Emerging Stars walianza kwa kishindo kampeni ya kuwania kufuzu Fainali za Mataifa ya Afrika kwa wachezaji wa Umri wa miaka 23 (AFCON ) 2027, baada ya kuinyorosha Tanzania 4-1 katika mchezo wa kwanza wa raundi ya kwanza uliochezwa Uwanja wa Nyayo, Nairobi jana.

Ushindi huo mnono unawapa vijana wa kocha Kevin Kimani mabao matatu kuelekea mchezo wa marudiano utakaochezwa nchini Tanzania Oktoba 6.

Ikiwa Kenya itaenda mbele kwa jumla ya mabao ya mikondo miwili, itavaana na Ivory Coast katika raundi ya pili. Ivory Coast walipewa nafasi ya kutinga moja kwa moja raundi ya pili kwa kuwa miongoni mwa timu bora barani.

Stars walianza kwa kasi ya ajabu baada ya Odari Osama kuwafungia bao la kuongoza ndani ya dakika ya kwanza, akitumia pasi ya nahodha Kevin Wangaya na kuupachika mpira wavuni.

Kenya iliendelea kuikandamiza Tanzania, huku Henry Omollo akikaribia kuongeza goli la pili dakika ya 21, lakini shuti lake likaenda nje ya lango.

Tanzania walianza kuingia mchezoni taratibu ulivyoendelea, huku Kassim Kiswanya akileta hatari upande wa kulia.

Dakika ya 19, Kiswanya alitumia kosa la safu ya ulinzi ya Kenya lililofanywa na Baron Ochieng na kupiga shuti kali lililogonga mwamba wa goli.

Wageni pia walitishia kwa mpira wa adhabu dakika ya 30 baada ya Sheikhan Ibrahim kuangushwa nje kidogo ya kisanduku. Ibrahim alipiga adhabu hiyo, lakini kipa Caleb Ramcy anayecheza Uholanzi aliokoa vyema.

Hata hivyo, Kenya ilirejea mchezoni na kuongeza bao la pili dakika ya tano ya nyongeza ya kipindi cha kwanza.

Wangaya alibadilisha mchezo kwenda upande wa kulia, ambako Osama alimpakulia Okoth ambaye alipiga shuti kali lililomshinda kipa wa Tanzania Omary Abdallah kunyaka.

Timu zilikwenda mapumziko Kenya ikiwa mbele kwa 2-0.

Kocha Kimani alifanya mabadiliko mawili mwanzoni mwa kipindi cha pili, akimuingiza kiungo wa AFC Leopards Kelly Madada na Hassan Beja kuchukua nafasi za Andreas Odhiambo na Paul Osama.

Mabadiliko hayo yalizaa matunda papo hapo, Wangaya akifunga bao la tatu dakika tano baada ya mapumziko. Nahodha huyo aliwachenga mabeki kadhaa wa Tanzania kabla ya kuupachika mpira kwenye kona ya chini ya kulia.

Tanzania walipata bao la kufutia machozi dakika ya 54 kupitia Ibrahim aliyetia kimiani kwa penalti baada ya mchezaji wa Kenya kugusa mpira kwa mkono ndani ya kisanduku.

Madada alirejesha uongozi wa mabao matatu dakika ya 75, akimalizia shambulizi safi na kufanya iwe 4-1. Alionyeshwa kadi ya njano kwa kuvua jezi aliposhangilia.

Matokeo hayo yanaiweka Stars katika nafasi nzuri ya kumalizia kazi katika mchezo wa marudiano na kutinga raundi ya pili.

Mchuano huu wa kufuzu unajumuisha raundi tatu, huku raundi ya mwisho ikipangwa kufanyika Machi 2027.

Washindi saba wa jumla ya mabao katika raundi hiyo ya mwisho wataungana na wenyeji Misri kwenye fainali.

Mashindano hayo pia yatakuwa njia ya Afrika ya kufuzu kwa michezo ya soka ya wanaume katika Olimpiki ya 2028 jijini Los Angeles, Marekani.