GAVANA wa Nyamira, Amos Nyaribo, anakodolewa macho na hoja nyingine ya kutimuliwa afisini kutokana na madai ya ufisadi yanayozingira utawala wake.

Baada ya kunusurika mara mbili, Bw Nyaribo wiki hii atalazimika kujikuna kichwa kwa sababu hoja ya kumtimua afisini inapangwa kuwasilishwa leo.
Diwani wa Bonyamatuta, Julius Kimwomi Matwere, anapanga kuwasilisha hoja hiyo leo katika kikao spesheli kuanzia saa nne asubuhi.
“Notisi ya kuwasilishwa kwa hoja ya kumng’atua Amos Nyaribo, Gavana wa Nyamira afisini kwa msingi wa kukiuka Kikatiba na kutumia vibaya afisi yake,” ikasema notisi ya Bunge la Kaunti ya Nyamira.
Hata hivyo, wandani wa Bw Nyaribo wanadai kuwa hoja ya kumng’atua afisini na uvamizi uliotekelezwa nyumbani kwake na makachero wa Tume ya Maadili na Kupambana na Ufisadi (EACC) ni kutokana na uamuzi wake wa kuunga mkono Naibu Kiongozi wa Jubilee, Dkt Fred Matiang’i, kwa wadhifa wa urais 2027.
Wandani wa Bw Nyaribo pia wanasema hoja hiyo ni kumlemaza asishiriki kampeni za chaguzi ndogo kwenye wadi tatu za udiwani katika kaunti hiyo.
Wadi hizo ni Nyansiongo, Nyamaiya na Ekerenyo na chaguzi hizo ndogo ambazo zitafanyika Novemba 27 zinaonekana kama jukwaa la ubabe wa kisiasa kati ya Rais William Ruto na Dkt Matiang’i.
Hoja hiyo itakuwa ikiwasilishwa wiki chache baada ya EACC kuvamia makazi ya Bw Nyaribo jijini Nairobi na Nyamira kuhusu madai ya ufisadi.
EACC ilisema uvamizi huo ulikuwa sehemu ya uchunguzi kuhusu utoaji tenda zenye thamani ya Sh382 milioni za kujenga afisi za serikali ya Kaunti ya Nyamira.
Pia EACC ilisema kuwa inachunguza madai kuwa Bw Nyaribo aliidhinisha malipo na kujilipa Sh18 milioni.
Bw Nyaribo alinusurika mara mbili kutimuliwa ofisini huku tukio la hivi punde likiwa ni Septemba 2024.
Hii ilikuwa mara ya pili chini ya mwaka mmoja kwa hoja ya kumtimua kuwasilishwa sababu zikiwa ni matumizi mabaya ya afisi na ukiukaji wa sheria.
Hoja ya pili ilisambaratika baada ya madiwani 22 kuiunga ilhali idadi hitajika ni madiwani 23. Hoja hiyo ilikuwa imewasilishwa na Diwani wa Wiper, Evans Matunda.
Wakati huo, wakili wa Gavana Nyaribo, Jacob Ngwele, alilalamikia idadi ya hoja nyingi za kuwatimua magavana ambazo hazina msingi wowote wala hakuna ushahidi wa kutosha.
Mara ya kwanza Bw Nyaribo aliponusurika kuondolewa afisini, madiwani 16 waliunga hoja ya kumbandua huku 18 wakipinga hoja hiyo.
Wakati huo, hoja hiyo iliwasilishwa na Diwani wa Wadi ya Esise Josiah Mangéra ambaye aliwaonyesha wenzake jinsi ambavyo Bw Nyaribo alikiuka katiba, sheria zinazoongoza utendakazi wa serikali za kaunti na sheria za Kaunti ya Nyamira.
Baada ya majaribio kumngátua gavana kufeli, kulikuwa na mgawanyiko mkubwa katika Bunge la Kaunti huku madiwani wakiandaa vikao vyao sambamba tena maeneo tofauti.