KIONGOZI wa Linda Mwananchi, Seneta Edwin Sifuna anatarajiwa kuanza ziara ya wiki mbili nchini Amerika ili kuwavutia wapigakura ughaibuni na kuchangisha fedha za kugharimia azma yake ya urais.

Seneta huyo wa Nairobi pamoja na wandani wake wanatarajiwa kuanza ziara hiyo Novemba 20, ambapo watakutana na Wakenya wanaoishi katika miji mbalimbali ya Amerika.

Miongoni mwa viongozi wakuu wa chama hicho wanaotarajiwa kuandamana naye ni mwenyekiti na Senata wa Vihiga Godfrey Osotsi, Mwekahazina Richard Onyonka na naibu kiongozi wa chama Faith Odhiambo.

Mkuu wa mawasiliano wa Linda Mwananchi Pauline Njoroge aliiambia Taifa Leo kuwa chama hicho kilikuwa kikikamilisha ratiba ya ziara kabla ya kuitangaza rasmi kwa umma.

“Kuna mambo mengi yanayohusika na tukikamilisha maandalizi, tutatangaza ratiba kamili pamoja na maelezo yote,” akasema.

Hata hivyo, ratiba iliyochapishwa katika mtandao wa chama hicho inaonyesha kuwa Bw Sifuna atazuru AllenTown kuanzia Novemba 20 hadi 22.

Kisha atasafiri hadi sehemu ya jiji kuu Washington (DMV) kati ya Novemba 23 na 24, Dallas mnamo Novemba 27 na 28, Houston mnamo Novemba 29 na 30, kabla ya kuhitimisha ziara yake kwa kutembelea Seattle na California kati ya Desemba 1 na 4.

Ziara hiyo inajiri miezi kadhaa baada ya Kiongozi wa DCP Rigathi Gachagua kuzuru miji kadhaa Amerika kati ya Agosti 26 na Oktoba 20 katika juhudi za kuwafikia Wakenya wanaoishi ughaibuni.

Ratiba ya Bw Gachagua ilijumuisha Oregon, Kansas, Dallas, Boston, Massachusetts na Spokane katika jimbo la Washington.

Seneta wa Kakamega, Dkt Boni Khalwale alisema ziara hiyo itampa Bw Sifuna fursa ya kukutana na Wakenya wanaoishi ughaibuni, kuwaeleza ajenda yake ya kisiasa na kutangaza azma yake uongozi wa nchi.

“Ziara hii ni nzuri kwani itamsaidia kiongozi wetu wa chama kuungana na Wakenya wanaoishi ughaibuni, kuwaeleza mipango yake kwa taifa na pia kutangaza azma yake ya kuwania urais. Kumbuka Amerika ni miongoni mwa nchi zenye idadi kubwa ya Wakenya, hivyo hii ni fursa ya kuwafikia na kuwaeleza mipango yake kwa Kenya,” akasema Dkt Khalwale.

Seneta huyo, ambaye ni mmoja wa washirika wa karibu wa kisiasa wa Bw Sifuna, alisema kiongozi huyo wa Linda Mwananchi anazidi kupata umaarufu miongoni mwa vijana kutoka mirengo mbalimbali ya kisiasa.

Aliongeza kuwa kukutana na Wakenya na wanaoishi ughaibuni kutawapa fursa ya kueleza changamoto zao na kutoa mapendekezo kuhusu uongozi na maendeleo ya nchi.

“Kama kiongozi, ni lazima usikilize wananchi na kutekeleza matakwa yao. Hii itakuwa kampeni ambayo Wakenya wanaoishi ughaibuni watapata jukwaa la kueleza masuala yanayowakabili,” akasema.

Dkt Khalwale, ambaye ni mbunge wa zamani wa Ikolomani, alifananisha azma ya Bw Sifuna ya kuwania urais na ile ya aliyekuwa Rais wa Amerika Barack Obama, miaka ya 47.

Bw Sifuna atakuwa na umri wa miaka 45 iwapo atachaguliwa kuwa Rais katika uchaguzi mkuu wa 2027.

“Wale ambao wamekuwa wakimwambia Sifuna asubiri kwa sababu bado ni kijana wanapaswa kujua kuwa Obama pia alichukua uongozi wa Amerika akiwa miaka ya 40. Jambo muhimu ni kile unachowafanyia Wakenya na namna unavyoboresha maisha yao,” akasema.

Akiwa Amerika Bw Gachagua alikiri kuongezeka kwa ushawishi wa kisiasa wa Bw Sifuna, baada ya kutangaza kuwa yuko tayari kumuunga mkono iwapo atabainika kuwa mgombea anayefaa zaidi kumshinda Rais William Ruto katika uchaguzi wa 2027.

“Hakuna tatizo kwa sababu hata Riggy G anaweza kuwa naibu wa Sifuna. Kuna ubaya gani?” akauliza alipokuwa akiwahutubia Wakenya mjini Spokane, katika jimbo la Washington.

“Ikiwa tutafanya hesabu na kubaini kuwa mtu anayefaa zaidi kumwondoa Rais Ruto mamlakani mapema ni Edwin Sifuna, basi iwe hivyo. Tutaunda timu ya uongozi ambayo mtaipenda. Tutaunganisha nguvu za vijana na uzoefu,” akaongeza Bw Gachagua.

Hata hivyo, mchanganuzi wa masuala ya kisiasa Javas Bigambo alisema kufanya kampeni Amerika hakumaanishi kuwa wagombea urais watarejea na kiasi kikubwa cha fedha.

Alisema huenda baadhi ya watu wachache matajiri wakachangia fedha nyingi, hasa iwapo wagombea wana marafiki na mitandao ya watu wenye ushawishi nchini humo, kama alivyokuwa nao aliyekuwa Waziri Mkuu Raila Odinga.

“Kuna wale wanaoalikwa na makundi ya kisiasa pamoja na Wakenya wanaoishi ughaibuni. Mtu mmoja au wawili wanaweza kuwaunganisha na watu wenye uwezo wa kuchangia fedha. Mara nyingi huwa hawakutani na wafadhili wakuu wa vyama vya Republican na Democrat kwa sababu hawana maslahi makubwa katika siasa za Kenya,” akasema, Bigambo.

Kwa mujibu wa sajili ya wapiga kura ya Tume ya Uchaguzi (IEBC) ya mwaka 2022, Kenya ilikuwa na wapigakura 2,959 waliosajiliwa ughaibuni, ambapo 590 walikuwa Wakenya wanaoishi Amerika.