RAIS William Ruto na kiongozi wa Linda Mwananchi Edwin Sifuna sasa wanatoshana kwa umaarufu katika kinyang’anyiro cha urais, hali inayoashiria ushindani mkali katika Uchaguzi Mkuu wa 2027, kwa mujibu wa utafiti mpya.

Utafiti uliofanywa na kampuni ya TIFA ambao ulitolewa jana, ulionyesha kuwa viongozi hao wawili wanaungwa mkono na asilimia 31 kila mmoja, na kwa sasa hakuna mshindi anayeweza kufikisha asilimia 50.

Kwa mujibu wa TIFA, kiongozi wa Wiper Kalonzo Musyoka ana asilimia tisa, akifuatwa na Naibu Kiongozi wa Jubilee, Dkt Fred Matiang’i kwa asilimia tano huku aliyekuwa Naibu wa Rais Rigathi Gachagua akiwa na asilimia nne.Akizungumza wakati wa kutangaza matokeo hayo jijini Nairobi, Mtafiti wa TIFA Tom Wolf alisema umaarufu wa Bw Sifuna umeongezeka kwa kasi tangu alipoondoka ODM na kuwa kiongozi wa Linda Mwananchi.

“Umaarufu wa Bw Sifuna umeongezeka kwa kiasi kikubwa tangu apate chama cha kisiasa, ikilinganishwa na tafiti za awali alipokuwa bado ndani ya ODM,” akasema Wolf.Umaarufu wa Bw Sifuna umeongezeka kutoka asilimia 10 mnamo Mei hadi asilimia 15 Julai, kabla ya kufikia asilimia 31 katika utafiti uliotangazwa jana uliofanywa kati ya Oktoba 6 na Novemba 11.

Kwa upande wake, Rais Ruto pia amepiga hatua, akipanda kutoka asilimia 24 mnamo Mei na Julai hadi asilimia 31.Umaarufu wake umeongezeka kutoka asilimia 18 aliyokuwa nayo Agosti mwaka jana.“Katika hali hii, Rais Ruto na Bw Sifuna wameimarisha umaarufu wao, jambo linaloonyesha kuwa kutakuwa na ushindani mkali kuelekea 2027,” akasema Wolf.

Kimaeneo, Bw Sifuna anaungwa mkono zaidi katika eneo la Magharibi kwa asilimia 55, Nairobi (asilimia 39), Pwani (asilimia 36) na Nyanza kwa asilimia 31.Kinaya ni kwamba Bw Sifuna anaungwa mkono na asilimia 32 katika eneo la Mlima Kenya, akimzidi Bw Gachagua ambaye ana asilimia 11 licha ya kutajwa kuwa na ushawishi mkubwa kisiasa katika eneo hilo.Bw Sifuna pia amepenya katika eneo la Bonde la Ufa Kusini, ambalo kwa kawaida huchukuliwa kuwa ngome ya Rais Ruto.

Anaungwa mkono kwa asilimia 31 dhidi ya asilimia 29 za Rais. Maeneo ambayo anaungwa mkono kwa kiwango cha chini zaidi ni Ukambani kwa asilimia nane na Kaskazini mwa Kenya kwa asilimia 20.Rais Ruto anaongoza Kaskazini Mashariki kwa asilimia 62 na Bonde la Ufa ya Kati kwa asilimia 59. Pia anaungwa mkono na asilimia 40 ya wakaza Pwani, na asilimia 35 Nyanza, ingawa umaarufu wake Mlima Kenya umeshuka hadi asilimia 11.

Utafiti huo pia umeonyesha mgawanyiko mkubwa wa kisiasa miongoni mwa wafuasi wa vyama mbalimbali. Miongoni mwa wafuasi wa ODM, asilimia 42 wanamuunga mkono Rais Ruto huku asilimia 33 wakimuunga mkono Bw Sifuna.Katika UDA, asilimia 85 ya wafuasi wanamuunga Rais Ruto ikilinganishwa na asilimia saba wanaomuunga Bw Sifuna.

Hata hivyo, asilimia 90 ya wafuasi wa Linda Mwananchi wanamuunga mkono Sifuna kuwania urais, huku asilimia mbili pekee wakimuunga mkono Ruto.Bw Sifuna pia anaungwa na asilimia 35 ya wafuasi wa DCP, akimzidi Bw Gachagua ambaye ana asilimia 25. Kwa upande mwingine, asilimia 80 ya wafuasi wa Wiper wanamtaka Kalonzo kuwa rais ikilinganishwa na asilimia nane wanaomuunga Bw Sifuna.

Katika Jubilee, asilimia 57 ya wafuasi wanamuunga mkono Dkt Matiang’i huku Ruto akipata asilimia 14.
 
 Kuhusu mgombea mwenza anayependekezwa, Naibu Rais Profesa Kithure Kindiki anaongoza kwa asilimia 50, akifuatiwa na Gavana wa Homa Bay Gladys Wanga kwa asilimia 12 na Waziri wa Madini Hassan Joho kwa asilimia tisa. Waziri wa Vyama vya Ushirika Wycliffe Oparanya anapata asilimia mbili.

Matokeo hayo yanatolewa wakati ODM ikiendelea na mazungumzo na chama tawala cha UDA kuhusu uwezekano wa kushirikiana kisiasa. ODM imekuwa ikidai nafasi ya naibu rais pamoja na mgao sawa wa nyadhifa serikalini.
 
 Utafiti huo pia unaonyesha kuwa UDA ni chama maarufu zaidi nchini kwa asilimia 25, kikifuatiwa na Linda Mwananchi kwa asilimia 17.

ODM imeshuka hadi nafasi ya tatu kwa asilimia 10, huku DCP, Wiper na Jubilee zikipata asilimia tisa, tano na nne mtawalia.
 
 Bw Wolf alihusisha kushuka kwa umaarufu wa ODM na kuondoka kwa Bw Sifuna, akisema sehemu kubwa ya wafuasi wa chama hicho wamehamia Linda Mwananchi.
 
 Linda Mwananchi inaongoza Magharibi kwa asilimia 40, huku ODM ikiwa na asilimia 10 dhidi ya UDA yenye asilimia 22.

UDA inaongoza Kati mwa Bonde la Ufa na Kaskazini mwa Kenya kwa asilimia 56 na 60 mtawalia nayo ODM inaendelea kuwa na ngome yake kuu Nyanza kwa asilimia 33.

Kuhusu umoja wa upinzani, asilimia 45 ya waliohojiwa wanataka muungano huo kumteua mgombea wake wa urais ifikapo Machi mwaka ujao, huku asilimia 35 wakitaka uamuzi huo ufanywe kabla ya mwisho wa mwaka huu.
 
 Licha ya tofauti hizo kuhusu muda wa kufanya uamuzi, asilimia 57 wanaamini kuwa upinzani utaafikiana na kuwasilisha mgombea mmoja wa urais katika uchaguzi wa 2027.

Ni asilimia saba pekee wanaoamini kuwa muungano huo hautafanikiwa kuungana.