AFYA ya uke inategemea sana usafi wa mwili, homoni, na pia lishe bora.

Baadhi ya vyakula vinaweza kuboresha afya ya uke, huku vingine vikichangia maambukizi au kuathiri mfumo wa uzazi. Baadhi ya vyakula vinavyofaa afya ya uke ni pamoja na:

Yogurt (mtindi wenye bakteria wazuri kama Lactobacillus): Hii husaidia kudumisha pH ya uke kuwa ya asili na kupambana na maambukizi kama bacterial vaginosis (BV) na fangasi.

Matunda yenye vitamini C (machungwa, limau, matunda jamii ya beri): Matunda haya husaidia kuimarisha kinga ya mwili na pia hupambana na bakteria na kuzuia uvimbe.

Mboga za majani (sukuma, mchicha, spinachi): Vyakula hivi vina virutubisho kama vile madini ya magnesium, folate, na chuma. Hii husaidia kuimarisha mzunguko mzuri wa damu kwenye via vya uzazi.

Samaki wenye mafuta (kama samoni, sadini): Samaki hawa wana omega-3 inayosaidia kupunguza uvimbe. Pia, hii huimarisha afya ya uke na kusaidia katika kusawazisha viwango vya homoni.

Maji ya kutosha: Kunywa maji mengi husaidia kudumisha unyevu ukeni. Pia, maji husaidia kuondoa sumu mwilini kupitia mkojo na jasho.

Tende, parachichi na lozi: Matunda haya yana mafuta mazuri na vitamin E ambayo husaidia kuweka uke katika hali nzuri.

Vyakula vinavyodhoofisha afya ya uke

Sukari nyingi: Sukari hutoa mazingira mazuri kwa ukuvu kuzaana, na hivyo, kuongeza hatari ya kukumbwa na maambukizi ya fangasi. Pia, sukari nyingi huathiri usawa wa bakteria wazuri ukeni.

Vyakula vya kukaangwa kwa mafuta mengi: Mafuta yasiyofaa afya huchochea uvimbe na kuvuruga viwango vya homoni. Hii huathiri mzunguko wa damu kwenye via vya uzazi.

Pombe na sigara: Pombe hupunguza kinga ya mwili, na hivyo, kuongeza hatari ya maambukizi. Kwa upande mwingine,sigara huharibu mzunguko wa damu na afya ya uzazi kwa ujumla.

Vinywaji vyenye kafeini kama vile kahawa: Kafeini nyingi inaweza kusababisha uke kukosa unyevu wa kutosha. Hii huchangia ukavu wa uke kwa baadhi ya wanawake.

Ili kudumisha afya ya uke, unashauriwa kuzingatia lishe bora huku ukihakikisha kwamba chakula chako kila mara kinahusisha viwango vya juu vya matunda, mboga, protini, na mafuta mazuri.

Epuka kula vyakula vya viwandani. Aidha, fanya mazoezi mara kwa mara na pata usingizi wa kutosha.