DAVID Athman Ndakwa wa chama cha United Democratic Alliance (UDA) alishinda kiti cha ubunge cha Malava katika uchaguzi mdogo wa Alhamisi.

Ndakwa alishinda wagombeaji wengine sita, akiwemo mpinzani wake mkuu Seth Panyako wa DAP-K, kujaza nafasi iliyoachwa na marehemu Malulu Injendi.

Ndakwa alipata kura 21,264, akimshinda Panyako aliyepata 19,306 katika uchaguzi mdogo uliokuwa na ushindani mkali.

Ushindi wake ulionekana kama nafuu kwa Mkuu wa Mawaziri Musalia Mudavadi, aliyekuwa na presha kubwa kuhakikisha wagombeaji wa serikali wanashinda eneo la Magharibi.

Uchaguzi mdogo huu ulikuwa kipimo muhimu cha nguvu ya kisiasa kwa viongozi wa eneo la Magharibi wanaoshirikiana na Rais Ruto kabla ya Uchaguzi Mkuu wa 2027.

Kikosi cha Mudavadi pia kilijumuisha Moses Wetangula (Spika wa Bunge la Kitaifa), Wycliffe Oparanya (Waziri wa Ushirika), Susan Mang’eni (Katibu, Biashara Ndogo) na Fernandes Barasa (Gavana wa Kakamega).

Ushindi wa Ndakwa unapanua mgawanyiko eneo la Magharibi, ambapo Gavana wa Trans Nzoia George Natembeya na Naibu kiongozi wa DCP Cleophas Malala wamekuwa wakiwania ubabe.

Hata hivyo, katika Bungoma, mgombea huru Eric Wekesa, mshirika wa Natembeya, alishinda Vincent Maunda wa Ford Kenya kwa kura 6,162 dhidi ya 2,765, ishara ya kupungua kwa ushawishi wa Wetangula katika Bungoma.

Kabla ya uchaguzi, Msaidizi wa Rais William Ruto, Faruk Kibet, alipiga kambi Malava akiongoza mikutano ya uwezeshaji wa kiuchumi kwa wanawake, vijana na mashirika ya kidini ili kuvutia wapiga kura kumchagua mgombea wa serikali.