JE, umenunua nyani au mbuzi katika chaguzi zilizofanyika siku tatu zilizopita? Nimeangalia kwa macho yangu, nikavaa na miwani, ila sikumakinika iwapo niliona mbuzi yeyote hapo.

Nyani walijitokeza kwelikweli…

Inatambwa hadithi ya watu wawili waliokwenda sokoni kuuza wanyama wao. Mmoja alimpeleka mbuzi, mwingine nyani.

Aliyekuwa na mbuzi alihuzunika si haba kwa kuwa wengi waliofika sokoni walimshabikia zaidi nyani kwa vituko na madoido yake.

Alirukaruka kistadi, akirushiwa ndizi anadaka na kula kwa wepesi na madaha, sikwambii na akipiga mapozi ya picha na mashabiki wake.

Mwenye mbuzi alihuzunika, akahisi njaa na hata akasinzia. Alipiga miayo na kushika tama akijiuliza iwapo kweli atapata mnunuzi.

Hatimaye, mashabiki wa nyani walikwenda alikokuwa mbuzi na kuanza kupiga bei. Mwenye mbuzi alimuuza kwa bei ghali kwa kuwa kulikuwa na ushindani wa wateja.

Huku kainamisha uso kwa fedheha, mwenye nyani aliongozana na nyani wake wakarejea nyumbani, nyani akiteuka kwa ndizi za watu alizokula akichochewa acheze zaidi.

Huenda katika chaguzi za juzi sote tumenunua nyani kwa kuwa mbuzi hawakutokea. Hatukupewa chaguo jingine isipokuwa nyani watundu warukao juu ya miti na kuuma-uma matunda yetu na kuleta uharibifu.

Labda tatizo kuu ni sisi. Pengine tunawapenda nyani kuliko mbuzi. Ushahidi wangu dhidi yetu ni kwamba tunapenda vituko vya kisiasa, na wanasiasa wetu wamejua hilo kwa hakika.

Huenda ndiyo sababu hawakujadili sera zozote walipokuwa wakifanya kampeni, bali walituonyesha sarakasi za kila aina. Na kucheka tulicheka kweli, nusra tuteguke mbavu!

Hivi uliupokuwa unajichekea na kujiangukia ovyo, uliwahi kujiuliza sera za aliyekuchekesha ni gani? Mweledi wa kuchekesha na kutukana ana manufaa gani kwako?

Vyama vyote vilivyoshiriki chaguzi hizo havikuweza kuwaelekeza wagombea wao wajadili sera badala ya sarakasi?

Kwani siasa za Kenya ni mchezo wa mjini tu, watu kutukoroga akili na kupita na kura zetu kana kwamba tumelala usingizi wa pono?

Tatizo ni wanasiasa au sisi wenyewe? Hatuna uwezo wa kushinikiza kuuziwa sera badala ya sura na sarakasi? Siasa zetu haziwezi kuwa za adabu na heshima?

Niambie, jina la mtu, linavyoandikwa na kutamkika, lina maana gani katika utungaji sheria unaoendelea bungeni? Uzuzu wetu unatusahaulisha kwamba ‘Muthende’ linatamkika kama jina jingine lolote nje ya janibu za Mlima Kenya.

Si Wajapan na majina yao yasiyotamkika kwa Kiswahili wangali hai tu? Kwani yanawauma? Kwani wanajali chochote? Jina lina umuhimu gani hasa?

Si hata Kenya tuna Nameless na tunamshangilia? Tumechezwa shere hali tu macho kabisa!

Msanii King Kaka alisema ‘wajinga ni sisi’. Leo ukiwakuta washindi na washinde wa chaguzi hizo wakiangua vicheko huku wakinywa chai pamoja kwenye mikahawa ya kifahari – ambako wewe humudu gharama ya maji – utajua mjinga ni nani.

• Douglas Mutua ni mwanahabari Mkenya anayeishi Amerika ([email protected])