Watu watatu wa familia moja walifariki nyumba walimokuwa ilipoteketezwa na moto unaoshukiwa kuanzishwa makusudi.

Winnie Kinyua (50) na binti zake wawili, Grace Mwangi (13) na Ivy Mwangi (4), wote walifariki papo hapo katika mkasa huo wa saa moja usiku  mjini Ngurubani, Kaunti ya Kirinyaga.

Kiongozi wa familia, Julius Mwangi (62), alipata majeraha makubwa kichwani na sehemu nyingine za mwili na kwa sasa anaendelea kutibiwa katika Hospitali ya Mwea.

Huzuni ilijaa mtaa wa Maisha Kamili baada ya polisi kutoa miili iliyochomwa moto kutoka ndani ya nyumba hiyo. Wanakijiji walilia kwa huzuni walipokuwa wakiangalia miili hiyo ikichukuliwa na polisi.

Wakazi waliripoti kwamba walisikia kelele na kukimbilia eneo la tukio na kugundua nyumba ikiwa na moto mkubwa. Walifanikiwa kumuokoa Bw Mwangi, lakini wengine walichomwa moto hadi wasitambulike.

Samuel Ngochi, alieleza kwamba alisikia mzozo kati ya wanandoa kabla ya moto kuwaka.

“Nilienda huko nikakuta Bw Mwangi akitoka akiwa anaungua moto. Nilimsaidia kumwokoa pamoja na wengine kabla hajapelekwa hospitali. Baadaye nilisikia kuwa watu watatu walikufa katika moto huo,” alisema Bw Ngochi.