Sifuna ajiandaa kuzindua chama cha Ukombozi People’s Party (UPP)
MIPANGO ya kuzindua Ukombozi People’s Party (UPP), chama kinachotarajiwa kutumiwa na Seneta wa Nairobi Edwin Sifuna katika azma yake ya kuwania urais mwakani, imeanza kushika kasi huku uzinduzi ukitarajiwa kufanyika mapema Oktoba.
Gavana wa Trans Nzoia, George Natembeya na Seneta wa Vihiga, Godfrey Osotsi walisema wikendi kuwa chama hicho kitazinduliwa katika kipindi cha wiki mbili zijazo, huku Oktoba 3 ikitajwa kuwa tarehe inayopendekezwa kwa uzinduzi huo.
Hata hivyo, viongozi hao walikataa kutoa maelezo kuhusu mahali ambapo hafla hiyo itafanyika na maafisa watakaoshikilia nyadhifa katika chama hicho kipya.
Bw Osotsi aliishutumu serikali kwa kuzuia juhudi za vuguvugu la Linda Mwananchi kusajili jina la kisiasa lililopendekezwa, akisema changamoto hizo hazijawazuia viongozi wake kutafuta chama mbadala.
“Mmekuwa mkiuliza chama chetu ni kipi. Wamejaribu kuchukua jina la chama chetu na kuwaweka watu wao, lakini kesi hiyo itaamuliwa Septemba 30. Tulijaribu kupata chama lakini wakaweka vikwazo,” akasema Bw Osotsi.
“Hata hivyo, sisi ni wajanja na tumepata chama. Ndani ya wiki mbili tutatangaza chama ambacho Edwin Sifuna atatumia kuwania urais,” akaongeza akiwa Vihiga.
Mahakama ya Migogoro ya Vyama vya Kisiasa inatarajiwa kutoa uamuzi Septemba 30 kuhusu mzozo unaohusu jina la Linda Mwananchi.
Bw Natembeya pia aliwaambia wafuasi wa Bw Sifuna kuwa muda wa kusubiri chombo cha kisiasa unaelekea ukingoni.
“Katika wiki tatu zijazo, tarajieni moshi mweupe na hakuna mtu atakayetuchezea tena,” akasema.
Uzinduzi huo unatarajiwa kuwakutanisha viongozi wa upinzani huku vuguvugu hilo likijaribu kujenga jukwaa imara kisiasa kuelekea Uchaguzi Mkuu wa 2027.
Viongozi kadhaa waliozungumza na Taifa Leo walikataa kutoa maelezo kuhusu hafla hiyo na badala yake wakamtaka mwandishi awasiliane na Bw Sifuna.
“Sina maelezo kuhusu mahali hafla hiyo itafanyika, lakini kuna bajeti na mambo mengine yanayohusika. Wasiliana na Sifuna mwenyewe,” akasema Mbunge wa Kabuchai Majimbo Kalasinga.
Duru ndani ya kambi ya upinzani zilisema waandalizi wanapanga kuwaalika wageni mashuhuri, wakiwemo baadhi kutoka nje ya Kenya.
Mipango ya uzinduzi huo inafanyika wakati kukiwa na tofauti ndani ya Linda Mwananchi kuhusu chama cha kisiasa kitakachotumika katika uchaguzi wa 2027.
Bw Natembeya ameunga mkono Ukombozi kutumiwa na Bw Sifuna, huku Mbunge wa Embakasi Mashariki Babu Owino akisisitiza atatumia chama chake cha Mwananchi Party na kupendekeza muungano wa vyama hivyo.
Akizungumza katika mazishi yaliyofanyika Nyakach, Kaunti ya Kisumu, Ijumaa, Bw Owino alisema ataendelea kuunga mkono azma ya Bw Sifuna ya kuwania urais licha ya tofauti hizo.
“Tutamsimamisha Sifuna kuwa mgombea wa urais na kuunda muungano, huku Sifuna akiwa kiongozi wa Chama cha Ukombozi na Babu akiwa kiongozi wa Chama cha Mwananchi,” akasema.
Hata hivyo, Mbunge wa Saboti Caleb Amisi ameonya kuwa Linda Mwananchi huenda ikasambaratika kabla ya uchaguzi wa 2027 iwapo viongozi wake hawatamaliza tofauti zao. Bw Amisi, ambaye ameondoka katika vuguvugu hilo, aliwashutumu baadhi ya viongozi kwa kufuata maslahi yao binafsi na kudhoofisha azma ya Bw Sifuna ya kujijenga kitaifa.
“Babu Owino ana mapungufu yake kama binadamu, lakini bado ni kiongozi. Na kwa kuwa tunamhitaji Sifuna ashinde, lazima umpe nafasi kwa njia bora iwezekanavyo,” alisema akizungumzia tofauti kati ya Bw Owino na Bw Sifuna kuhusu chama cha kutumika katika uchaguzi wa mwaka ujao.
Bw Amisi pia alijitolea kutoa chama chake cha People’s Renaissance Movement (PRM) kiwe chombo mbadala cha Seneta Sifuna, akisema yuko tayari kurejea Linda Mwananchi iwapo waanzilishi wa awali wa vuguvugu hilo watakutana na kutatua tofauti zao.
“Ninaweza kurejea Linda Mwananchi, lakini kwanza tukutane kama waanzilishi wa awali na tutafute tulikosea wapi. Sifuna bado ni kiongozi wetu na chama kiko tayari. Suala la kutafuta chama halipaswi kuwepo kwa sababu chama hiki kilianzishwa hata kabla ya Linda Mwananchi,” akasema.