BRAGA, Ureno:

URENO ilianza maisha bila nahodha wake Cristiano Ronaldo kwa kichapo kizito cha 4-1 dhidi ya Denmark kwenye Uwanja wa Braga, katika mechi ya Mataifa ya Ulaya Jumamosi usiku.

Mechi hiyo ilikuwa ya kwanza tangu mshambuliaji huyo kutangaza kustaafu kuichezea timu ya taifa.

Ronaldo, 41, alitangaza kustaafu kwake wiki jana kupitia video aliyoweka kwenye mitandao ya kijamii, akisitisha safari ndefu iliyoanza mwaka 2003.

Katika kipindi hicho, aliandikisha rekodi za dunia kwa kufunga mabao 146 na kucheza mechi 234, pamoja na kunyakua tuzo ya Ballon d’Or mara tano.

Licha ya uamuzi huo, kocha Jorge Jesus alisema baadaye kuwa Ronaldo angeitwa kwenye kikosi cha Ligi ya Mataifa ya Ulaya dhidi ya Denmark na Wales.

Ikumbukwe, fowadi huyo aliondoka kambini mwezi Septemba baada ya kuambiwa hataanza mchezo wa kwanza dhidi ya Denmark, hatua iliyomgharimu faini pauni 255 (Sh45,000) na marufuku ya siku 30.

Mechi ya Jumamosi iligeuka sherehe za kumuaga shujaa wao. Wachezaji na watoto walioandamana nao waliingia uwanjani wakiwa wamevalia jezi iliyoandikwa ‘Ronaldo 7’, huku mashabiki wakibandika bango kubwa lililoandikwa ‘Ronaldo’ kwenye ghorofa ya juu na ‘GOAT’ chini yake.

Bango jingine lilisomeka ‘Asante, Nahodha’, ujumbe ambao pia ulionekana kwenye ubao wa matokeo dakika ya saba.

Hata hivyo, sherehe hizo ziliharibiwa na Denmark.

Kiungo wa zamani wa Southampton na Tottenham, Pierre-Emile Hojbjerg, aliifungia Denmark kwa penalti dakika chache kabla ya mapumziko baada ya Ruben Dias kuunawa mpira.

Kipindi cha pili, zamu ya aliyekuwa mshambuliaji wa Manchester United, Rasmus Hojlund, anayechezea Napoli ya Italia kwa sasa, kuangamiza wenyeji.

Hojlund alifunga mabao mawili ndani ya dakika nane tu na kuiweka Denmark kifua mbele 3-0. Fulham Joachim Andersen alimalizia karamu kwa kichwa na kuifanya 4-0 dakika ya 75.

Bernardo Silva, aliyekuwa Manchester City na sasa Real Madrid, alifunga bao la kufutia machozi dakika ya 93 baada ya juhudi za Joao Neves kukataliwa.

Jezi nambari saba ya Ronaldo ilikabidhiwa kwa aliyekuwa mshambuliaji wa Wolves, Carlos Forbs, anayecheza Ubelgiji na Club Brugge.

Hata hivyo, nambari hiyo ilibadilishwa muonekano kwa kuongezewa mstari. Ujumbe kutoka ukurasa rasmi wa Ureno kwenye X ulisema: “Wakati wa kuanzisha nambari 7 mpya. Kwa sababu kuna moja ambayo itabaki ya milele.”

Ureno, ambayo ilikuwa imeshinda mechi zake nne za kwanza na kufuzu robo fainali, inahitaji kuepuka kichapo dhidi ya Wales mjini Cardiff kesho ili kumaliza kinara wa kundi.

Denmark itaikaribisha Norway siku hiyo hiyo ikiwa na pointi tatu zaidi kuliko wapinzani wake.