WAZIRI wa Utumishi wa Umma Geoffrey Ruku na Mbunge wa Kasarani Ronald Karauri wanajiandaa kukabiliana katika mchujo wa UDA kuwania ugavana wa Nairobi 2027, hali ambayo ni mtihani kwa Rais William Ruto kudhibiti ushindani wa kisiasa ndani ya chama chake.

Wawili hao wanataka kumrithi Gavana Johnson Sakaja, aliyehama UDA na kujiunga na ODM.

Bw Ruku anajitambulisha kama msimamizi mwenye uzoefu, huku Bw Karauri akijenga kampeni yake kwa kudai kazi yake Kasarani inaonekana.

Bw Karauri alipokelewa rasmi UDA Novemba 9 na viongozi wakuu wa chama, akiwemo Kiongozi wa Wengi katika Bunge la Kitaifa Kimani Ichung’wah na Katibu Mkuu Hassan Omar.

Bw Ichung’wah alifichua kuwa Rais Ruto alikuwa amempigia simu na kumwelekeza ampokee mbunge huyo.

Bw Ichung’wah pia alimtaja Karauri kuwa mgombea wa chama atakayekabiliana na ODM Nairobi, hatua iliyozua hisia kuwa huenda anapendelewa dhidi ya wagombea wengine.

Hata hivyo, Bw Ruku amesema anajitambulisha na UDA licha ya kuwa alichaguliwa bungeni kupitia DP kabla ya kujiuzulu na kuwa waziri.

“Rais amebadilisha nchi hii na ninakubaliana kikamilifu na misingi ya UDA. Ndiyo maana ninawania kiti hicho kupitia tiketi ya UDA,” akasema.

Alipoulizwa iwapo amezungumza na Rais kuhusu kuondoka serikalini na kuwania ugavana, alijibu: “Tumwache Rais nje ya mazungumzo haya.”

Bw Ruku amekuwa akifanya mikutano na wakazi wa Nairobi, akisema amekuwa akiishi jijini humu tangu akiwa na umri wa miaka 18 na watoto wake watano wamezaliwa na kusomea jijini.

Amesema anaelewa changamoto zinazowakabili wakazi wa maeneo tofauti, kuanzia Kawangware hadi Donholm.

Pia amepinga rekodi ya Bw Karauri Kasarani, akidai mbunge huyo anafaa kueleza alichowafanyia wapiga kura wake kabla ya kutafuta wadhifa mkubwa zaidi.

“Ukienda Kasarani na kuwauliza wakazi kama watamchagua tena kuwa mbunge, watakuambia hapana,” akasema Bw Ruku.

Waziri huyo anasema uzoefu wake kama mbunge wa Mbeere Kaskazini na waziri unamwandaa kuongoza Nairobi.

“Ninasimamia wizara inayohudumia Jamhuri nzima ya Kenya,” akasema.

Kwa upande wake, Bw Karauri amesema atakubali matokeo ya mchujo ikiwa yatafanyika kwa uwazi. Hata hivyo, ameonya kuwa anaweza kuwania kama mgombea huru akihisi amenyimwa haki.

“Natumai mchujo utakuwa wa uwazi lakini nikichezewa kama nilivyochezewa Jubilee, nitawania kama mgombea huru,” akasema.

Tofauti na Bw Karauri, Waziri Ruku amesema atamuunga mkono yeyote atakayeshinda mchujo wa UDA.

Kinyang’anyiro hicho pia kinamshirikisha Patrick Musili Mbangula, ambaye amesema hatajiondoa kwa sababu ya kujiunga kwa Bw Karauri.

Bw Ruku amemkosoa Gavana Sakaja kuhusu ukusanyaji taka na uhaba wa maji, akisema kubadilisha chama hakufuti wajibu wake kwa wakazi.

“Uchafu katika kila mtaa wa Nairobi haukubaliki kabisa,” akasema.

Bw Sakaja alichaguliwa 2022 kwa kura 699,000 na sasa anatafuta muhula wa pili kupitia ODM japo Nairobi nzima kwa sasa ina wapiga kura milioni 2.7.