Kalameni azima waliodai mkewe ana jicho la nje
POLO wa hapa alipuzilia mbali masengenyo ya wakazi kuhusu uaminifu wa mkewe akisema hiyo ni ishara tosha mrembo amekuwa tisho kwa wapinzani.
Udaku uliotua kwenye meza ya Dondoo za Hapa na Pale unaarifu kuwa, mke wa jamaa ni mwanasiasa limbukeni na juzi uvumi ulienea kuwa amejishindia bwanyenye kama sponsa wa siasa zake.
Mwanadada alipinga madai haya vikali huku mumewe vilevile akasema tetesi hizo si za kweli.
“Ninapata matumaini zaidi nikisikia tetesi kama hizo. Ni wazi sasa wapinzani wa mke wangu wameingiwa na baridi mapema. Atawabwaga wote,” jamaa alisema na kutoa kicheko cha ushindi.
Jamaa alimhakikishia mrembo kuwa yu huru kutembea atakavyo kunadi sera zake kwa raia.
Walioeneza uvumi huo waliripotiwa kuabika na kufyata ndimi zao.