WAKENYA wana matumaini kuwa bei ya maziwa itapungua katika wiki zijazo kutokana na mvua inayoendelea kunyesha katika maeneo mengi nchini.

Matumaini ya wengi ni kuwa mvua inatarajiwa kuongeza upatikanaji wa malisho na uzalishaji wa bidhaa hiyo.

Kwa miezi kadhaa sasa, uhaba wa maziwa uliochangiwa na ukame wa muda mrefu na ukosefu wa malisho umesababisha bei kupanda kutoka Sh50 hadi Sh85 kwa lita.

Wengi wanasema gharama hiyo ya juu imewalazimu kubadili matumizi yao ya kila siku, huku wengine wakipunguza kiasi cha maziwa wanachonunua ili kukabiliana na hali ngumu ya maisha.

Kwa familia nyingi, kupanda kwa bei hakukuathiri tu unywaji wa chai, bali pia bajeti ya kununua bidhaa nyingine muhimu za nyumbani.

Hata hivyo, wana matumaini kuwa mvua za Novemba na Desemba zitasaidia wakulima kupata malisho ya kutosha na kuongeza uzalishaji.

Wanasema upatikanaji wa nyasi na malisho mengine karibu na mashamba utapunguza pia gharama ya kuyasafirisha kutoka maeneo ya mbali, ambayo imechangia kuongeza gharama ya uzalishaji wa maziwa.

Kwa upande mwingine, wauzaji wa maziwa wameathiriwa na uhaba huo baada ya baadhi ya wateja kupunguza ununuzi kutokana na bei ya juu.

Wauzaji hao wanasema biashara zao zilidorora tangu Julai, wakati wakulima walipoanza kupunguza kiasi cha maziwa walichokuwa wakisambaza kutokana na ukame.

Baadhi ya wakulima waliokuwa wakisambaza hadi lita 100 kwa siku walipunguza kiasi hicho hadi lita 50 au 60.

Hali ilizidi kuwa mbaya wakati maduka makubwa yalipoanza kuweka kiasi cha maziwa ambacho kila mteja angeweza kununua.

Wauzaji wanasema mvua imeibua matumaini ya kurejea kwa hali ya kawaida, lakini wanataka serikali kutafuta suluhisho la kudumu la kukabiliana na uhaba wa maziwa.

Wanasema hatua ya kuwasaidia wakulima kupata malisho na kupunguza gharama ya uzalishaji itawanufaisha pia watumiaji, ambao wamekuwa wakilipa zaidi kwa bidhaa hiyo muhimu.