MJANE wa aliyekuwa waziri mkuu marehemu Raila Odinga, Ida Odinga, ameweka wazi msimamo wake wa kisiasa baada ya wiki kadhaa za minong’ono kuhusu mwelekeo wa familia yake kutokana na kifo cha mumewe.

Ida amesema bado yuko katika chama cha ODM na anaunga mkono Serikali Jumuishi inayoongozwa na Rais William Ruto, akisisitiza kuwa huo ndio msimamo ambao Raila alimwachia kabla ya kufariki.

Akizungumza Jumanne, Novemba 10, katika uzinduzi wa mpango wa usimamizi wa eneo la Gembe Hills, eneobunge la Suba Kaskazini, Ida alisema hana nia ya kuachana na misingi ya kisiasa ya mumewe.

“Aliponiacha, hapo ndipo nilipo. Aliniacha katika ODM na Serikali Jumuishi na bado nimesimama hapo,” alisema.

Aliongeza kuwa Raila alimweleza kuwa Dkt Ruto ndiye kiongozi wa nchi na kwamba huo ndio msimamo ambao alipaswa kuendeleza.

Kauli hii inajiri wiki kadhaa baada ya familia ya Odinga kukosolewa kwa kuwaalika viongozi wa mirengo tofauti ya kisiasa kwenye hafla ya Oktoba 15 katika uwanja wa Migwena, Bondo, kuadhimisha mwaka mmoja tangu kifo cha Raila.

Miongoni mwa walioalikwa alikuwa aliyekuwa Naibu Rais Rigathi Gachagua, ambaye alikuwa mkosoaji mkubwa wa Raila.

Ingawa hakuhudhuria, viongozi wengine wa upinzani, akiwemo Kalonzo Musyoka, Edwin Sifuna, Martha Karua na Jimi Wanjigi, walihudhuria.

Hatua hiyo iliwakera baadhi ya viongozi wa ODM.

Kiongozi wa Wachache katika Bunge la Kitaifa, Junet Mohamed, alisema alikosa hafla hiyo baada ya kuona jina la Bw Gachagua kwenye orodha ya wageni.

Mvutano huo ulifichua mgawanyiko ndani ya ODM kati ya wanaounga mkono ushirikiano na serikali ya Dkt Ruto na wanaotaka chama kijitambulishe wazi kama upinzani.

Mnamo Oktoba 17, Ida alitetea mwaliko huo, akisema Raila alikuwa na marafiki kutoka pande zote za kisiasa na kwamba kuwaalika hakukumaanisha kuunga mkono misimamo yao.

Mchambuzi wa siasa Geoffrey Mboya anasema kauli ya Ida ina uzito kwa sababu sasa ametumia msimamo wa mwisho wa mumewe kueleza msimamo wake mwenyewe.

Kwa mujibu wake, mwaliko wa viongozi wa upinzani haupaswi kuchukuliwa kuwa familia ya Odinga imehama kutoka kwa Serikali Jumuishi.

Tangu kifo cha Raila, kaka yake Oburu Oginga amekuwa akitetea ushirikiano na Dkt Ruto.

Hata hivyo, viongozi kama Sifuna, Gavana wa Siaya James Orengo na Mbunge Babu Owino wamepinga mwelekeo huo, baadhi yao wakijiunga na vuguvugu la Linda Mwananchi.

Hata hivyo, wakili Chris Omore anasema kauli ya Ida haimaanishi kuwa ameunga mkono kila hatua ya serikali wala kutangaza kuwa atampigia debe Dkt Ruto katika uchaguzi wa 2027.

Anasema ni ithibati tu ya msimamo wake wa kuendelea kuwa katika ODM na kuunga mkono Serikali Jumuishi.

Kauli hiyo sasa inampa nguvu zaidi Oburu na washirika wake wanaotaka ODM iendelee kushirikiana na serikali.