Wantam! Sifuna aidhinishwa na Linda Mwananchi kupambana na Ruto 2027
HATUA ya Linda Mwananchi kumuidhinisha rasmi Seneta wa Nairobi Edwin Sifuna kuwa mgombea wake wa urais, inaonekana kufunga mlango kwa azma ya Gavana wa Siaya James Orengo kuwania uongozi wa nchi kupitia vuguvugu hilo.
Katika mkutano huo wa Jumamosi, viongozi wakuu wa vuguvugu hilo waliamua kumuunga Seneta Sifuna huku wakisaka muungano mkubwa wa upinzani kuelekea kwa Uchaguzi Mkuu wa 2027.
“Leo (Jumamosi), tulikutana kama uongozi wa Linda Mwananchi na kuamua kusonga mbele pamoja, tukiwa tumeunganishwa na lengo moja la kujibu wito wa Wakenya wanaotafuta utawala bora na kuikomboa nchi.
“Pia tuliamua kwamba Edwin Watenya Sifuna ndiye kiongozi wetu na mgombea wetu wa urais,” ikasema taarifa ya vuguvugu hilo.
Mkutano huo ulihudhuriwa na Bw Sifuna, Mbunge wa Embakasi Mashariki Babu Owino, Seneta wa Kakamega Boni Khalwale, Seneta wa Kisii Richard Onyonka, Gavana wa Trans Nzoia George Natembeya, Seneta wa Vihiga Godfrey Osotsi na Mbunge wa Suba Kusini Caroli Omondi.
Wengine waliohudhuria ni Mbunge wa Funyula Wilberforce Oundo, Anthony Kibagendi (Kitutu Chache Kusini), Clive Gisairo (Kitutu Masaba), Gavana wa zamani wa Meru Kawira Mwangaza na aliyekuwa rais wa Chama cha Wanasheria Nchini (LSK) Faith Odhiambo.
“Orengo alituma udhuru lakini sote tulikubaliana kwamba ni Sifuna pekee atakayeungwa kuwania urais. Hana nafasi sasa kwa sababu wote waliokuwepo walikubaliana kuhusu uwanizi wa Sifuna,” akasema Dkt Khalwale.
Dkt Khalwale alisema wanachama walijaribu kumshawishi Bw Owino kuwania ugavana wa Nairobi kwa kutumia chama kimoja na Bw Sifuna katika juhudi za kuunganisha ngome zao za kisiasa.
“Wengi walimpinga lakini sasa suala hilo ni uamuzi wake kwa sababu yeye alisimama kidete na msimamo wake,” akasema Dkt Khalwale.
Bw Owino tayari amesajili The Mwananchi Party (TMP), ambayo anakusudia kutumia kuwania ugavana wa Nairobi.
Mipango yake ya kisiasa imekuwa ikipingana na juhudi za kupata chama kimoja cha kisiasa, huku Bw Natembeya akisukuma Bw Sifuna kuwania kwa kutumia UDP.
Bw Natembeya alisema wiki iliyopita kuwa Bw Sifuna alikuwa tayari kutangaza UDP kuwa chama atakachotumia kuwania urais.
Jaribio la awali la kubadilisha jina la UDP kuwa Ukombozi People’s Party (UPP) lilikwama baada ya Kiongozi wa Wiper Patriotic Front Kalonzo Musyoka kusajili The Ukombozi Alliance (TUA), hatua iliyotatiza mipango ya vuguvugu hilo kuhusu jina hilo.
Linda Mwananchi imetangaza mipango ya kuzindua chama cha Bw Sifuna cha kuwania urais Oktoba 3.
Mmoja wa viongozi wakuu waliohudhuria mkutano wa Jumamosi lakini akakataa kutajwa jina alisema kutokuwepo kwa Bw Orengo hakupaswi kuchukuliwa kama ishara ya mgawanyiko ndani ya vuguvugu hilo.
“Alisema hangeweza kuhudhuria mkutano lakini tutamuunga mkono Sifuna kama kila mtu alivyokubaliana. Hakuna mgawanyiko kama inavyodaiwa na tunaamini Orengo yuko pamoja nasi katika kumuunga mkono Sifuna,” akasema kiongozi huyo.
Aliongeza kuwa maandalizi ya uzinduzi wa chama cha Bw Sifuna yalikuwa yamepiga hatua kubwa lakini akakataa kutoa maelezo zaidi.
Bw Owino, katika taarifa baada ya mkutano huo, pia alisisitiza umoja ndani ya vuguvugu hilo, akisema lengo la upinzani kushinda serikali linaweza kufikiwa tu kupitia umoja wao.
Bw Orengo hakuhudhuria mkutano wa faragha wa Jumamosi ambako uamuzi huo ulifanywa, licha ya kuwa ametangaza hadharani nia yake ya kuwania urais.
Viongozi waliohudhuria kikao hicho walisema Bw Orengo alituma udhuru kwa sababu alikuwa na mwanafamilia mgonjwa, na kusisitiza kuwa kutokuwepo kwake hakupaswi kufasiriwa kama ishara ya mgawanyiko.
Bw Orengo amekuwa akisisitiza kuwa umoja wa upinzani haupaswi kuzima azma za wagombea wengine na amekuwa akitaka uteuzi huru wa kumpata mgombeaji wa urais wa Linda Mwananchi.
“Hakuna tatizo kushindana ndani ya Linda Mwananchi au upinzani. Muhimu ni kuwasilisha wagombea wote kwenye mchakato wa kuaminika wa uteuzi na, mwishowe, tupate mgombea mmoja wa kukabiliana na Rais William Ruto,” akasema gavana huyo hapo awali.
Jana Taifa Dijitali ilijaribu kubaini sababu ya Bw Orengo kukosa mkutano huo na ikiwa anaunga mkono kuidhinishwa kwa Bw Sifuna, lakini hakujibu jumbe wala kupokea simu.
Gavana huyo alitarajiwa Jumapili kuungana na kiongozi wa Jubilee Fred Matiang’i na Kiongozi wa People’s Party of Kenya Ndindi Nyoro kwa ibada katika Kanisa la Dominion Olerai kabla ya mkutano wa hadhara mjini Narok.