ya kuwakimbilia wateja matajiri kuwahudumia.

Kila mara akimaliza kuwahudumia, alikuwa akiwaomba wamuachie kitu kidogo. Inasemekana wenzake walikasirishwa na tabia yake wakidai ilikuwa ikiaibisha hoteli hiyo.

Hata hivyo, demu aliwaambia wakome kumuonea wivu kwa kujua kazi.

Duru zaarifu kwamba, alikuwa akifanikiwa kwenda nyumbani na zaidi ya sh 20,000 alizopata kutoka kwa wateja matajiri kama tip.

Hii haikuwafurahisha wahudumu wenzake waliosema hakuwa na heshima.

“Badala ya kuwahudumia wateja, yeye anatumia nafasi hiyo kuwaomba pesa,’’aliteta mhudumu mwenzake. A

lipokosa kubadilisha tabia, wenzake walimripoti kwa meneja lakini akakana madai hayo na kusema walikuwa wakimuonea wivu kwa kupendwa na wateja kwa sababu ya huduma zake nzuri kwao.

Hata hivyo, kitumbua chake kiliingia mchanga wakati mteja mmoja alipoamua kulalamika kwa meneja kwamba demu alikuwa amemuomba pesa.

Yasemekana baada ya kumhudumia mteja huyo, alimuomba Sh5,000, jambo ambalo mteja huyo hakufurahia.Aliamua kumjuza meneja kuhusu tukio hilo ili hatua ichukuliwe.

Lakini alipoulizwa tena, mwanadada huyo alidai hakuwa amefanya kosa lolote. “Kwani shida iko wapi nikijitafutia hela? Huu mshahara haba haunisaidii kitu
chochote ndio maana natafuta mbinu ya kujisaidia,’’alisema mhudumu huyo.

Kulingana na mdokezi, meneja alikasirika na kumpiga kalamu. Alipokuwa akiondoka, demu aliwalaumu wenzake kwa kumuonea kijicho na kumsaliti lakini akaapa kwamba alikuwa na njia nyingi za kupata riziki na wala si hotelini pekee.

…WAZO BONZO…