CHAMA kipya cha The Equitable Party (TEP) kinachohusishwa na Seneta wa Nairobi Edwin Sifuna kimeanza maandalizi ya kubadili jina na kuitwa Linda Mwananchi Movement (LMM), huku viongozi wake wakijipanga kukitumia kuelekea uchaguzi mkuu wa 2027.

Msajili wa Vyama vya Kisiasa tayari ameidhinisha mabadiliko ya majina ya maafisa wa TEP, hatua inayofungua njia kwa chama hicho kuanza mchakato wa kuitwa Linda Mwananchi.

Baraza Kuu la Kitaifa la chama hicho lilikutana Jumatano na kuidhinisha mpango huo.

Hatua hiyo inajiri siku chache baada ya Bw Sifuna kuzindua rasmi TEP jijini Nairobi, ambako alitambulishwa kama kiongozi wa chama hicho na kueleza mipango ya kukitumia kuelekea 2027.

Katika hotuba yake ya uzinduzi mnamo Oktoba 4, Bw Sifuna alisema TEP ilipatikana baada ya juhudi za kutafuta makao mapya ya kisiasa kufuatia mzozo wake na ODM.

Hata hivyo, alidokeza kuwa TEP huenda isiwe jina la mwisho la vuguvugu hilo.

“Katika siku zijazo, na kwa mujibu wa uamuzi wa viongozi wakuu wa Linda Mwananchi, tutabadili jina la chama kuwa Linda Mwananchi Movement,” alisema Bw Sifuna.

Aliongeza kuwa iwapo kutakuwa na vikwazo zaidi katika mchakato huo, chama kitaendelea kutumia jina la TEP.

Hatua hiyo imepatia nguvu zaidi vuguvugu la Linda Mwananchi, ambalo jina lake limekuwa katika mzozo wa kisheria kati ya washirika wa Bw Sifuna na Msajili wa Vyama vya Kisiasa.

Msajili aliidhinisha kuhifadhi jina Linda Mwananchi Movement Oktoba 1, kufuatia uamuzi wa Jopo la Kutatua Mizozo ya Vyama vya Kisiasa kupitia upya uamuzi wake wa awali wa kulikataa.

Hata hivyo, kuhifadhiwa kwa jina hilo hakumaanishi kuwa LMM kimesajiliwa kama chama cha kisiasa. Badala yake, jina hilo limepewa muda mpya wa siku 90 ambapo waasisi wake wanaweza kukamilisha hatua zinazohitajika za usajili.

Hatua hiyo inafanyika wakati muhimu kwani vyama vinavyolenga kushiriki uchaguzi wa 2027 vinapaswa kuwasilisha kwa IEBC majina na saini za maafisa wao walioidhinishwa kufikia Oktoba 15.

Uamuzi wa jopo ulitokana na rufaa iliyowasilishwa na Mbunge wa Suba South Caroli Omondi, Pauline Njoki Njoroge na Faith Odhiambo baada ya Msajili kukataa majina ya Linda Mwananchi.

Majina yaliyopendekezwa ni pamoja na Linda Mwananchi Alliance, Linda Mwananchi Coalition na Linda Mwananchi Party of Kenya.

Jopo lilibatilisha uamuzi wa Msajili wa Agosti 7, likisema hakutoa sababu za kutosha kukataa jina hilo.

Pia ilisema uhifadhi wa jina la Liberty National Democratic Alliance, maarufu kama LINDA, ulimalizika baada ya muda wa kisheria wa siku 90.

Hata hivyo, bado kuna kizingiti kingine. Charles Wanyonyi amemtaka Msajili kupatia kipaumbele ombi lake la kuhifadhi jina Linda Mwananchi Party of Kenya, akisema aliliwasilisha Februari 24, 2026.

Wakili wake amesema ombi hilo liliwasilishwa miezi kadhaa kabla ya yale yaliyozingatiwa na jopo.

Katika uzinduzi wa TEP, Bw Sifuna alisema chama hicho kinalenga kuwapa wananchi nafasi kubwa katika siasa.

Alisema vuguvugu hilo litalenga siasa zinazozingatia mawazo, uwajibikaji, huduma na Katiba, badala ya siasa zinazozunguka mtu mmoja.

Bw Sifuna pia alisema vijana na wanawake watapewa nafasi kubwa katika kufanya maamuzi ya kisiasa, huku maeneo na jamii mbalimbali zikizingatiwa kwa usawa.

Alisema chama hicho kiko tayari kushirikiana na viongozi wengine wa upinzani pamoja na Wakenya wanaounga misingi yake ya kisiasa.