JOPO la Masuala ya Ukimwi limeagiza mwanamume aliyefichua hali ya afya ya aliyekuwa mkewe kwa jamaa, waumini wa kanisa na wanajamii bila idhini yake kumlipa fidia ya Sh900,000.

Mahakama hiyo ilipata kuwa mwanamume huyo, ambaye ni mhubiri, alikiuka haki ya mwanamke huyo ya kutunza siri za taarifa zake za kiafya na kumsababishia maumivu ya kisaikolojia.

Katika uamuzi wake, mahakama pia ilimzuia mwanamume huyo kufichua tena hali ya Ukimwi ya aliyekuwa mkewe.

Mwanamke huyo, aliyetambuliwa kwa herufi LGG, aliwasilisha kesi Mei 25, 2026, dhidi ya aliyekuwa mumewe GMM, akimlaumu kwa kusambaza taarifa kuhusu hali yake ya HIV bila idhini yake.

Alitaka alipwe fidia kutokana na ubaguzi, unyanyasaji wa kisaikolojia, kudhalilishwa na kupoteza mapato. Alisema vitendo hivyo vilimfanya akumbwe na unyanyapaa, aibu na msongo wa mawazo.

Wawili hao walikuwa wameoana na kupata watoto watatu kabla ya kutalikiana mwaka 2016.

LGG aliambia mahakama kuwa alikuwa amemsaidia mumewe kifedha na kihisia alipokuwa akiendelea na masomo yake, huku akigharamia mahitaji ya familia.

Hata hivyo, alisema uhusiano wao ulianza kuzorota baada ya kugunduliwa kuwa na virusi vya HIV.

Kwa mujibu wa ushahidi wake, mumewe alianza kumwambia kuwa angekufa hivi karibuni kutokana na virusi hivyo. Pia alidai kuwa alitishiwa kunyimwa pesa na mali kwa sababu ya hali yake ya afya.

LGG alidai kuwa aliyekuwa mumewe alimnyima msaada wa kifedha, akaingilia kazi yake na kutumia hali yake ya HIV kumdhalilisha kila walipokosana nyumbani.

Alisema GMM alifichua hali yake ya afya katika kesi zilizokuwa zikisikilizwa katika Mahakama ya Hakimu Mkuu Nairobi, zikiwemo kesi za talaka na malezi ya watoto, na pia wakati wa ibada katika kanisa moja nchini.

Hata hivyo, alikiri kuwa hakuwa na stakabadhi za kesi ya talaka kuthibitisha kile kilichosemwa mahakamani.

Ili kuimarisha madai yake, LGG aliwaita mashahidi watatu, akiwemo jirani, mshiriki wa kanisa na dadake.

Jirani huyo alieleza mahakama kuwa alimsikia GMM akipaza sauti kwa Kikuyu akisema mwanamke huyo alikuwa mgonjwa na alikuwa na HIV.

Alisema pia mwanamume huyo alikuwa akitoa kauli kama hizo kwa wanajamii wengine.

Hata hivyo, shahidi huyo hakuweza kutaja watu wote waliokuwa wamesikia matamshi hayo wala kutoa tarehe kamili za matukio hayo.

Shahidi mwingine, ambaye alikuwa mshiriki wa kanisa, alisema alihudhuria ibada ambapo GMM alidaiwa kusimama mbele ya waumini na kutangaza kuwa LGG alikuwa na HIV.

Kwa upande wake, GMM, aliyejitaja kuwa mhubiri mwenye uzoefu wa muda mrefu, alikanusha madai hayo.

Alisema aliendelea kumsaidia aliyekuwa mkewe baada ya kufahamu hali yake ya afya na kwamba walihudhuria ushauri nasaha wa wanandoa kwa miaka miwili.

Alisisitiza kuwa migogoro yao ilitokana na matatizo ya ndoa na haikuhusiana na hali ya afya ya mwanamke huyo.

Afisa mmoja wa kanisa aliyetoa ushahidi kwa upande wake pia alikanusha madai ya kufichuliwa kwa taarifa hizo. Alisema hakushuhudia wala kusikia kuhusu tukio hilo.

Dadake LGG alisimulia tukio jingine ambapo alisema GMM alimshambulia mwanamke huyo mbele yake na kaka yao.

Alidai kuwa mwanamume huyo alimwamuru mkewe aondoke nyumbani na aende kwa mtu aliyemwambukiza Ukimwi.

Jopo lilipata ushahidi wa kuunga mkono sehemu ya madai hayo katika barua kutoka kwa chifu wa eneo, iliyosema LGG alikuwa ameripoti kufukuzwa nyumbani na kupigwa kofi mbele ya kaka yake.

Katika uamuzi wake, jopo lilisema baadhi ya madai ya kufichuliwa kwa hali ya Ukimwi yalithibitishwa, lakini haikupata ushahidi wa kutosha kuthibitisha madai kwamba GMM alitangaza hali hiyo kanisani.

Pia haikuweza kubaini iwapo mwanamume huyo alifichua taarifa hizo wakati wa kesi za talaka kwa sababu rekodi kamili za kesi hizo hazikuwasilishwa.

Kwa jumla, LGG alipewa Sh500,000 kama fidia ya kufichuliwa kinyume cha sheria kwa hali yake ya na Sh400,000 kwa maumivu ya kisaikolojia, na kufanya jumla ya fidia kuwa Sh900,000.