GAVANA wa Trans Nzoia, George Natembeya, amepinga wazo kwamba ushindi wa serikali katika chaguzi ndogo za 2025 unaashiria kitakachotokea katika uchaguzi mkuu wa 2027.

Bw Natembeya anayeongoza vuguvugu la Tawe linalolenga kuunganisha jamii za Magharibi ya Kenya, alisema chaguzi hizo ndogo ziliathiriwa pakubwa na matumizi ya raslimali za serikali kwa kiwango ambacho anaamini hakiwezi kudumishwa katika uchaguzi wa kitaifa.

Natembeya alisema serikali ilitumia nguvu ili kupata ushindi, ikitumia rasilmali nyingi, wafanyakazi wa umma na ushawishi wa kisiasa kupita mipaka.

Kulingana naye, mbinu hiyo ilikuwa ya kuunda taswira ya kuelekea 2027, lakini akasisitiza kuwa mkakati huo utaporomoka iwapo utatumiwa katika uchaguzi mkuu unaohusisha nchi nzima.

Alisema ni viongozi wachache tu wa upinzani — yeye mwenyewe, Cleophas Malala na Seneta wa Kakamega Boni Khalwale — waliopambana na serikali, ambayo, kulingana naye, iliweka nguvu zake zote, huku wabunge wote wa maeneo ya Kakamega wakipambana nao, lakini bado wakatoa ushindani mkali.

Kwa mujibu wake, hilyo ni ithibati kuwa eneo la Magharibi halitakuwa rahisi kushawishiwa katika mchuano mkubwa wa uchaguzi.

Natembeya pia aliwatetea wakazi wa Malava, akisema walijitokeza kwa wingi na kwa ari licha ya presha na vitisho kutoka kwa serikali.

Licha ya kupoteza katika chaguzi hizo ndogo, alisema watatumia Uchaguzi Mkuu wa 2027 kuipa serikali funzo ambalo haitasahau.

Seneta Khalwale, alisisitiza kuwa serikali haifai kutarajia hali sawa na hiyo mwaka 2027.

Alidai mbinu zilizotumiwa Malava na seriakali ili ipate ushindi haziwezi kufanya kazi katika uchaguzi wa kitaifa, na Wakenya watazikataa kwa kuwa nchi imepiga hatua kubwa kidemokrasia, tofauti na mataifa jirani kama Tanzania.

Wawili hao, ambao waliunga mgombeaji wa chama cha DAP- Kenya Seth Panyako aliyeshindwa na David Ndakwa katika uchaguzi mdogo wa Alhamisi, walisema wanafanya mashauriano kabla ya kuchukua hatua za kisheria kupinga kasoro nyingi zilizogubika uchaguzi huo.