Mahakama yazima mchakato wa kumfurusha Jaji Mkuu Koome
MAHAKAMA Kuu imeizuia Tume ya Huduma ya Mahakama (JSC) kuendelea kushughulikia maombi ya kuwaondoa majaji wa Mahakama ya Juu hadi kanuni za kusimamia mchakato huo ziwekwe rasmi.
Majaji Charles Kariuki, Lawrence Mugambi na Bahati Mwamuye walisema Katiba inahitaji kila ombi la kumuondoa jaji liwasilishwe dhidi ya jaji mmoja mmoja na lifafanue kwa uwazi madai ya utovu wa nidhamu yanayomkabili.
Walisisitiza kuwa majaji huteuliwa, huapishwa na huwajibika kibinafsi hata wanapofanya kazi kama jopo moja.
Mahakama ilifutilia mbali malalamishi kadhaa yaliyowasilishwa dhidi ya majaji wa Mahakama ya Juu, yakiwemo yaliyomlenga Jaji Mkuu Martha Koome, na kuyataja kuwa batili na kinyume cha Katiba.
Pia ilikataza JSC kuchukua hatua zaidi kwa msingi wa malalamishi hayo.
Kesi hiyo ilitokana na malalamishi yaliyowasilishwa baada ya Mahakama ya Juu kuzuia wakili Ahmednasir Abdullahi na kampuni yake ya sheria kufika mbele ya mahakama hiyo.