MKURUGENZI wa Mashtaka ya Umma (DPP) ameidhinisha mashtaka ya mauaji dhidi ya washukiwa watano wanaodaiwa kuhusika na kifo cha wakili maarufu Mathew Kyalo Mbobu.

Washukiwa hao ni mwanasiasa Rose Mbithe Mulwa, watoto wake Chris Mulwa na Angela Mulwa pamoja na maafisa wawili wa polisi, Julius Kipkoech Cheruiyot na Kennedy Kipkemei Borboroi.

Wawili hao, Cheruiyot na Borboroi, walifikishwa mbele ya Jaji Diana Kavedza katika Mahakama Kuu ya Kibera, lakini hawakujibu mashtaka hayo baada ya kuamriwa kufanyiwa uchunguzi wa afya ya akili katika Hospitali ya Mbagathi.

Jaji Kavedza pia aliamuru Rose na Angela, wanaozuiliwa katika gereza la wanawake la Lang’ata, pamoja na Chris anayezuiliwa rumande Nairobi, wafikishwe kortini.

Washukiwa wote wanatarajiwa kujibu mashtaka ya mauaji Oktoba 27, 2026, baada ya ripoti za uchunguzi huo kuwasilishwa kortini.

Mbobu, ambaye alikuwa wakili, mhadhiri wa chuo kikuu na mwandishi, aliuawa Septemba 9, 2025 alipokuwa akiendesha gari kuelekea nyumbani kupitia Barabara ya Magadi karibu na Shule ya Brookhouse International.