Spika wa Bunge la Kitaifa, Moses Wetang’ula, amesema serikali inaendelea kuwekeza katika maendeleo ya miundombinu na kuimarisha usalama katika Kaunti ya Marsabit ili kufungua fursa za kiuchumi na kuboresha maisha ya wakazi wa eneo hilo.

Akizungumza katika hafla ya kuchangisha fedha za elimu eneo la Mugur E Serima, Marsabit, Wetang’ula alisema serikali imepiga hatua katika kupambana na ukosefu wa usalama kupitia ushirikiano na jamii za eneo hilo.

Alisema maeneo ya mashinani na yaliyotengwa kwa muda mrefu yanapaswa kunufaika kwa usawa kutokana na miradi ya maendeleo ya kitaifa kwa kuwa sehemu kubwa ya rasilimali za nchi hupatikana nje ya miji mikubwa.

Kwa mujibu wa Spika huyo, kuboresha barabara na miundombinu mingine kutachochea biashara, kuvutia wawekezaji na kuunganisha jamii mbalimbali za Marsabit. Aliongeza kuwa usalama thabiti utawawezesha wakazi kutumia kikamilifu rasilimali zilizopo katika kaunti hiyo.

Wetang’ula alitaja maendeleo yaliyopatikana chini ya utawala wa Rais William Ruto, ikiwemo miradi ya barabara, afya na elimu pamoja na uwekezaji mkubwa kama mradi wa Sh2 trilioni wa Lamu wa kiwanda cha kusafisha mafuta cha Dangote.

Pia alisema serikali itaajiri walimu 24,000 zaidi mwaka huu, huku maeneo ya mazingira magumu yakipewa kipaumbele ili kuhakikisha usawa wa fursa za elimu nchini.

Naye Katibu wa Utawala na Afisa Mkuu wa Uhasibu katika Huduma ya Kitaifa ya Polisi, Bernice Lemedeket, aliwashukuru viongozi wanaounga mkono elimu ya mtoto wa kike.

“Tumefanikiwa katika taaluma zetu kwa sababu tulibaki shuleni. Tunapaswa kuona watoto wengi kutoka jamii zilizotengwa wakifanya vyema katika masomo,” alisema.

Gavana wa Marsabit, Mohamud Mohamed Ali, alisema serikali yake imetoa ufadhili kamili wa masomo kwa zaidi ya wanafunzi 10,000 tangu mwaka 2018.

“Hatutumii misingi ya ukoo katika kutoa ufadhili wa elimu. Sheria zimebadilika lakini hilo halimaanishi tuache kuwekeza katika elimu,” alisema.

Gavana huyo pia alitangaza kumuunga mkono Rais Ruto katika uchaguzi wa 2027, akisema upinzani hauna ajenda wala viongozi wenye uwezo wa kuongoza taifa.

Mbunge wa Laisamis, Joseph Lemasolai Lekuton, alimshukuru Wetang’ula kwa kuendelea kuunga mkono jamii zilizotengwa na kuhimiza umoja ili kuchochea maendeleo zaidi katika eneo hilo.

Kwa upande wake, Katibu  wa Wizara ya Ustawi wa Viwanda, Dkt Juma Mukhwana, alisema serikali imepata mafanikio makubwa ya maendeleo na kuwataka Wakenya kuendelea kuunga mkono ajenda yake ya maendeleo.