NAIBU Rais Kithure Kindiki aliwasili Mbeere North mnamo Novemba 17, 2025 kuongoza kampeni za uchaguzi mdogo uliokamilika Novemba 27, 2025.

Kiongozi huyo alipata kikosi cha UDA kimelegea kutokana na mashambulizi makali kutoka kwa vigogo watatu wa siasa eneo hilo.

Kiongozi wa Democracy for Citizens Party (DCP) Rigathi Gachagua, pamoja na viongozi wawili wenye ushawishi mkubwa – Justin Muturi wa Democratic Party (DP) na Lenny Kivuti wa Devolution Empowerment Party (DEP) – walikuwa wamepania kuzima UDA.

Muungano wa Muturi na Kivuti ulipatia DP nguvu kubwa, kwani mara ya kwanza katika historia ya Mbeere North, viongozi hao wawili waliokuwa wakishindana kwa ushawishi walikuwa upande mmoja. Wawili hao huonekana kama wasemaji wa Mbeere North, na mara nyingi kauli yao hutazamwa kama ukweli usiotetereka.

Kindiki alijiunga na kikosi cha kampeni cha UDA ambacho kilikuwa kikiongozwa na aliyekuwa Mbunge wa eneo hilo, sasa Waziri wa Utumishi wa Umma Geoffrey Ruku, Gavana wa Embu Cecily Mbarire na Seneta Alexander Mundigi.

Kwa mujibu wa wanachama wa kikosi cha mikakati cha UDA, mabadiliko ya haraka ya mbinu yaliyolenga masuala yanayokumba eneo hilo kame, na mikutano ya moja kwa moja na wazee wa jamii, yalibadilishia upepo wa UDA kuelekea ushindi.

Kati ya Novemba 17 na Novemba 26, siku moja kabla ya kura, Prof Kindiki alifanya zaidi ya mikutano ya kimkakati 50 na mikutano 17 ya hadhara ambayo inadaiwa kubadili mwelekeo wa kisiasa wa eneo hilo.

“Alifanya mikutano ya hadhara 17 tuliyoiweka wazi, lakini nyuma ya pazia alikuwa akikutana na kundi moja hadi manne kwa siku – wazee, viongozi wa mitaa na maajenti wa chama,” akasema mwanachama wa kikosi cha mikakati ya Kindiki.

Mkutano wake wa kwanza Siakago ulimpa nguvu mpya mgombea wa UDA Leonard Wamuthende maarufu Leo, ambaye alikuwa ameshambuliwa kwa siku kadhaa na Bw Gachagua, Bw Muturi na Bw Kivuti.

Katika hotuba kali, Prof Kindiki alisema “Nitampatia Gachagua funzo. Nitamuonyesha si mfalme wa Mlima Kenya. Nitambwaga kwa pigo moja. Mimi ndiye mfalme wa Mlima, na nitamuaibisha.”

Aliahidi kusalia Mbeere North hadi Novemba 28 na kurejea Nairobi na Wamuthende akiwa Mbunge Mteule.

Alimsawiri Wamuthende kama kiongozi wa maendeleo, akisema wapinzani walikuwa wakiuza maneno matupu na kejeli.

“Wamuthende ndiye chaguo sahihi kuinua Mbeere North. Akiungwa mkono na serikali, atabadilisha eneo hili hi,” alisema.

Katika matokeo ya mwisho, Wamuthende alipata kura 15,802 dhidi ya mpinzani wake wa karibu Newton Kariuki (Karish) wa DP aliyepata 15,308. Duncan Mbui wa Chama Cha Kazi alikuwa wa tatu kwa 2,480.

Ushindi huo ni pigo kubwa kwa Bw Gachagua, ambaye amekuwa akijitaja kama mfalme wa siasa za Mlima Kenya, huku Prof Kindiki akijidhihirisha kuwa mbabe wa kisiasa eneo hilo.

Tangu mwanzo, Naibu Rais alisuka kampeni mahususi, akijikita katika masuala muhimu ya maeneo matatu ya Mbeere North – Evurore, Nthawa na Muminji.:

Prof Kindiki alionyesha kufahamu changamoto za eneo hilo – barabara mbovu, ukosefu wa maji na kiwango cha chini cha umeme – na kumsawiri Wamuthende kama suluhisho.