SERIKALI inapaswa kuingilia kati kwa dharura mzozo unaoendelea kati yake na wahudumu wa afya hasa wauguzi ili kukomesha migomo na kurejesha huduma katika hospitali za umma nchini.

Afya ni haki ya msingi ya kila mwananchi, hivyo haifai wagonjwa kuachwa wakiteseka kwa sababu ya mivutano kuhusu masuala ya ajira.

Migomo ya wahudumu wa afya imekuwa ikisababisha usumbufu mkubwa kwa wananchi, hasa wale wanaotegemea hospitali za umma kwa matibabu.

Wagonjwa wanaohitaji huduma za dharura, wajawazito, watoto, wazee na watu wenye magonjwa sugu ndio wanaobeba mzigo mkubwa zaidi wakati huduma zinapokatizwa.

Ni muhimu kutambua kuwa wahudumu wa afya wana haki ya kudai mazingira bora ya kazi, mishahara na marupurupu yanayostahili pamoja na utekelezaji wa makubaliano yaliyofikiwa kati yao na serikali.

Hata hivyo, serikali nayo ina wajibu wa kuhakikisha kuwa migogoro kama hiyo haitoi mwanya wa kuhatarisha maisha ya wananchi.

Suluhisho la kudumu haliwezi kupatikana kupitia vitisho, lawama au mazungumzo yasiyo na mwisho.

Serikali inapaswa kuwaita wadau wote wa afya mezani na kuendesha mazungumzo ya dhati yenye lengo la kufikia makubaliano yanayotekelezeka.

Pale ambapo kuna ahadi ambazo hazijatekelezwa, serikali inapaswa kuweka ratiba wazi ya kuzitimiza.

Aidha, ni muhimu kuwepo utaratibu wa kuhakikisha huduma muhimu zinaendelea wakati wa migomo.

Huduma za dharura, uzazi, matibabu ya wagonjwa mahututi na huduma nyingine zinazookoa maisha hazipaswi kukwama kabisa.

Tatizo jingine linalopaswa kushughulikiwa ni uhaba wa wahudumu katika hospitali nyingi.

Serikali inapaswa kuajiri wataalamu wa kutosha, kuboresha vifaa na dawa, na kuhakikisha hospitali zina mazingira yanayowawezesha madaktari, wauguzi na wataalamu wengine kufanya kazi kwa ufanisi.

Kwa upande wao, viongozi wa vyama vya wafanyakazi wanapaswa pia kutambua uzito wa jukumu walilonalo.

Haki za wafanyakazi ni muhimu, lakini zinapaswa kudaiwa kwa njia inayozingatia maisha ya wagonjwa.

Serikali isiisubiri hali kukithiri zaidi. Iingilie kati sasa, isuluhishe madai halali ya wahudumu wa afya na kuhakikisha hospitali zinarejelea hali ya kawaida ya kutoa huduma kikamilifu.

Maisha ya wananchi hayawezi kusubiri mazungumzo yasiyo na mwisho.

Kila Mkenya ana haki ya kupata huduma za afya kikatiba, nayo Serikali inayo wajibu wa kutimiza wajibu wake ifaavyo.