Wakazi wa mitaa ya mabanda Nairobi wahangaika kupata maji

Na SAMMY KIMATU

WAKAZI katika mitaa mitatu ya mabanda katika Kaunti ya Nairobi wameomba serikali kuwachukulia hatua kali maafisa katika idara ya maji ambao hushirikiana na wachuuzi wa maji kuwahangaisha.

Kwa wiki ya pili mfululizo, wakazi hao kutoka mtaa wa mabanda wa Maasai, Kayaba na Hazina kwenye kaunti ndogo ya Starehe wamekosa maji safi ya kutumia nyumbani.

Aidha, kufuatia ukosefu huo, wanalazimika kuchota maji ya visima yaliyo na chumvi baada ya Idara ya Huduma za Jiji la Nairobi (NMS) kuchimba visima vitatu.

Njia nyingine badala ni kulazimika kununua maji yanayochuuzwa mitaani na wenye mikokoteni japo wanahofia mkurupuko wa magonjwa ya kuambukizana kwani hawajui maji hayo yanakotoka.

“Baada ya kukosa maji yanayosambazwa na kampuni ya maji mitaani, hatuna budi ila kuchota hayo ya kutoka visimani licha ya maji hayo kuwa na chumvi,’’ Bw Stephen Ndichu akaambia Taifa Leo.

Ofisa mmoja wa NWC alisema uhaba wa maji umetokana na ujenzi wa barabara mpya inayounganisha Uwanja wa Kimataifa wa Ndege wa JKIA na Westlands mkabala wa barabara Kuu ya Mombasa.

Wakazi walidai kuna njama ya maafisa wa maji kushirikiana na wachuuzi ili wakifunga maji, wachuuzi wapate fursa ya kuuza maji kwa bei ya juu.

“Kuna mifereji ambayo imefungwa hadi barabara mpya itakapomalizika hivyo tunawauliza walioathirika watuvumilie kwa muda,” afisa huyo ambaye hatuwezi kutaja jina lake kwa sababu za itifaki akasema.

Wakazi wa mitaa hiyo wakati huu hutegemea maji ya kisima katika Shule ya Msingi ya Mukuru katika mtaa wa mabanda wa Mukuru na yale ya kisima cha Goal Kenya kilichoko mtaani wa mabanda wa Hazina.

Chifu wa eneo la Mukuru-Nyayo, Bw Charles Mwatha alisema maji hayo hufunguliwa kuanzia saa kumi na mbili asubuhi na kufungwa saa kumi na mbili za jioni.

‘’Maji haya hufunguliwa kila siku kuanzia saa kumi na mbili za asubuhi hadi saa kumi na mbili za jioni na hayalipwi bali wakazi huchota bila kulipishwa pesa kwa sababu ni ya serikali,’’ Bw Mwatha akasema.

Jana, katika mtaa wa Hazina, kulikuwa na milolongo mirefu ya mitungi kufuatia ukosefu wa maji miferejini. Akinamama waling’ang’ania nafasi huku purukushani ilkishuhudiwa na kulazimu maji hayo kufungwa.

‘’Wanawake walizozana na kupigania maji jambo lililopelekea maji hayo kufungwa hadi hali itulie,’’ Bw James Mulandi akasema.

Ilimlazimu mwenyekiti wa kisima hicho aliye kadhalika mwanachama wa kamati ya Nyumba Kumi, Bw Hussein Mohammed kuwahutubia waliokuwa wakichota maji na kuwauliza wawe na utaratibu wanapochota maji na baadaye hali ikatulia.

Katika kisima cha Kaiyaba, mama mmoja alifurushwa na mitungi yake alipokabiliana na watoto wakitofautiana ni nani atakayechota maji kwanza kuliko mwingine.

Habari zinazohusiana na hii