KUSHINDWA kwa mgombeaji wa Ford Kenya, Vincent Maunda katika uchaguzi mdogo wa udiwani katika wadi ya Chwele-Kabuchai, eneobunge la Kabuchai, Kaunti ya Bungoma kumefasiriwa kama pigo kubwa kisiasa kwa Spika wa Bunge Moses Wetang’ula.

Kwa upande mwingine, ushindi wa mgombea huru Bw Eric Wekesa umeonekana kama vuno kubwa kisiasa kwa Gavana wa Trans Nzoia George Natembeya, ambaye ni hasidi mkuu kisiasa wa Bw Wetang’ula, ikizingatiwa kuwa wamekuwa wakishindania ubeba wa kisiasa katika jamii ya Waluhya.

Kulingana na matokea rasmi yaliyotangazwa rasmi na Tume Huru ya Uchaguzi na Mipaka (IEBC), Bw Wekesa aliibuka kidedea kwa kuzoa jumla ya kura 6,162 huku Bw Maunda akimfuata, kwa umbali, kwa kura 2,765.

Kiti hicho kilisalia wazi mnamo Agosti mwaka huu kufuatia kifo cha James Barasa Mukhongo aliyechaguliwa kwa tiketi ya Ford Kenya katika uchaguzi mkuu wa 2022.

Lakini kinyang’anyiro hicho kiligeuka kuwa ushindani kati ya Bw Wetang’ula, ambaye anatoka wadi hiyo na ameakuwa na usemi wa kisiasa katika kaunti Bunge kwa zaidi ya miaka 15, na Bw Natembeya ambaye ni mwanasiasa ibuka mwenye ndoto ya kuwa kigogo wa siasa sio tu Bungoma bali eneo zima la uliokuwa mkoa wa Magharibi.

Gavana huyo wa Trans Nzoia anaongoza Vuguvugu la Tawe linalopania kunasua jamii ya Mulembe kutoka udhibiti wa Bw Wetang’ula na Mkuu wa Mawaziri Musalia Mudavadi na kupigania mwamko mpya wa kimaendeleo kwa manufaa ya wakazi wa eneo hilo.

Bw Natambeya, ambaye pia ndiye naibu kiongozi wa chama cha DAP-Kenya, amejizolea sifa kufuatia ushindi wa Bw Wekesa ikizingatiwa kuwa ni yenye aliongoza mazungumzo ya kumshawishi mgombea wa chama hicho ampishe mgombeaji huyo huru kama mkakati wa kuimarisha nafasi yake ya kushinda.

Aidha, alikuwa mstari wa mbele kumpigia debe Bw Wekesa akishirikishiana na Mbunge wa Kabuchai Majimbo Kalasinga na Gavana wa zamani wa Bungoma Wycliffe Wangamati.

Bw Kalasinga, ambaye alichaguliwa kwa tiketi ya Ford Kenya, aliasi chama hicho kutokana na tofauti za kisiasa kati yake na Bw Wetang’ula ambaye ndiye kiongozi wa chama hicho cha Simba.

Mnamo Jumamosi Novemba 22 fujo zilitokea katika mkutano wa kampeni ulioongozwa na Gavana Natembeya na Mbw Kalasinga na Wangamati katika wadi hiyo ya Chwele-Kabuchai.

Aidha, magari yaliyokuwa kwenye msafara wa mwanasiasa hao yaliharibiwa baaada ya kushambuliwa kwa mawe na kundi la wahuni waliopania kuvuruga mkutano huo.

Isitoshe, wahuni hao alivamia, na kuharibu mali, katika boma la Bw Kalasinga pamoja na katika mkahawa wake ulioko katika makutano ya barabara ya Kaburengu katika wadi hiyo.

Kulingana na Bw Martin Andati, ambaye ni mchanganuzi wa masuala ya kisiasa, kushindwa kwa mgombeaji wa Ford Kenya katika wadi ya Chwele-Kabuchai ni ishara tosha kwa Bw Wetang’ula kwamba ubabe wake kisiasa u hatarini sio tu katika wadi hiyo bali katika kaunti ya Bungoma na jamii ya Mulembe kwa ujumla.

“Yule aliyeshindwa katika kinyang’anyiro hicho cha udiwani sio Bw Maunda bali ni Bw Moses Wetang’ulam ambaye ndiye alikuwa uso wa kampeni hizo.

Isitoshe, Spika Wetang’ula anatoka wadi hiyo, ni kiongozi wa Ford Kenya na mmoja wa vinara wakuu katika muungano tawala wa Kenya Kwanza.

Kwa hivyo, ilitarajiwa kuwa Ford Kenya ingeshinda kiti hicho kwa urahisi ila sasa matokeo hayo yameonekana wazi kuwa piga kwake kama mwanasiasa mkongwe eneo hilo,” akaeleza.

Kulingana na Bw Andati, kiongozi huyo wa Ford Kenya sasa hana budi kufanya mazungumzo ya maridhiano na wanasiasa kutoka eneo hilo ili “kuokoa jahazi lake kisiasa kuelekea uchaguzi mkuu wa 2027.”