Nahodha wa Harambee Starlets, Mwanalima Adam Jereko, anatarajiwa kuwa mchezaji wa soka wa pili wa kike Mkenya kushiriki kipute cha Klabu Bingwa Ulaya kwa Wanawake (UEFA) baada ya kusaidia mabingwa wa Denmark, HB Køge, kufuzu.

Jereko, maarufu kama “Dogo”, alikuwa sehemu ya kikosi cha Køge kilichotoka sare ya 1-1 na PSV Eindhoven Jumatano na kufuzu kwa jumla ya mabao 2-1.

Mkenya huyo alifunga bao katika ushindi wa 2-1 dhidi ya Heart of Midlothian katika raundi ya pili kabla ya Køge kuiondoa PSV.

Jereko sasa anaungana na Marjolene Nekesa ambaye mwaka 2023 alikuwa Mkenya wa kwanza kucheza hatua ya makundi ya mashindano hayo akiwa na Slavia Prague ya Czech.

Køge, mabingwa mara 15 wa Denmark, watashiriki mashindano hayo kwa mara ya kwanza tangu msimu wa 2021/22.

Katika droo iliyofanywa Ijumaa mjini Nyon, Uswisi, Køge ilipangwa kundi moja ya mabingwa watetezi Barcelona, Arsenal, Lyon, Benfica, Paris FC na Inter Milan.

Kwa mfumo mpya, kila timu itacheza mechi sita, tatu nyumbani na tatu ugenini. Timu nne bora zitafuzu moja kwa moja robo-fainali, huku zinazomaliza nafasi ya tano hadi 12 zikiingia mchujo.

Jereko alianza soka Mombasa Olympic Ladies kabla ya kujiunga na Thika Queens, sasa Kenya Police Bullets, mwaka 2018.

Alisaidia Thika Queens kutwaa ubingwa wa Ligi Kuu ya Wanawake (KWPL) bila kupoteza msimu wa 2020/21, akifunga mabao 19 na kuwa mfungaji bora msimu huo.

Mwaka 2024, aliweka historia kuwa Mkenya wa kwanza kucheza Ligi Ya Wanawake nchini Marekani baada ya kujiunga na Kansas City Current.

Mwaka jana alijiunga na HB Køge kwa mkopo kabla ya kusaini mkataba wa kudumu.

Jereko pia ni nahodha wa Starlets na ameiongoza Kenya katika mashindano mbalimbali ya kimataifa ikiwemo mwezi jana katika dimba la Mataifa ya Afrika kwa Wanawake (WAFCON) mwezi jana nchini Morocco.