RAIS William Ruto anatarajiwa kuzuru eneo la Kusini mwa Bonde la Ufa wiki ijayo huku kukiwa na malalamishi yanayoongezeka kutoka kwa wakazi wanaodai serikali yake imepuuza eneo hilo licha ya kuwa ngome yake kuu ya kisiasa.

Kwa miaka mingi, kaunti za Bomet, Kericho pamoja na sehemu za Narok na Nakuru zimekuwa ngome ya Rais Ruto.

Hata hivyo, miaka minne baada ya kuingia mamlakani, baadhi ya wakazi na viongozi wa mashinani wanasema ahadi nyingi za maendeleo hazijatekelezwa, huku miradi mikubwa ikipelekwa katika maeneo yaliyounga mkono upinzani.

Malalamishi hayo yalijitokeza wazi baada ya viongozi kutoka Kusini mwa Bonde la Ufa kumtembelea aliyekuwa Naibu Rais Rigathi Gachagua nyumbani kwake Wamunyoro, Nyeri, wakidai jamii ya Kipsigis imetengwa kimaendeleo, ajira na uteuzi wa nyadhifa serikalini.

Bw Gachagua alitabiri kuwa Rais Ruto angelazimika kuzuru eneo hilo kutuliza hali, jambo ambalo sasa limethibitishwa na Waziri wa Usalama wa Ndani Kipchumba Murkomen na Kiongozi wa Wengi katika Seneti Aaron Cheruiyot.

Bw Murkomen alisema rais atazindua na kukagua miradi ya barabara, maji na nyumba za gharama nafuu, huku akisisitiza kuwa madai ya kutengwa kwa eneo hilo hayana msingi.

“Rais atafika Kusini mwa Bonde la Ufa kuzindua miradi ya maendeleo ikiwemo barabara, maji na nyumba za gharama nafuu. Sote tujitokeze kumpokea,” akasema Bw Murkomen katika Shule ya Upili ya Tenwek.

“Kumekuwa na malalamishi kutoka kwa watu ambao hawaelewi miradi ambayo serikali imetekeleza eneo hili. Serikali imefanya mengi na itaendelea kufanya mengi siku zinazokuja,” akaongeza.

Bw Cheruiyot pia alisema ziara hiyo itaonyesha miradi iliyofadhiliwa na serikali na kuzima madai kuwa Kusini mwa Bonde la Ufa imepuuzwa.

“Wiki chache zijazo, Ras atakuwa hapa kuzindua miradi ya maendeleo na kuzima madai kuwa eneo hili limetengwa,” akasema Bw Cheruiyot katika hafla ya umma Bomet.

Hata hivyo, wakazi wengi wanasema hali halisi ni tofauti. Wanalalamikia kucheleweshwa kwa miradi muhimu kama Bwawa la Bosto, fidia na makazi ya zaidi ya familia 21,000 zilizoondolewa katika Msitu wa Mau, pamoja na barabara kadhaa ambazo zimekwama kwa miaka licha ya ahadi za serikali.

Barabara ambazo zimetajwa ni pamoja na Chebole–Siongiroi–Chebunyo, Silibwet–Kiptagich–Olenguruone na Sotik–Cheplanget–Roret, ambazo wakazi wanasema ziko katika hali mbaya.

Pia kuna malalamishi kuhusu kusimama kwa ujenzi wa Uwanja wa Riadha ya Bomet, pamoja na kucheleweshwa kwa upanuzi wa viwanja vya ndege vya Kerenga na Itembe.

Mzozo wa ardhi wa Angata Barikoi nao umeongeza hasira za wakazi.

Baadhi yao wanadai kuna njama za kuwanyang’anya ardhi waliyoimiliki kwa muda mrefu, huku wakilaumu serikali kwa kutumia polisi badala ya kutafuta suluhu.

Mzozo huo ulivuta hisia za kitaifa baada ya watu sita kuuawa wakati wa maandamano.

Ukosefu wa ajira pia ni chanzo kingine cha malalamishi. Vijana wanadai nafasi za kazi katika taasisi za serikali sasa zinauzwa ilhali hawana maelfu ya pesa zinazoitishwa.

Hivi majuzi watu wanne walifikishwa mahakamani Bomet wakituhumiwa kuuza barua bandia za ajira za Tume ya Kuwaajiri Walimu (TSC).

Bw Gachagua ameendelea kutumia hali hiyo kuishutumu serikali, akidai jamii ya Kipsigis imewekwa kando licha ya kumuunga mkono Rais Ruto kwa dhati mnamo 2022.

Ziara ya rais katika South Rift inatarajiwa kuwa mtihani muhimu wa kisiasa huku akijaribu kurejesha imani ya ngome yake ya kisiasa.