Rais William Ruto ameanza kuimarisha ushirikiano wa kisiasa kati ya UDA na ODM Nairobi, baada ya kukutana na viongozi wa mashinani na wanasiasa wapatao 1,500 kutoka vyama hivyo katika Ikulu ya Nairobi.

Mkutano huo uliwaleta pamoja viongozi waliochaguliwa na wagombeaji wanaotaka kuwania nyadhifa mbalimbali katika uchaguzi mkuu wa 2027.

Lengo kuu lilikuwa kuunganisha mifumo ya vyama hivyo, kuratibu kampeni na kuweka mikakati ya kuhakikisha vyama vinapata ushindi katika Kaunti ya Nairobi.

Ruto aliandamana na mwenyekiti wa kitaifa wa ODM Gladys Wanga, Kiongozi wa Wachache katika Bunge la Kitaifa Junet Mohamed na viongozi wengine wa vyama hivyo.

Rais aliwataka viongozi hao kuunganisha nguvu zao na kuimarisha uhamasishaji kuanzia mashinani hadi vituo vya kupigia kura ili kuhakikisha ushirikiano huo unazaa matunda katika uchaguzi ujao.

Mkutano huo ulifanyika huku vyama hivyo vikijaribu kugeuza ushirikiano wao katika serikali jumuishi kuwa nguvu ya kisiasa katika jiji mkuu, ambako kuna wapigakura 2,743,155.

Mabadiliko ya hivi majuzi ya kisiasa yamefanya hesabu za uchaguzi Nairobi kuwa tata zaidi. Gavana Johnson Sakaja alihama UDA na kujiunga na ODM, huku Mbunge wa Kasarani Ronald Karauri akijiunga na chama tawala.

UDA ilisema ina matumaini kuwa ushirikiano huo utawezesha kupata ushindi mkubwa Nairobi mwaka 2027. Chama hicho pia kilihusisha ushirikiano huo na mpango wa Sh80 bilioni wa kuboresha jiji pamoja na miradi ya maendeleo ya serikali, ikiwemo ukarabati wa Mto Nairobi, ujenzi wa Soko Jipya la Gikomba na mpango wa maendeleo ya jamii wa Kamukunji.

Hata hivyo, mkutano huo pia ulifichua ushindani kuhusu nani atakayewania ugavana wa Nairobi kwa tiketi ya vyama hivyo.

Sakaja na Mbunge wa Makadara George Aladwa walitambulishwa kama wagombeaji wanaoweza kuwania kiti hicho kupitia ODM. Kwa upande mwingine, Karauri alitambulishwa kama mgombeaji wa UDA.

Hali hiyo inaibua swali kuhusu iwapo vyama hivyo vitawasilisha wagombeaji tofauti au vitakubaliana kumuunga mkono mtu mmoja.

Wanga alisema mkutano huo ulikuwa wa kuoanisha mifumo ya vyama na kupanga namna ya kushinda Nairobi, wala si kugawana nyadhifa.

Alisema suala la kugawa maeneo ya kisiasa kwa vyama, litajadiliwa baadaye.

“Tulikuwa tunaoanisha mikakati ya namna ya kushinda Nairobi. Mazungumzo kuhusu kugawana maeneo yatakuja baadaye. Kwa sasa tunajipanga kufanya kazi pamoja, na hakuna kiti tutakachoacha,” alisema Wanga.

Hata hivyo, ushindani wa ugavana unaweza kuwa kikwazo kikubwa katika mazungumzo hayo.

Katika uchaguzi wa 2022, ODM ilishinda kiti cha useneta kupitia Edwin Sifuna na uwakilishi wa wanawake kupitia Esther Passaris, huku UDA ikipata ugavana kupitia Sakaja.

Iwapo UDA itasisitiza kubaki na kiti cha ugavana kwa kuwa ilikishinda katika uchaguzi uliopita, Sakaja anaweza kujikuta katika hali ngumu baada ya kuhamia ODM.