Sifuna na Babu walaumiana kuhusu usaliti
MVUTANO kati ya Seneta wa Nairobi Edwin Sifuna na Mbunge wa Embakasi Mashariki Babu Owino umechukua mkondo mpya baada ya wawili hao kuanza kurushiana lawama kuhusu nani alisaliti makubaliano yao ndani Linda Mwananchi.
Tofauti zao sasa zinaibua maswali kuhusu uongozi, uwaniaji wa urais na ugavana wa Nairobi, huku uchaguzi mkuu wa 2027 ukikaribia.
Bw Sifuna alivunja kimya chake mnamo Alhamisi alipomjibu Bw Owino, ambaye amemshutumu kwa kuvunja makubaliano yaliyopangwa awali kuhusu nafasi zao ndani ya Linda Mwananchi ambacho sasa ni chama cha kisiasa.
Mbunge huyo, ambaye ametangaza nia ya kuwania ugavana wa Nairobi, anadai kwamba wawili hao walikuwa wamekubaliana Bw Sifuna awe mgombeaji urais huku yeye akiongoza chama.
Hata hivyo, anasema mpango huo ulibadilishwa bila kushirikishwa wala kupewa maelezo. Akizungumza katika kipindi cha Jambo Kenya cha Radio Citizen, Bw Sifuna alisema alishangazwa na pendekezo la Bw Owino kwamba awe kiongozi wa chama huku yeye akichukua nafasi ya mgombeaji urais.
Alisema haelewi jinsi mbunge huyo anavyoweza kumwamini kuongoza nchi lakini akawa na dukuduku kuhusu uwezo wake wa kuongoza chama.
Kwa mujibu wa Bw Sifuna, makubaliano ya awali yaliwataka waache vyama vyao binafsi na kujiunga na chama kimoja ambacho kingewapa jukwaa la kutimiza malengo yao ya kisiasa.
Alisema baada ya kuchunguza vyama vilivyokuwepo, walichagua The Equitable Party (TEP), ambayo baadaye ilibadilishwa jina na kuwa Linda Mwananchi Movement.
“Makubaliano yalikuwa kwamba tuchague chama kimoja na sote tujiunge nacho,” akasema Bw Sifuna.
Alitaja Mbunge wa Suba Kusini Caroli Omondi, aliyekuwa Gavana wa Meru Kawira Mwangaza na Mbunge wa Mavoko Patrick Makau miongoni mwa viongozi walioacha vyama vyao na kujiunga na chama hicho.
Makau alichaguliwa kupitia chama cha Wiper Patriotic Front cha Kalonzo Musyoka, Omondi kupitia ODM huku Mwangaza akitoka Umoja na Maendeleo Party (UMP).
Bw Sifuna alisema baada ya kukubaliana kuunganisha maslahi yao ya kisiasa, viongozi hao walifanya mkutano kujadili muundo wa uongozi wa chama na hatimaye kumchagua kuwa kiongozi wa chama na mgombeaji urais.
Alisisitiza kuwa uamuzi huo ulifikiwa kwa pamoja na haukuwa mpango wake binafsi wa kujipatia mamlaka.
Alitumia hoja hiyo kupinga madai ya Bw Owino kwamba alisaliti makubaliano ya awali, akishangaa kwa nini wanasiasa wengine walikuwa tayari kuacha vyama vyao na kujiunga na chama hicho chini ya uongozi wake.
“Katika vyama vyote vilivyoko nchini, nitajie chama kimoja ambacho mgombeaji urais si kiongozi wake,” akauliza.
“Mlipokuwa mkibishana kuhusu nani awe kiongozi wa chama, niliwauliza, mnawezaje kuniamini niwe rais wa nchi lakini msiniamini kuwa kiongozi wa chama? Sasa msaliti ni nani?”
Hata hivyo, Bw Owino alikuwa ametoa maelezo tofauti kuhusu makubaliano hayo Novemba 13, akisema mpango wa awali ulikuwa Seneta huyo awanie urais na yeye kuongoza chama.
Alidai kuwa mambo yalibadilika baadaye bila yeye kufahamishwa.
“Awali tulikuwa tumekubaliana na Sifuna pamoja na wanachama wengine kwamba tukishapata chama, Sifuna angekuwa mgombeaji urais na mimi ningekuwa kiongozi wa chama, lakini mambo yalibadilika. Hata mimi sijui yalibadilika vipi,” akasema Bw Owino.
Alisema baadhi ya washirika wao walikuwa wakishikilia kuwa mgombeaji urais anapaswa pia kuwa kiongozi wa chama, lakini yeye aliamini kila mmoja wao alihitaji nafasi ya kukua kisiasa.
“Baadhi yao walisema mgombeaji urais hawezi kukosa kuwa kiongozi wa chama. Lakini tulisema sote wawili tulihitaji kukua kisiasa,” akasema.
Tofauti kati ya wawili hao zilianza kujitokeza wazi Septemba, Bw Owino alipotangaza angepunguza kuhudhuria mikutano ya Linda Mwananchi akisema anahitaji kumakinikia ugavana.
Ingawa amekuwa akipuuza madai kwamba kuna ushindani kati yake na Bw Sifuna kwa kuwa wanawania nyadhifa tofauti, mvutano wao unaashiria kutoaminiana na maslahi yanayokinzana.
Bw Sifuna anapanga kuwania urais huku Babu akilenga ugavana wa Nairobi.
Hata hivyo, katika mazungumzo mapana ya kugawana nafasi za kisiasa ndani ya upinzani, azma ya Bw Sifuna ya urais inaweza kuathiri mikakati ya Babu ya ugavana.
Wachanganuzi wa siasa wanaamini kuwa iwapo Bw Sifuna atapata uungwaji mkono wa vinara wa upinzani, kiti cha ugavana wa Nairobi kinaweza kuwa sehemu ya mazungumzo ya kugawana mamlaka na nafasi za kisiasa.
Mgogoro huo unaonyesha mgawanyiko kambi ya Bw Sifuna, baadhi ya viongozi wakiondoka na kukumbatia vyama vipya.
Gavana wa Siaya James Orengo amejiunga na LDP baada ya kujitenga na mrengo wa seneta huyo.
Kuondoka kwake kulifuatia upinzani kutoka kwa baadhi ya wandani wa Bw Sifuna kuhusu azma yake ya kuwania tiketi ya urais.
Mbunge wa Saboti Caleb Amisi naye ameondoka katika kambi hiyo na kuanzisha chama chake cha People’s Renaissance Party (PRP).
Bw Amisi alidai kuwa alikuwa na taarifa kuhusu yanayoendelea ndani ya Linda Mwananchi ambazo zingeweza hata kuvunja familia, akiwashutumu Gavana wa Trans Nzoia George Natembeya na wanasiasa wanaomzunguka Sifuna kwa kumpotosha.