Mwalimu anayekuza vipaji kwa kalamu na sanaa
MWALIMU bora anapaswa kuwa na maarifa mapana yanayozidi yale ya wanafunzi wake, huku akiwa na ari ya kujifunza mambo mapya kila wakati.
Anapobaini kuwa wanafunzi wake wana ufahamu mkubwa kuliko yeye katika baadhi ya maeneo, anapaswa kujituma zaidi katika utafiti ili kupanua maarifa yake na kukidhi mahitaji ya darasa analoliongoza.
Kwa mtazamo wa Bw Mwangi wa Githinji, wanafunzi humwamini zaidi mwalimu mwenye ufahamu mpana wa somo analofundisha na anayefuatilia kwa karibu masuala yote yanayohusiana na mtaala.
“Sawa na dereva wa gari anayewajibika kuwafikisha abiria wao salama mwisho wa safari, mwalimu naye ana jukumu la kuwaongoza wanafunzi kwa nidhamu na utaalamu hadi watimize ndoto zao za kielimu,” anasema.
Mwangi alilelewa katika kijiji cha Karima, Othaya, Kaunti ya Nyeri. Ni mtoto wa pili katika familia ya watoto wanne ya Bw Bassilius Githinji na Bi Mary Wambui.
Alianza safari yake ya elimu katika Shule ya Msingi ya Karima (1995–2005), kabla ya kujiunga na Shule ya Upili ya Giakanja Boys, Nyeri (2006–2009).
Baadaye alijiunga na Chuo cha Mafunzo ya Walimu cha Tambach, Kaunti ya Elgeyo-Marakwet, ambako alisomea ualimu kati ya 2010 na 2012.
Mbali na Bw Maina Wanyiri, aliyempa msingi imara wa elimu katika shule ya msingi, Bi Wanjau, aliyemfundisha Kiswahili katika shule ya upili, alikuwa miongoni mwa watu waliomchochea kuchagua taaluma ya ualimu.
Mnamo 2012, alifanya mafunzo ya ualimu kwa vitendo katika Shule ya Msingi ya Sing’ore, Kaunti ya Elgeyo-Marakwet.
Baadaye alipata ajira katika Shule ya Msingi ya Taramia Kanini York Academy, Kiharu, Murang’a (2013–2014).
Alifuatia kwa kufundisha Gaicangere, Kiharu (2015–2016), kabla ya kuhamia Shule ya Msingi ya Limuru Township, Kaunti ya Kiambu, ambako alihudumu kuanzia 2017 hadi 2022.
Tume ya Huduma kwa Walimu (TSC) ilimwajiri Aprili 2022 na kumpeleka katika Shule ya Msingi ya Gathiriga, Kipipiri, Kaunti ya Nyandarua. Februari 2023, alihamia Shule ya Msingi ya Kagumo, Othaya, ambako aliteuliwa kuwa kocha wa timu ya handiboli na msimamizi wa masuala ya muziki.
Hata hivyo, Mwangi si mwalimu wa kawaida. Mbali na kufundisha, ni mshairi, mwandishi na mlumbi mahiri.
Kipawa chake cha uandishi kilianza kujitokeza alipokuwa mwanafunzi wa shule ya upili, ambapo alitunga insha nyingi zilizomletea tuzo na kumfanya ajipatie umaarufu miongoni mwa walimu na wanafunzi wenzake.
Vilevile, kipawa chake cha ulumbi kilimfanya kuwa tegemeo katika makundi yaliyokuwa yakitumbuiza wazazi na wageni wakati wa hafla na mikutano muhimu shuleni.
Hadi sasa, ametunga mashairi mengi ambayo yamefanya vyema katika kategoria mbalimbali za Tamasha za Muziki za Kenya (KMF), yakijizolea sifa katika viwango na ngazi tofauti za mashindano ya sanaa.
Katika uwanja wa fasihi, anajivunia kuchapishwa kwa Hadithi Fupi Machozi ya Samaki katika diwani ya Gari la Dampo na Hadithi Nyingine.
Pia ametunga hadithi Kasisi Alberto na Vivuli Viwili, zilizochapishwa katika antholojia za Kalamu Imeisha Wino na Hadithi Nyingine na Mwamba wa Dhahabu na Hadithi Nyingine, mtawalia.
Miongoni mwa malengo yake makuu ni kujiendeleza kitaaluma na kujijengea jina kama mmoja wa waandishi mashuhuri wa vitabu vya Kiswahili.
Anapokuwa nje ya darasa, hutumia ujuzi wake wa ualimu kuwaelekeza vijana kimaadili na kuwahimiza kukuza vipaji vyao katika fani mbalimbali, hususan zile zinazohusiana na masomo ya lugha.
Kwa mujibu wake, mwalimu bora anapaswa kuelewa saikolojia ya wanafunzi wake, kutambua na kukuza vipaji vyao, pamoja na kuwajengea ari ya kupenda masomo yote.
Anasisitiza kuwa ni muhimu kuwaaminisha wanafunzi kwamba hakuna jambo lisilowezekana iwapo wataweka bidii na kujituma.
Katika maisha yake ya familia, Mwangi ameoa Bi Charity Nyambura na wamejaliwa mtoto mmoja, Bianca Njeri.