MWANAMUME mmoja anakabiliwa na kifungo cha hadi miaka 10 jela au kutozwa faini ya Sh5 milioni kwa kuiga Rais William Ruto kwa kutumia picha yake kama kitambulisho na neno “I Must Go” kwenye akaunti yake ya X.

Kwa mujibu wa stakabadhi za mahakama zilizowasilishwa na Idara ya Upelelezi wa Jinai (DCI), Titus Wekesa Sifuna alibadilisha jina la akaunti hiyo kutoka kwa jina lake la awali na akaanza kuchapisha jumbe za chuki dhidi ya Rais Ruto.

Stakabadhi hizo zinaonyesha kuwa serikali inakusudia kumshtaki Bw Sifuna kwa kuchapisha taarifa za uongo chini ya Kifungu cha 23 cha Sheria ya Matumizi Mabaya ya Kompyuta na Uhalifu wa Kidijitali ya mwaka 2018.

Sheria hii inasema “mtu yeyote ambaye anatoa taarifa za uongo kwa makusudi kwa njia ya uchapishaji, utangazaji, data, au mfumo wa kompyuta, na ambazo zitahatarisha au kuleta hofu, machafuko, au ghasia miongoni mwa raia, au ambazo zinaweza kudhalilisha sifa ya mtu mwingine, anafanya kosa na atakabiliwa na adhabu ya faini isiyozidi Sh5 milioni  au kifungo kisichozidi miaka 10, au vyote viwili.”

Afisa anayechunguza kesi hiyo, Peter Mwangi, alisema kuwa suala hili liliripotiwa kwa DCI kupitia taarifa za kijasusi. Mwangi alisema kwamba akaunti ya mtumiaji aliyejulikana kama “Thief 5th” na jina la mtumiaji “I Must Go” ilikuwa inachapisha jumbe na picha za kudhihaki na kudhalilisha Rais na familia yake, na zilizokuwa zikileta maoni hasi na hatari kwa amani ya taifa.

Bw Sifuna alifikishwa mbele ya Hakimu Mkuu Mwandamizi Geoffrey Onsaringo katika Mahakama ya Milimani, ambapo afisa anayechunguza kesi aliomba mahakama kumzuilia kwa siku saba kwenye kituo cha polisi cha Capital Hill ili kumaliza uchunguzi.

Mahakama itatoa uamuzi kuhusu ombi hilo Jumatano.

Polisi walisema kwamba maudhui ya akaunti hiyo ya mtandaoni yana madhara makubwa kwa sifa ya taifa, kwani Urais ni ishara ya umoja wa kitaifa na anahitaji kuheshimiwa na kupewa heshima na kila mmoja.

Walieleza kwamba picha na jumbe zilizokuwa zikitumika kwenye akaunti hiyo ni za chuki, ambazo zinaweza kusababisha migawanyiko ya kikabila miongoni mwa raia.

Bw Sifuna pia alitumia akaunti hiyo kuomba biashara kama vile kutengeneza nembo za biashara, akitumia nambari ya simu aliyoiweka kwenye akaunti hiyo.

Polisi walitumia nambari ya simu hiyo pamoja na taarifa kutoka Idara ya Usajili wa Raia, na kubaini kuwa nambari hiyo na namba ya kitambulisho ni za Bw Sifuna, jambo lililosababisha kukamatwa kwake tarehe Aprili 18 2025 huko Bungoma.

Katika kipindi atakachokuwa akizuiliwa, polisi walisema watachunguza simu za mkononi na laptopu za Bw Sifuna.

Aidha, wataomba taarifa rasmi kutoka kwa kampuni inayotoa huduma za akaunti za X kuhusu machapisho ya mtuhumiwa.

Polisi pia walisema watamsafirisha Bw Sifuna hadi Msambweni, Kaunti ya Kwale, ili kukusanya ushahidi zaidi.

Walieleza kuwa akaunti hiyo ilionyesha shughuli nyingi kutoka Msambweni, ambako mtuhumiwa anadai kuwa anafanya kazi kama mwalimu wa kujitolea.

Polisi waliongeza kuwa mtuhumiwa anaweza kutoroka kwa sababu sehemu kubwa ya maisha yake iko Kwale, ambapo anadai kuwa anaishi na kufanya kazi.