Uingereza waadhibiwa vikali kwa utovu wa nidhamu wa mashabiki wao kwenye fainali ya Euro 2020

Uingereza waadhibiwa vikali kwa utovu wa nidhamu wa mashabiki wao kwenye fainali ya Euro 2020

Na MASHIRIKA

TIMU ya taifa ya Uingereza imeamrishwa kusakata mechi moja katika vibarua vijavyo vya kimataifa bila mashabiki uwanjani, hiyo ikiwa sehemu ya adhabu baada ya vurugu na fujo kushuhudiwa ugani Wembley wakati wa fainali ya Euro 2020 iliyowakutanisha na Italia mnamo Julai 11, 2021.

Shirikisho la Soka la bara Ulaya (Uefa) limepokeza Uingereza adhabu nyingine ya kucheza mchuano mwingine wa kitaifa bila mashabiki katika kipindi cha miaka miwili ijayo.

Mbali na adhabu hiyo, Shirikisho la Soka la Uingereza (FA) lilitozwa faini ya Sh13 milioni kwa utovu wa nidhamu uliodhihirishwa na mashabiki wa nyumbani wa Uingereza ndani ya uwanja wa Wembley kikosi chao kilipokuwa kikivaana na Italia waliotawazwa mabingwa wa Euro hatimaye.

“Japo hatukubaliani na ukubwa wa kiwango cha adhabu hiyo kutoka kwa Uefa, tunaheshimu maamuzi yao,” ikasema sehemu ya taarifa iliyotolewa na vinara wa FA.

Ni mara ya kwanza kwa adhabu ya kiasi hicho kutolewa dhidi ya Uingereza ambao sasa watalazimika kucheza mojawapo ya mechi zao zijazo za Uefa Nations League mnamo Juni 2022 bila mashabiki uwanjani.

Chini ya kocha Gareth Southgate, Uingereza wameratibiwa kuvaana na Albania mnamo Novemba 12, 2021 kabla ya kupimana ubabe na San Marino siku tatu baadaye katika juhudi za kufuzu kwa fainali zijazo za Kombe la Dunia mnamo 2022 nchini Qatar.

Mashabiki wa Uingereza walipigana na maafisa wa usalama ugani Wembley na kuharibu mali ya thamani kubwa wakati wa fainali ya Euro 2020 iliyoshuhudia Italia wakishinda 3-2 kupitia penalti baada ya sare ya 1-1 mwishoni mwa muda wa ziada.

TAFSIRI NA: CHRIS ADUNGO

You can share this post!

PATA USHAURI WA DKT FLO: Nitashikaje mimba ya mtoto mvulana?

Angwenyi sasa ataja mizozo ya ardhi kama chanzo cha mauaji...

F M