TEKNOLOJIA ya kisasa ya Akili Unde  (Artificial Intelligence) imekuwa gumzo ulimwenguni na sasa imeanza kutumika kama silaha ya siri miongoni mwa wafanyabiashara wakubwa na wadogo.

Wataalamu wanasema AI inaweza kusaidia kupunguza gharama, kuongeza tija na hata kuleta wateja wapya endapo itatumika kwa njia sahihi.

Kwanza, AI hutoa nafasi ya kuelewa mahitaji ya wateja. Programu zake zinaweza kuchanganua taarifa kutoka kwa mauzo ya awali na mitandao ya kijamii ili kubaini bidhaa au huduma zinazopendwa zaidi.

Hii humsaidia mfanyabiashara kuhakikisha duka lake halikosi bidhaa zinazohitajika na pia kuepuka hasara ya kuhifadhi bidhaa zisizo na soko.

Pili, AI ni chombo cha nguvu katika masoko na matangazo ya kidijitali. Kupitia zana maalum, mfanyabiashara anaweza kufahamu ni kundi gani la wateja linavutiwa zaidi na bidhaa zake, saa zipi matangazo yanafaa kuwekwa mtandaoni, na hata lugha bora ya kutumia kuwavutia wateja.

Hii inafanya matangazo kuwa yenye ushawishi mkubwa na kupunguza matumizi yasiyo ya lazima.

Tatu, huduma kwa wateja imebadilika sana kupitia program za chatbots zinazofanya kazi saa 24. Hizi zana husaidia kujibu maswali ya haraka ya wateja bila kuhitaji mhudumu muda wote. Huduma ya papo kwa hapo huimarisha uaminifu wa wateja na kuwafanya warudi tena.

Nne, AI ni msaada mkubwa katika usimamizi wa fedha na hesabu. Programu za kisasa zinaweza kufuatilia kila shilingi inayotumika au kuingia, hivyo kuzuia hasara na udanganyifu. Pia, zinaweza kutabiri changamoto za kifedha kabla hazijatokea na kumpa mfanyabiashara nafasi ya kupanga mbeleni.

Hata hivyo, wataalamu wanakumbusha kuwa AI haipaswi kuchukua nafasi ya ubunifu na maamuzi ya binadamu.

“Ni lazima wafanyabiashara wajifunze kutumia teknolojia hii kwa uangalifu, kuwekeza katika mafunzo ya wafanyakazi na kuendelea kudumisha huduma bora za kibinadamu,” anasema Samson Adama, mtaalamu wa masuala ya teknolojia.

Kwa hivyo, iwe unamiliki kioski, mkahawa, biashara ya mtandaoni au kampuni kubwa, sasa ni wakati wa kuangalia jinsi AI inaweza kukusaidia. Ikitumika vyema, teknolojia hii inaweza kukuza biashara yako, kukuwezesha kushindana sokoni na kufungua milango ya mafanikio mapya.